ក្រសួងយុត្តិធម៌ ជ្រើសរើសបានមេធាវីជាង១០០នាក់ ដែលស្ម័គ្រចិត្តចូលរួមការពារក្តី ជូនប្រជាពលរដ្ឋ ដោយមិនយកថវិកា។ ក្រសួងយុត្តិធម៌ បានបញ្ជូនបញ្ជីឈ្មោះមេធាវីទាំងនោះ ដោយភ្ជាប់ជាមួយលេខទូរស័ព្ទរបស់ពួកគាត់ ទៅតាមតុលាការរាជធានី-ខេត្តទូទាំងប្រទេស។
ក្នុងលិខិតចុះថ្ងៃទី៧ ខែតុលា ឆ្នាំ២០២០ ផ្ញើជូនទៅគ្រប់ប្រធានតុលាការរាជធានី-ខេត្ត លោក កើត រិទ្ធ រដ្ឋមន្ត្រីក្រសួងយុត្តិធម៌ សរសេរថា ការជ្រើសរើសមេធាវីស្ម័គចិត្តទាំងនេះ ដើម្បីឆ្លើយតបនឹងតម្រូវការមេធាវី សម្រាប់ការពារក្តីក្នុងសំណុំរឿង ដែលច្បាប់ត្រូវឲ្យមានមេធាវី និងជាពិសេសដើម្បីចូលរួមដោះស្រាយការខ្វះខាតមេធាវីការពារក្តី ក្នុងយុទ្ធនាការដោះស្រាយការកកស្ទះសំណុំរឿងនៅតាមតុលាការរាជធានី-ខេត្ត។
បច្ចុប្បន្ន នៅតាមតុលាការរាជធានី-ខេត្តនីមួយៗ មានការិយាល័យប្រតិភូគណៈមេធាវី។ ប្រតិភូគណៈមេធាវី ដែលជាយន្តការរបស់គណៈមេធាវីកម្ពុជា ត្រូវបានដាក់នៅតាមតុលាការរាជធានី-ខេត្ត ដើម្បីជួយការពារក្តីប្រជាពលរដ្ឋ ដោយមិនយកកម្រៃ។ លោក សួន វិសាល ប្រធានគណៈមេធាវី បានប្រកាសដាក់ប្រតិភូគណៈមេធាវី តាមតុលាការរាជធានី-ខេត្ត កាលពីខែតុលា ឆ្នាំ២០១៧។
លោកមេធាវី ព្រហ្ម វិចិត្រអក្ខរា អគ្គលេខាធិការគណៈមេធាវី ប្រាប់សារព័ត៌មានថ្មីៗ តាមទូរស័ព្ទ នៅថ្ងៃទី៩ ខែតុលា ឆ្នាំ២០២០ ថា បច្ចុប្បន្ន មេធាវី ដែលជាប្រតិភូគណៈមេធាវី នៅតាមតុលាការរាជធានី-ខេត្ត មានប្រមាណពី៣០នាក់ទៅ៤០នាក់។ យ៉ាងណា លោក អះអាងថា ពេលខ្លះ មានមេធាវីដទៃទៀត មិនមែនជាប្រតិភូគណៈមេធាវី តែបានស្ម័គ្រចិត្តនិងដាក់សំណើទៅកាន់ប្រតិភូគណៈមេធាវី ដើម្បីសុំចូលរួមការពារក្តីលើសំណុំរឿងណាមួយ ដោយមិនយកកម្រៃ។
លោកមេធាវី ព្រហ្ម វិច្រិអក្ខរា ថ្លែងថា៖«ក្នុងច្បាប់ មេធាវីទាំងអស់មានកាតព្វកិច្ច ត្រូវជួយជនក្រីក្រ។ អ៊ីចឹង មេធាវីខ្លះ គាត់មានស្មារតីស្រឡាញ់វិជ្ជាជីវៈ ហើយគាត់ចូលចិត្តជួយចែករំលែកដល់ជនក្រីក្រ គឺគាត់ទៅចូលរួមជួយទៅ តាមការជាក់ស្តែង»។
ពេលលោក កើត រិទ្ធ ឡើងជារដ្ឋមន្ត្រីក្រសួងយុត្តិធម៌ លោក បានប្រកាសដាក់ចេញយុទ្ធនាការដោះស្រាយបញ្ហាកកស្ទះសំណុំរឿងតាមតុលាការ។ ដូច្នេះ ប្រតិភូគណៈមេធាវី មិនមែនត្រឹមតែជួយការពារក្តីដល់ជនក្រីក្រនោះទេ តែក៏មានចំណែកចូលរួមក្នុងយុទ្ធនាការដោះស្រាយការកកស្ទះសំណុំរឿងនៅតាមតុលាការដែរ។
នៅខែមិថុនា ឆ្នាំ២០២០ គណៈមេធាវីកម្ពុជា បានអំពាវនាវដល់មេធាវីជាសមាជិកខ្លួន និងមេធាវីកំពុងបំពេញកម្មសិក្សាទាំងអស់ ឲ្យស្ម័គ្រចិត្តជួយការពារសិទ្ធិជនត្រូវចោទឬជនជាប់ចោទ ដែលច្បាប់តម្រូវឲ្យមានមេធាវី។ ការអំពាវនាវរបស់គណៈមេធាវី គឺដើម្បីចូលរួមជាមួយក្រសួងយុត្តិធម៌ ក្នុងយុទ្ធនាការដោះស្រាយការកកស្ទះសំណុំរឿងនៅតាមតុលាការរាជធានី-ខេត្ត។
លោក ជិន ម៉ាលីន រដ្ឋលេខាធិការនិងជាអ្នកនាំពាក្យក្រសួងយុត្តិធម៌ លើកឡើងថា ការជ្រើសរើសមេធាវីស្ម័គ្រចិត្តជាង១០០នាក់នាពេលនេះ គឺជាយន្តការរបស់ក្រសួងយុត្តិធម៌ ដើម្បីបំពេញបន្ថែមលើយន្តការរបស់គណៈមេធាវី ដែលមានស្រាប់ គឺប្រតិភូគណៈមេធាវីនៅតាមតុលាការ។ ក្នុងកិច្ចសម្ភាសជាមួយសារព័ត៌ថ្មីៗ លោក បញ្ជាក់ថា៖«យន្តការ [របស់គណៈមេធាវី] ហ្នឹង អត់គ្រប់គ្រាន់ អត់ឆ្លើយតបនឹងយុទ្ធនាការរបស់យើង [ក្នុងការដោះស្រាយបញ្ហាកកស្ទះសំណុំរឿង]។ […] បើប្រើយន្តការមានស្រាប់រាល់ថ្ងៃ គឺថា មិនអាចទៅលឿនបានទេ»។
អ្នកនាំពាក្យក្រសួងយុត្តិធម៌ បន្តថា មេធាវីស្ម័គ្រចិត្តទាំអស់នោះ ដែលបានមកពីការជ្រើសរើសរបស់ក្រសួងយុត្តិធម៌ មិនមានការិយាល័ប្រចាំការនៅតាមតុលាការ ដូចមេធាវីស្ម័គ្រចិត្ត ជាប្រតិភូគណៈមេធាវីឡើយ។ ប៉ុន្តែ លោក ពន្យល់ថា មេធាវីពីក្រសួងយុត្តិធម៌និងមេធាវីពីគណៈមេធាវី បំពេញការងារដូចគ្នា គឺជួយការពារក្តីជូនប្រជាពលរដ្ឋ ដោយមិនយកម្រៃ និងជួយចូលរួមកាត់បន្ថយការកកស្ទះសំណុំរឿងតាមតុលាការ។
អ្នកនាំពាក្យ បរិយាថា មានសំណុំរឿងខ្លះ ដូជា សំណុំរឿងជាបទឧក្រិដ្ឋ និងសំណុំរឿងពាក់ព័ន្ធនឹងអនីតិជន ជាដើម គឺតម្រូវឲ្យមានមេធាវី ទើបអាចឈានដល់បើកសវនាការជំនុំជម្រះបាន។ លោក និយាយថា៖«អ៊ីចឹង មេធាវីរបស់យើង ជួយចូលរួមក្នុងដំណើរការសំណុំរឿងទាំងអស់ហ្នឹង ដើម្បីកុំឲ្យមានការកកស្ទះ»។
កាលពីខែកក្កដា ឆ្នាំ២០២០ ក្រសួងយុត្តិធម៌ បង្ហាញលទ្ធផលការងារថា មានសំណុំរឿងជាង៣,៤ពាន់ករណី ដែលត្រូវបានដោះស្រាយ។ សំណុំរឿងជាង៣,៤ករណីនេះ គឺស្មើនឹងប្រមាណ២៧ភាគរយ នៃសំណុំរឿងសរុបជិត៤ម៉ឺន ដែលកកស្ទះនៅតាមតុលាការ។ ក្រសួងយុត្តិធម៌ រំពឹងថា នៅដំណាច់ឆ្នាំ២០២០នេះ សំណុំរឿងទាំងអស់ ដែលកំពុងកកស្ទះនៅតាមតុលាការ នឹងត្រូវបានដោះស្រាយទាំងស្រុង៕