COVID-19
អន្តរជាតិ
ថៃ ចរចាជាមួយក្រុមហ៊ុនអង់គ្លេស រុស្ស៊ី និងចិនដើម្បីទទួលវ៉ាក់សាំង COVID-19 ឲ្យបានលឿន
វ៉ាក់សាំងជំងឺ COVID-19 ។ រូបភាព៖ Reuters
×![]()
មន្ត្រីសុខាភិបាលថៃ កាលពីថ្ងៃទី៨ ខែតុលា បានអះអាងថា ថៃកំពុងតែចចារជាមួយក្រុមហ៊ុនផលិតវ៉ាក់សាំងមួយចំនួននៅអង់គ្លេស ចិន និងរុស្ស៊ីដើម្បីអាចទទួលបានវ៉ាក់សាំងឲ្យកាន់តែលឿនតាមតែអាចធ្វើទៅបាន។
ថៃ ដែលជាប្រទេសទីមួយមានករណីឆ្លង COVID-19 ក្រៅទឹកដីចិន កំពុងពិភាក្សាជាមួយក្រុមហ៊ុនផលិតវ៉ាក់សាំងមួយចំនួនរបស់ចិន អង់គ្លេស និងរុស្ស៊ីដើម្បីទទួលបានវ៉ាក់សាំងCOVID-19។ លោក Nakorn Premsri អគ្គនាយកវិទ្យាស្ថានវ៉ាក់សាំងជាតិថៃប្រាប់កាសែតថៃបាងកកប៉ុស្តិ៍បែបនេះ។
បើតាមលោក Nakorn រដ្ឋាភិបាលថៃក៏រំពឹងថា នឹងអាចសម្រេចបានកិច្ចព្រមព្រៀងទិញវ៉ាក់សាំងCOVID-19 ដែលកំពុងអភិវឌ្ឍដោយសាកលវិទ្យាល័យ Oxford និងជាមួយអង្គការសុខភាពពិភពលោក (WHO)តាមរយៈកម្មវិធី COVAX ដែលត្រូវបានបង្កើតឡើងដើម្បីជួយទិញវ៉ាក់សាំងសម្រាប់ប្រទេសកំពុងអភិវឌ្ឍផងដែរ។ លោក Nakorn អះអាងថា ក្នុងដំណាក់កាលដំបូង រដ្ឋាភិបាលថៃចង់ទបានវ៉ាក់សាំងក្នុងរយៈពេលពី៣ទៅ៦ខែក្រោយវ៉ាក់សាំងនោះទទួលការអនុញ្ញាតឲ្យផលិត។
«យើងចាំបាច់ត្រូវតែសកម្ម និងស្វះស្វែងរកវិធីដើម្បីទទួលបានវ៉ាក់សាំងឲ្យបានរហ័សបំផុត»។ មន្ត្រីសុខាភិបាលថៃបញ្ជាក់បែបនេះ ហើយបន្ថែមថា ថៃប្រឈមនឹងការផ្ទុះឆ្លងជំងឺ COVID-19 ដោយសារតែករណីឆ្លងខ្លះអាជ្ញាធរសុខាភិបាលមិនអាចស្វែងរកឃើញករណីឆ្លង ដែលបណ្តាលឲ្យប្រជាជនទាំងមូលងាយរងគ្រោះ បើសិនជាមានការឆ្លងរាលដាល។
រដ្ឋាភិបាលថៃ មានគម្រោងបង្កើនថវិកាសម្រាប់កម្មវិធីវ៉ាក់សាំងដល់ទៅជាង៩៦លានដុល្លារ(៣ពាន់លានបាត) ដើម្បីអាចផ្តល់វ៉ាក់សាំង COVID-19 ដល់ប្រជាជន៣៣លាននាក់ ប្រហាក់ប្រហែលនឹង៥០ភាគរយនៃប្រជាជនសរុប។ ចំពោះវ៉ាក់សាំង COVID-19នេះផងដែរ រដ្ឋាភិបាលថៃនឹងផ្ដលដោយឥតគិតថ្លៃ ប៉ុន្តែអាជ្ញាធរសុខាភិបាលនឹងធ្វើបញ្ជីអាទិភាពអ្នកដែលនឹងទទួលវ៉ាក់សាំងជាមុន។
បុគ្គលិកសុខាភិបាល ក៏ដូចជាអ្នកបម្រើសេវាសង្គមនឹងទទួលបានអាទិភាពនេះ ចំណែកអ្នកដែលស្ថិតក្នុងតំបន់ដែលមានករណីឆ្លងជាប្រចាំ នឹងត្រូវទទួលបានវ៉ាក់សាំងតែម្តង។
ក្រៅតែពីស្វះស្វែងរកទិញវ៉ាក់សាំងពីបរទេស ថៃក៏កំពុងអភិវឌ្ឍកម្មវិធីវ៉ាក់សាំង COVID-19 ដោយខ្លួនឯងដែរ។ យោងតាមលោក Nakorn ការធ្វើតេស្តដំណាក់កាលដំបូងលើមនុស្សនឹងត្រូវចាប់ផ្តើមឲ្យបានលឿនបំផុតក្នុងខែធ្នូ។ ការណ៍ដែលថៃ ព្យាយាមអភិវឌ្ឍវ៉ាក់សាំងខ្លួនឯងបែបនេះ គឺបណ្តាលមកពីបទពិសោធនៅពេលផ្ទុះគ្រុនផ្តាសាយជ្រូកកាលពីឆ្នាំ២០០៩ ដែលថៃពុំអាចផ្គត់ផ្គង់វ៉ាក់សាំងគ្រប់គ្រាន់ដល់ប្រជាជនខ្លួន។
គិតត្រឹមថ្ងៃទី៩ ខែតុលានេះ ថៃមានករណីឆ្លងសរុបចំនួន៣,៦២៨ករណី និងស្លាប់ចំនួន៥៩នាក់។ ជំងឺ COVID-19 នេះប៉ះពាល់សេដ្ឋកិច្ចថៃ ដោយបណ្តាលឲ្យការនាំចេញធ្លាក់ចុះ និងបាត់បង់ភ្ញៀវទេសចរ៕
Tag:
ថៃ
COVID-19
© រក្សាសិទ្ធិដោយ thmeythmey.com
