COVID-19
ជាតិ
«បាគងភូមិខ្ញុំ» សហគមន៍នៃសក្តានុពលទេសចរណ៍ថ្មីនៅសៀមរាប
× «សហគមន៍បាគងភូមិខ្ញុំ» ជាផលិតផលទេសចរណ៍ថ្មីមួយដែល អាចបម្រើទេសចរបានគ្រប់សេចក្ដីត្រូវការ ទាំងទេសចរណ៍វប្បធម៌ ទេសចរណ៍ធម្មជាតិ និងទេសចរណ៍កែច្នៃ។ ស្របតាមគោលនយោបាយទេសចរណ៍ និងចក្ខុវិស័យរបស់រាជរដ្ឋាភិបាល ចង់ឲ្យមានផលិតផលទេសចរណ៍ថ្មីលើដីសៀមរាប លើសពីតំបន់បេតិកភណ្ឌពិភពលោក ទើបមានការអភិវឌ្ឍ «សហគមន៍បាគងភូមិខ្ញុំ» ឲ្យកាន់តែមានភាពទាក់ទាញឡើង។
«សហគមន៍បាគងភូមិខ្ញុំ» បានបើកដំណើរការឡើងវិញក្នុងដំណាក់កាលកូវីដ-១៩ ដើម្បីទទួលទេសចរក្នុងស្រុករយៈពេលប្រមាណជិតមួយខែ ហើយមានការគាំទ្រជាខ្លាំងពីសំណាក់ភ្ញៀវទេសចរ ដែលបានរួមចំណែកសេដ្ឋកិច្ចជាតិមួយចំណែកផងដែរ ក្នុងដំណាក់កាលវិបត្តិកូវីដ-១៩។ នេះបើតាមទំព័រហ្វសប៊ុករបស់ក្រសួងទេសចរណ៍។
ក្នុងពិធីសំណេះសំណាលជាមួយប្រជាជនក្នុង «សហគមន៍បាគងភូមិខ្ញុំ» កាលពីថ្ងៃទី២ ខែតុលា ឆ្នាំ២០២០ លោក ថោង ខុន រដ្ឋមន្ត្រីក្រសួងទេសចរណ៍ បានបង្ហាញការពេញចិត្តយ៉ាងខ្លាំងក្នុងការជំរុញទេសចរណ៍ក្នុងសហគមន៍បាគងភូមិខ្ញុំ និងបានលើកឡើងដូច្នេះថា៖ «ដើម្បីឱ្យសហគមន៍មានភាពស្ថិតស្ថេរទៅបាន ចាំបាច់ត្រូវមានការចូលរួមពីប្រជាពលរដ្ឋឱ្យបានច្រើន និងត្រូវបែកចែកចំណូលប្រកបដោយសមធម៌ទៅឱ្យពួកគាត់ មានន័យថា អ្នកធ្វើកិច្ចការងារណា ត្រូវតែទទទួលបានប្រាក់ចំណូលពីការងារនោះ ដោយអ្នកធ្វើតិចបានតិច ធ្វើច្រើនបានច្រើន។ នៅពេលដែលសហគមន៍អនុវត្តការបែងចែកនេះត្រឹមត្រូវ នោះប្រជាពលរដ្ឋនឹងទទួលបានចំណូលសមរម្យ អាចដោះស្រាយជីវភាពគ្រួសារបាន ប្រជាពលរដ្ឋនឹងមិនចំណាកស្រុកទៅណាឡើយ ហើយពួកគាត់នឹងនៅបម្រើការក្នុងវិស័យទេសចរណ៍ជាមួយសហគមន៍ ប្រកបដោយភាពរីករាយសុខដុមរមនា»។
លោក_ថោង_ខុន_រដ្ឋមន្រ្តីក្រសួងទេសចរណ៍ក្នុងពិធីសំណេះសំណាលប្រជាជន
លោក ថោង ខុន បានបន្តទៀតថា ភាពរួសរាយរាក់ទាក់ និងបម្រើរសេវាកម្មទេសចរណ៍បានល្អ គឺជាផ្នែកមួយដែលចងចិត្តភ្ញៀវទេសចរ ឲ្យជាប់និងសហគមន៍មួយនេះ។ លោកក៏បានជំរុញឲ្យមាន ការបណ្តុះបណ្ដាលប្រជាជនក្នុងមូលដ្ឋានពី ការទទួលបដិសណ្ឋារកិច្ច ការបម្រើសេវាកម្មផ្សេងៗ និងគុណភាពសេវាកម្ម។ បញ្ហាអនាម័យ និងបរិស្ថាន ក៏ត្រូវគិតគូរឱ្យបានហ្មត់ចត់ផងដែរ មានន័យថា ក្នុងសហគមន៍មិនត្រូវមានសំរាម ត្រូវមានបរិស្ថានស្អាត ម្ហូបអាហារ និងរបស់របរប្រើប្រាស់ត្រូវមានអនាម័យជានិច្ច។ នេះជាការបញ្ជាក់បន្ថែមរបស់ រដ្ឋមន្ត្រីក្រសួងទេសចរណ៍។
លោក ថោង ខុន ក៏បានស្នើដល់អាជ្ញាធរជាតិអប្សរា រដ្ឋបាលខេត្តសៀមរាប និងមន្ទីរទេសចរណ៍ខេត្ត គប្បីបន្តការជួយគាំទ្រដល់សហគមន៍បាគងភូមិខ្ញុំនេះ ដើម្បីឱ្យផលិតផលទេសចរណ៍ដ៏ល្អនេះកាន់តែមានការរីកចម្រើនទៅមុខ និងមានការអភិវឌ្ឍន៍ប្រកបដោយនិរន្តរភាព និងការទទួលខុសត្រូវខ្ពស់ ពោលគឺត្រូវដើរឱ្យស្រប នឹងទស្សនទាន «ការអភិវឌ្ឍបម្រើឱ្យការអភិរក្ស ការអភិរក្សបម្រើឱ្យការអភិវឌ្ឍ»៕
Tag:
ផលិតផលទេសចរណ៍ថ្មី
សហគមន៍បាគង
ទេសចរណ៍
ThmeyThmey25
© រក្សាសិទ្ធិដោយ thmeythmey.com