COVID-19
កូរ៉េខាងត្បូង៖ កូរ៉េខាងជើង អាចបញ្ចេញមីស៊ីលបាលីស្ទិកថ្មីនៅថ្ងៃកំណើតបក្សចុងសប្ដាហ៍នេះ
រូបភាព៖ Yonhap
×![]()
ដោយ: ធៀន ភារិន្ទ
ក្រសួងបង្រួបបង្រួមកូរ៉េខាងត្បូង នៅថ្ងៃទី៨ ខែតុលា បានលើកឡើងថា កូរ៉េខាងជើង អាចនឹងបញ្ចេញអាវុធយុទ្ធសាស្ត្រប្រភេទថ្មី នៅក្នុងព្យុហយាត្រាយោធា ដើម្បីប្រារព្ធខួបលើកទី៧៥ នៃការបង្កើតបក្សពលករកូរ៉េខាងជើង។ ការធ្វើព្យុហយាត្រានេះ ធ្វើឡើងស្របពេលកូរ៉េខាងជើង កំពុងរឹតបន្តឹងក្នុងប្រទេស ដើម្បីទប់ស្កាត់ការរាតត្បាតនៃCOVID-19។ 
ថ្ងៃទី១០ ខែតុលា គឺជាថ្ងៃបង្កើតបក្សពលករកូរ៉េខាងជើង។ ក្នុងឆ្នាំ២០២០ នេះ ក្រសួងបង្រួបបង្រួមរបស់កូរ៉េខាងត្បូង រំពឹងថា កូរ៉េខាងជើង នឹងធ្វើព្យុហយាត្រាដ៏ធំមួយ និងលទ្ធភាពដាក់បង្ហាញអាវុធថ្មីៗផ្សេងទៀត ក្នុងនោះមានដូចជា មីស៊ីលបាលីស្ទិកអន្តរទ្វីប (ICBM), រថយន្តទម្របាញ់គ្រាប់រ៉ុក្កែត (TEL) និងមីស៊ីលបាលីស្ទិកបាញ់ចេញពីនាវាមុជទឹកជាដើម។
តាមការចុះផ្សាយរបស់ទីភ្នាក់ងារព័ត៌មាន Yonhap ក្រសួងបង្រួបង្រួម បានអះអាងយ៉ាងដូច្នេះថា៖ « កូរ៉េខាងជើង ត្រូវគេរំពឹងថា ធ្វើព្យុហយាត្រាយោធាទ្រង់ទ្រាយធំមួយ និងព្រឹត្តិការណ៍ផ្សេងទៀត ដើម្បីប្រារព្ធខួបលើកទី៧៥ឆ្នាំ នៃការបង្កើតបក្សពលករនៅសប្តាហ៍នេះ ដើម្បីសាមគ្គី និងការរួបរួមនៅក្នុងបក្ស»។
ថ្លែងក្នុងអំឡុងកិច្ចប្រជុំនៅសភា លោក Lee In-young រដ្ឋមន្ត្រីក្រសួងបង្រួបបង្រួម បានលើកឡើងថា ខុសពីលើកមុន កូរ៉េខាងជើង បានបង្ហាញពីសមត្ថភាពមីស៊ីល និងនុយក្លេអ៊ែររបស់ខ្លួន និងបាញ់សាកល្បងមីស៊ីលថែមទៀត នៅពេលការបោះឆ្នោតប្រធានាធិបតីអាមេរិកជិតមកដល់ ប៉ុន្តែលើកនេះ កូរ៉េខាងជើង រំពឹងថា អាចត្រឹមតែបង្ហាញអាវុធរបស់ខ្លួនប៉ុណ្ណោះ។
តាមគម្រោង កូរ៉េខាងជើង នឹងរៀបចំពិធីក្បួនព្យុហយាត្រាដ៏ធំមួយនៅថ្ងៃទី១០ ខែតុលាខាងមុខ។ ពព្រឹត្តិការណ៍នេះ ធ្វើឡើងស្របពេលរដ្ឋាភិបាលទីក្រុងព្យុងយ៉ាង ចេញបម្រាមរឹតត្បិតនៅក្នុងប្រទេសយ៉ាងខ្លាំង ដើម្បីទប់ស្កាត់ COVID-19 និងស្របពេលសេដ្ឋកិច្ចប្រទេសមួយនេះ កំពុងរងគ្រោះ ដោយសារជំងឺឆ្លងសកល។
ទំនាក់ទំនងកូរ៉េខាងជើង និងកូរ៉េខាងត្បូង ហាក់មិនសូវល្អឡើយ បន្ទាប់ពីកូរ៉េខាងជើងបានបំផ្ទុះការិយាល័យទំនងទំនងជាមួយកូរ៉េខាងត្បូង និងព្រមានកាត់ផ្តាច់ប្រព័ន្ធទំនាក់ទំនងឆ្លងព្រំដែន បន្ទាប់ពីខិត្តប័ណ្ណប្រឆាំងកូរ៉េខាងជើង ត្រូវបានផ្ញើទៅក្នុងដីកូរ៉េខាងជើង។ ទំនាក់ទំនងកូរ៉េទាំងពីរកាន់តែរអាក់រអួលថែមទៀត នៅពេលកូរ៉េខាងជើង ត្រូវបានរាយការណ៍ថា បាញ់សម្លាប់មន្ត្រីក្រសួងនេសាទ ដែលចូលក្នុងដែនទឹករបស់ខ្លួន៕
Tag:
កូរ៉េខាងត្បូង
កូរ៉េខាងជើង
© រក្សាសិទ្ធិដោយ thmeythmey.com
