អន្តរជាតិ
កន្លែងកម្សាន្តថៃ នឹងដកពាក្យបណ្តឹងលើភ្ញៀវអាមេរិកដែលវាយតម្លៃអវិជ្ជមាន ប្រសិនបើសុំទោស ទិដ្ឋភាពកោះKoh Chang ។ រូបភាព៖ Shutterstock
× កន្លែងលំហែកាយThe Sea View នៅថ្ងៃទី៩ ខែតុលា បានបញ្ជាក់ថា ពាក្យបណ្តឹងពីការវាយតម្លៃអវិជ្ជមានលើវេបសាយដំណើរកម្សាន្ត Tripadvisor នឹងត្រូវទម្លាក់ចោល ប្រសិនបើភ្ញៀវទេសចរអាមេរិក លោក Wesley Barnes សុំទោសជាសាធារណៈ។
លោក Wesley Barnes គឺជាជនជាតិអាមេរិក ដែលធ្វើការនៅថៃ ត្រូវបានកន្លែងលំហែកាយThe Sea View ដាក់ពាក្យប្តឹងពីបទល្មើសបង្ខូចកេរ្តិ៍ឈ្មោះ និងបទល្មើសតាមកុំព្យូទ័រ បន្ទាប់ពីវាយតម្លៃអវិជ្ជមានលើវេបសាយ Trip Advisor។ បន្ទាប់ពីដាក់ពាក្យបណ្តឹង ជនជាតិអាមេរិករូបនេះ ត្រូវប៉ូលិសកោះKoh Chang ឃុំខ្លួនពីរថ្ងៃ មុននឹងដោះលែងឲ្យនៅក្រៅឃុំបណ្តោះអាសន្ន។
យ៉ាងណាក៏ដោយ លោក Barnes និងកន្លែងកម្សាន្ត The Sea View បានឈានដល់ឯកភាពគ្នា បន្ទាប់ពីមានការសម្របសម្រួលជាច្រើនលើក។ តាមរយៈការចុះផ្សាយរបស់ទីភ្នាក់ងារព័ត៌មានReuters កន្លែងកម្សាន្តបានលើកឡើងយ៉ាងដូច្នេះថា៖ «នៅក្រោមលក្ខខណ្ឌ ដែលលោក Barnes បង្ហាញពីភាពស្មោះត្រង់ និងទទួលខុសត្រូវនូវអ្វីដែលបានកើតឡើង សណ្ឋាគារនឹងពេញចិត្ត ទម្លាក់ចោលការចោទប្រកាន់»។
ក្នុងន័យនេះ កន្លែងលំហែកាយ បានទាមទារឲ្យភ្ញៀវទេសចរអាមេរិក ចេញសេចក្តីថ្លែងការណ៍សុំទោសជាសាធារណៈ តាមរយៈការផ្ញើសេចក្តីថ្លែងការណ៍ខាងលើទៅប្រព័ន្ធផ្សព្វផ្សាយ ស្ថានទូតអាមេរិក និងវេបសាយដំណើរកម្សាន្ត Trip Advisor នៅក្នុងខែតុលានេះ។
ជាការឆ្លើយតប លោក Barnes បានឯកភាព ក្នុងការសុំទោសជាសាធារណៈបែបនេះ។ ប្រាប់ទីភ្នាក់ងារព័ត៌មាន Reuters ជនជាតិអាមេរិកដែលរងបទចោទប្រកាន់រូបនេះ បានអះអាងថា លោក កំពុងផ្ញើសេចក្តីថ្លែងការណ៍សុំទោសជាសាធារណៈទៅប្រព័ន្ធផ្សព្វផ្សាយ។
តាមច្បាប់បង្ខូចកេរ្តិ៍ឈ្មោះរបស់ថៃ ការបង្ខូចកេរ្តិ៍ឈ្មោះ អាចនឹងជាប់ពន្ធនាគារហូតដល់ពីរឆ្នាំ និងពិន័យជាប្រាក់រហូតដល់ ៦៣០០ដុល្លារ៕
© រក្សាសិទ្ធិដោយ thmeythmey.com