ជាតិ
ស្ថានភាពទឹកជំនន់នៅក្នុងក្រុងពោធិ៍សាត់។ រូបថត Pursat Provincial Hall
×![]()
បណ្តាស្រុកនៅខេត្តពោធិ៍សាត់ និងបាត់ដំបង កំពុងជន់លិចដោយសារជំនន់ទឹកភ្លៀង។ លោក ម៉ៅ ធនិន អភិបាលខេត្តពោធិ៍សាត់ ក៏ដូចជាលោក ងួន រតនៈ អភិបាលខេត្តបាត់ដំបង បានចុះពិនិត្យមើលស្ថានភាពនៅតំបន់រងគ្រោះក្នុងមូលដ្ឋានរដ្ឋបាលរៀងៗខ្លួននាថ្ងៃនេះ។
ថ្លែងប្រាប់សារព័ត៌មានថ្មីៗតាមទូរសព្ទ លោក ម៉ៅ ធនិន អភិបាលខេត្តពោធិ៍សាត់ បានអះអាងថា កាលយប់រំលងអធ្រាត្រចូលថ្ងៃទី៩តុលានេះ មានភ្លៀងខ្លាំងឥតឈប់ ទើបធ្វើឱ្យស្រុកវាលវែង កណ្តៀង រួមក្រុងពោធិ៍សាត់ រងការលិចលង់ ដោយកម្ពស់ទឹកស្ទឹងពោធិ៍សាត់ បានលើសដល់កម្រិតឱ្យប្រុងប្រយ័ត្ន និងមានសន្ទុះហក់ឡើងទៀត។
លោក ម៉ៅ ធនិន បានបញ្ជាក់ថា បច្ចុប្បន្នទឹកស្ទឹងក្រុងពោធិ៍សាត់ មានកម្ពស់រហូត៥,៤៥ម៉ែត្រ ដែលលើសពីកម្រិតឱ្យប្រុងប្រយ័ត្ននៅត្រឹមកម្ពស់៥ម៉ែត្រប៉ុណ្ណោះ តែលោកមិនទាន់អាចកំណត់បាននៅឡើយថា មានប្រជាពលរដ្ឋប៉ុន្មានគ្រួសារដែលកំពុងរងគ្រោះ ដោយសារជំនន់ទឹកភ្លៀងភ្លាមៗនេះទេ។
លោក ម៉ៅ ធនិន អភិបាលខេត្តពោធិ៍សាត់ ចុះពិនិត្យមើលស្ថានភាពជំនន់ទឹកភ្លៀង ដែលបានកើតឡើងកាលពីយប់ថ្ងៃទី៩តុលា។
លោកបាននិយាយដូច្នេះ៖«ពេលនេះយើងកំពុងអន្តរាគមន៍បន្ទាន់ជួយដល់ប្រជាពលរដ្ឋ ទាំងការរំដោះទឹក និងទាំងការផ្តល់ស្បៀងដល់អ្នករងគ្រោះ ដោយសារទឹកជំនន់នេះ»។
បើលោក ឃិន សុខា អ្នកនាំពាក្យគ្រោះមហន្តរាយ គ្រោះទឹកជំនន់ដោយសារភ្លៀងខ្លាំងកាលពីយប់មិញ គឺបានកើតឡើងតែនៅក្នុងខេត្តពោធិ៍សាត់ប៉ុណ្ណោះ ដោយក្នុងនោះស្រុកកណ្តៀងមានឃុំចំនួន៧ និងក្រុងពោធិ៍សាត់ រងគ្រោះខ្លាំងគេ។ ប៉ុន្តែលោកបានបញ្ជាក់ថា នៅខណ្ឌដង្កោ រាជធានីភ្នំពេញ ប្រសិនមានភ្លៀងនៅថ្ងៃទី៩ថ្ងៃនេះ ប្រជាពលរដ្ឋដែលរស់នៅក្នុងតំបន់នឹងរងប៉ះពាល់ដោយសារជំនន់ភ្លៀង ព្រោះបច្ចុប្បន្ន ទឹកនៅទំនប់៧មករា មានកម្ពស់លើសពី៧ម៉ែត្រដែលជាកម្រិតឱ្យប្រុងប្រយ័ត្ន។
នៅខេត្តបាត់ដំបងឯណោះវិញ សារព័ត៌មានថ្មីៗ មិនអាចសុំការពន្យល់បន្ថែមពីអាជ្ញាធរដែនដីឡើយ ប៉ុន្តែបានការផ្សាយផ្ទាល់នៅលើហ្វេសប៊ុក លោកអភិបាលខេត្ត ងួន រតនៈ បានចុះពិនិត្យស្ថានស្ថានភាពទឹកជំនន់ នៅឃុំព្រែកជីក ស្រុករុក្ខគិរី ខែត្តបាត់ដំបង កាលពីព្រឹកមិញនេះ។
ស្របពេលជាមួយគ្នា រដ្ឋបាលខេត្តបាត់ដំបង បានបញ្ជាក់នៅក្នុងទំព័រហ្វេសប៊ុករបស់ខ្លួនថា ស្រុកមួយចំនួនក្នុងខេត្តបានជន់លិច ក្នុងនោះមាន ស្រុកសំឡូត រុក្ខគិរី មោងឫស្សី និងសំពៅលូន។
រដ្ឋបាលខេត្តប្រាប់ឲ្យពលរដ្ឋ ជាពិសេសអ្នកនៅតាមបណ្តោយដងស្ទឹងសង្កែ ឲ្យមានការប្រុងប្រយ័ត្នខ្ពស់ដោយសារភ្លៀងបន្តធ្លាក់នៅប៉ែកខាងលើ ដែលធ្វើឱ្យអាងស្តុកទឹកពេញ។ ករណីនេះ តម្រូវឲ្យអាជ្ញាធរបើកទ្វារទឹកបង្ហូចូលក្នុងស្ទឹងសង្កែ ដែលធ្វើឱ្យកម្ពស់ទឹកក្នុងស្ទឹងមានការកើនឡើង អាចនៅយប់នេះ ឬព្រឹកស្អែក។
កម្ពុជា នឹងមានភ្លៀងធ្លាក់រហូតថ្ងៃទី១៣តុលា ឆ្នាំ២០២០ ដោយសារព្យុះ (Tropical Storm)។ នេះបើតាមក្រសួងធនធានទឹក និងឧតុនិយម ដោយបានបញ្ជាក់ថា ប្រព័ន្ធសម្ពាធទាបបានបន្តលាតសន្ធឹងឆ្លងកាត់ប្រទេសកម្ពុជា ដោយភ្ជាប់ទៅនឹងសម្ពាធទាបមួយនៅលើសមុទ្រចិនខាងត្បូង ដែលអាចកើតជាវិសម្ពាធទាប (Tropical Depression) ឬបង្កើតជាព្យុះ (Tropical Storm)៕
Tag:
ជំនន់ទឹកភ្លៀង
ពោធិ៍សាត់
បាត់ដំបង
© រក្សាសិទ្ធិដោយ thmeythmey.com
