ជាតិ
ទូតបារាំងបើកឲ្យសាធារណជនចូលទស្សនាស្វែងយល់ពីសំណង់ស្ថាបត្យកម្ម និងបេតិកភណ្ឌនៅថ្ងៃសៅរ៍
× នាឱកាសនៃទិវាបេតិកភណ្ឌ (Journée du Patrimoine) ស្ថានទូតបារាំងប្រចាំកម្ពុជា នឹងបើកឲ្យសាធារណជនចូលទស្សនា ចាប់ពីម៉ោង៨ ដល់ម៉ោង៣ និង៣០នាទី រសៀល នាថ្ងៃសៅរ៍ ទី១០ ខែតុលា ឆ្នាំ២០២០។
ក្រោមប្រធានបទ «ស្ថាបត្យកម្ម និងបេតិកភណ្ឌ» ស្ថានទូតបារាំង យកទិវាបេតិកភណ្ឌនេះ ដើម្បីផ្តល់ឱកាសឲ្យសាធារណជនទស្សនាឧទ្យានដ៏ស្រស់បំព្រង និងស្ថាបត្យកម្មស្ថានទូតបារាំង រូបទាំងពិព័រណ៍របស់សភាពាណិជ្ជកម្ម និងឧស្សាហកម្មបារាំង-កម្ពុជា ដែលផ្តោតលើការជួសជុលអគារបេតិកភណ្ឌនៅកម្ពុជាផងដែរ។
ស្ថានទូតបារាំង គឺទីតាំងប្រវត្តិសាស្ត្រមួយ ស្ថិតនៅកន្លែងដដែលអស់រយៈពេលជាង៦០ឆ្នាំមកហើយ។ ស្ថានទូតត្រូវបានជួសជុលឡើងវិញនៅអំឡុងឆ្នាំ១៩៩០ ដោយក្រុមហ៊ុនបារាំងមួយ ដែលបានប្រើប្រាស់តួអគារចាស់ ដើម្បីរចនាជាអគារថ្មីទាំងស្រុងយ៉ាងស្អាត។
ក្រៅពីសម្រស់ឧទ្យាន និងអគាររបស់ស្ថានទូត សាធារណជនអាចទស្សនាពិព័រណ៌រូបថតស្តីពីអគារបេតិកភណ្ឌនៅតាមតំបន់នានានៅកម្ពុជា ទាំងក្នុងអតីតកាល និងការជួសជុលឡើងវិញផងដែរ។
ក្នុងបរិបទកូវីដ-១៩ អ្នកទស្សនានឹងត្រូវឆ្លងកាត់ការវាស់ស្ទង់កម្តៅ និងតម្រូវឲ្យលាងសម្អាតដៃនៅច្រកចូលស្ថានទូត រួមទាំងពាក់ម៉ាសផងដែរ ហើយការទស្សនាធ្វើឡើងមួយក្រុមម្តងៗ ដើម្បីចៀសវាងការប្រមូលផ្តុំគ្នា។
ដើម្បីផ្តល់ការស្វែងយល់បន្ថែមពីស្ថាបត្យកម្មស្ថានទូតនោះ ស្ថានទូតបារាំងក៏បានចេញផ្សាយសៀវភៅរូបភាពដែលមានសំណេរពីភាសា (ខ្មែរ-បារាំង) ផងដែរ ហើយអ្នកចាប់អារម្មណ៍អាចទាញយកទៅអានតាមរយៈតំណភ្ជាប់ :
https://bit.ly/33uAP0n ៕
Tag:
ទូតបារាំង
បេតិកភណ្ឌ
ស្ថាបត្យកម្ម
© រក្សាសិទ្ធិដោយ thmeythmey.com