ជាតិ
សង្គមជាតិ
រូបពីក្រសួងធនធានទឹក
×![]()
ភ្នំពេញ៖ គិតចាប់ពីថ្ងៃទី១ដល់ថ្ងៃទី១១ ខែតុលា ឆ្នាំ២០២០នេះ ទឹកជំនន់នៅតាមបណ្តាខេត្តមួយចំនួនបានបណ្តាលឲ្យមនុស្សយ៉ាងតិច១០នាក់ បានបាត់បង់ជីវិត។ នេះបើតាមលោក ឃុន សុខា អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ ដែលបានប្រាប់អ្នកសារព័ត៌មានថ្មីៗតាមទូរសព្ទនាថ្ងៃទី១១ ខែតុលា។
លោក ឃុន សុខា មិនទាន់អាចបញ្ជាក់នោះទេថា បាត់បង់ជីវិតទាំងនោះ ស្ថិតក្នុងខេត្តណាខ្លះ ដោយលោក អះអាងថា លោក កំពុងតែស្រង់ព័ត៌មានបន្ថែមជុំវិញករណីនេះ។ ប៉ុន្តែ លោកបានទទួលព័ត៌មានថា ខេត្តបន្ទាយមានជ័យមាន អ្នកស្លាប់៣នាក់ ដោយសារគ្រោះទឹកជំនន់។
លោក ឡៅ សំពរ អនុប្រធានមន្ទីរព័ត៌មានខេត្តបន្ទាយមានជ័យបានបញ្ជាក់ថា អ្នកស្លាប់ទាំង៣នាក់នោះ គឺមានក្មេងស្រីអាយុជាង១០ឆ្នាំម្នាក់ ស្លាប់ដោយសារលង់ទឹក និងមនុស្សចាស់២នាក់ ដោយម្នាក់លង់ទឹកស្លាប់ព្រោះមានសតិមិនល្អ និងម្នាក់ទៀតលង់ទឹកស្លាប់ ពេលចុះទៅបង់ត្រី។
លោក ឃុន សុខា បានបញ្ជាក់ថា គិតត្រឹមថ្ងៃទី១១ ខែតុលានេះ ស្ថានភាពទឹកជំនន់នៅខេត្តបាត់ដំបង ពោធិ៍សាត់ កំពង់ចាម និងបន្ទាយមានជ័យ ចាប់ផ្តើមស្រកជាបណ្តើរៗហើយ។ ចំណែកនៅខេត្តប៉ៃលិននៅមិនទាន់ស្រកនៅឡើយទេ។
លោក សឿម ប៊ុនរិទ្ធិ អភិបាលរងខេត្តបាត់ដំបង បានបញ្ជាក់ថា ទឹកជំនន់នៅស្រុកសំឡូត និងស្រុករតនមណ្ឌល ខេត្តបាត់ដំបង បានស្រកខ្លះៗហើយ នៅឡើយតែនៅស្ទឹងសង្កែទេ ដែលកំពុងតែឡើងក្នុងកម្រិតប្រកាសអាសន្នហើយ។ បើតាមលោកអភិបាលរងខេត្តរូបនេះ ទឹកភ្លៀងរយៈមួយសប្តាហ៍កន្លងទៅនេះ បានបណ្តាលឲ្យទឹកនៅស្ទឹងសង្កែឡើងខ្ពស់ ដោយមិនអនុញ្ញាតឲ្យយានយន្តធ្វើដំណើរឆ្លងកាត់ឡើយ ដើម្បីជៀសវាងគ្រោះថ្នាក់ជាយថាហេតុ។
ចំណែកស្ថានភាពទឹកជំនន់នៅខេត្តបន្ទាយមានជ័យមិនទាន់ជាធ្ងន់ធ្ងរនៅឡើយទេ។ នេះបើតាមលោក ឡៅ សំពរ អនុប្រធានមន្ទីរព័ត៌មានខេត្តបន្ទាយមានជ័យ ដោយលោកមានប្រសាសន៍ថា ទឹកជំនន់នៅខេត្តបន្ទាយមានជ័យគឺបណ្តាលមកពីការរងឥទ្ធិពលទឹកជំនន់ពីប្រទេសថៃមកដែលប៉ះពាល់ធ្ងន់ធ្ងរដល់ក្រុង១ និងស្រុក១ គឺក្រុងសិរីសោភ័ណ និងស្រុកអង្គរបុរី។
អនុប្រធានមន្ទីរព័ត៌មាន រូបនេះរៀបរាប់ដូច្នេះថា៖«ក្រុងទាំងពីរនេះមិនទាន់ជាមានបញ្ហាធ្ងន់ធ្ងរនៅឡើយទេ។ មានតែប្រជាពលរដ្ឋដែលរស់នៅតាមដងស្ទឹងដែលប៉ះពាល់ ដោយផ្ទះសម្បែង ស្រែចម្ការ និងដំណាំផ្សេងៗ គឺត្រូវខូចខាត។ ពលរដ្ឋខ្លះបាននាំគ្នាដកដំឡូង ដើម្បីស្រោចស្រង់ដំណាំរបស់ពួកគេ»៕
Tag:
ទឹកជំនន់
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
4 ថ្ងៃ
