អន្តរជាតិ
ប្រធានាធិបតីចិន ណែនាំមន្ត្រីវ័យក្មេងពង្រឹងសមត្ថភាពឲ្យពិតប្រាកដដើម្បីដោះស្រាយបញ្ហាពិភពលោកថ្មីដែលពិបាកព្យាករ
× ប្រធានាធិបតី និងអគ្គលេខាធិការបក្សកុម្មុយនីស្តចិន លោក ស៊ី ជិនពីង បានណែនាំឲ្យមន្ត្រីវ័យក្មេង ដែលជាអ្នកបន្តដឹកនាំប្រទេសជំនាន់ក្រោយ ពង្រឹងសមត្ថភាពឲ្យក្លាយជាអ្នកចេះដឹងពិតប្រាកដ និងត្រូវប្រកាន់គោលការណ៍ឲ្យបានខ្ជាប់ខ្ជួន ដើម្បីជាចលករក្នុងការចូលរួមអភិវឌ្ឍន៍ប្រទេស ក្នុងបរិការណ៍នៃការផ្លាស់ប្តូរដោយឥតឈប់របស់ពិភពលោក និងបញ្ហាដែលអាចកើតឡើងដោយមិនមានការព្រាងទុក។
នាកម្មវិធីបណ្តុះបណ្តាលអភិបាលកិច្ចជាតិរបស់បក្សកុម្មុយនីស្តចិននៅថ្ងៃ១០ តុលា លោកប្រធានាធិបតី ស៊ី ជិនពីង បានលើកឡើងថា កំណត់ត្រាប្រវត្តិសាស្ត្រល្អៗ ត្រូវបានបង្កើតឡើងតាមរយៈការដោះស្រាយបញ្ហាចំពោះមុខដោយរលូន។ នៅចំពោះមុខស្ថានភាពដ៏លំបាកបច្ចុប្បន្ន លោកប្រធានាធិបតី បានទទូចជាបន្ទាន់ឲ្យមន្ត្រីវ័យក្មេង ពង្រឹងសមត្ថភាពក្នុងការដោះស្រាយបញ្ហា ដែលនេះ ក៏ជាផ្នែកមួយជួយឲ្យមន្ត្រីវ័យក្មេងទាំងនេះ មានឱកាសលូតលាស់ទៅមុខផងដែរ។ នេះបើយោងតាមការចុះផ្សាយរបស់ភ្នាក់ងារព័ត៌មាន Xinhua។
តាមលោកប្រធានាធិបតី និងជាប្រមុខបក្សកុម្មុយនីស្តផង មន្ត្រីវ័យក្មេងត្រូវពង្រឹងសមត្ថភាពនយោបាយ និងសមត្ថភាពដទៃផ្សេងទៀត ដូចជាការស្រាវជ្រាវ ការវិភាគលើការសម្រេចចិត្តបែបវិទ្យាសាស្ត្រ, កំណែទម្រង់បែបទំនើបស៊ីជម្រៅ, ការឆ្លើយតបបន្ទាន់, ការផ្សារភ្ជាប់ទំនាក់ទំនងជាមួយនឹងប្រជាជន និងការអនុវត្តគោលនយោបាយជាដើម។
លោក ថ្លែងថា មន្ត្រីត្រូវតែហ៊ានប្រឈមនឹងបញ្ហា, មានឆន្ទៈក្នុងការចាត់វិធានការ និងមិនរួញរាក្នុងការតទល់ជាមួយនឹងស្ថានភាពលំបាក។ លោក បានក្រើនរម្លឹកដល់មន្ត្រីវ័យក្មេងទាំងនេះផងដែរថា ពិភពលោករាល់ថ្ងៃនេះ កំពុងតែមានការផ្លាស់ប្តូរក្នុងបរិការណ៍មួយថ្មីដែលមិនធ្លាប់ឃើញជាមួយនឹងអស្ថិរភាព និងភាពមិនច្បាស់លាស់។
ស្របពេលដែលចិន ក្លាយជាសណ្តាប់ធ្នាប់ថ្មីរបស់ពិភពលោក ហើយក៏មានគូប្រជែងច្រើនក្នុងឆាកអន្តរជាតិផងនោះ លោកប្រធានាធិបតី ស៊ី ជិនពីង បានស្នើឲ្យមន្ត្រីវ័យក្មេងធានាឲ្យបានសមត្ថភាពពិតប្រាកដ, បង្ហាញភាពនាំមុខក្នុងការចាត់វិធានការដោះស្រាយបញ្ហា និងពិសេសនោះបង្ហាញនូវមុខមាត់ថ្មីក្នុងការដោះស្រាយបញ្ហាលំបាក ដូចជាបញ្ហាដែលកំពុងតែរងការគំរាមកំហែងពីវីរុស Covid-19 ជាដើម។
អ្វីដែលប្រមុខដឹកនាំកំពូលចិនរូបនេះ ចង់ឃើញពីអ្នកបន្តវេនជំនាន់ក្រោយផងដែរនោះ គឺជាការប្រកៀកស្មាគ្នាក្នុងការទទួលខុសត្រូវ និងមានការតាំងចិត្តមុតមាំក្នុងអនុវត្តគោលការណ៍សង្គមនិយមរបស់ចិនក្នុងសករាជថ្មី ដែលជាសករាជមួយ បង្ហាញថា ចិនអាចធ្វើអ្វីបានគ្រប់បែបយ៉ាង៕
© រក្សាសិទ្ធិដោយ thmeythmey.com