សង្គមអន្តរជាតិ
អន្តរជាតិ
ឱកាសបុណ្យជាតិ៖ ប្រធានាធិបតីតៃវ៉ាន់ ប្រកាសជំហរទន់ផង និងរឹងផងទៅកាន់ចិន
× ប្រធានាធិបតីតៃវ៉ាន់ លោកស្រី Tsai Ing-wen បានបង្ហាញក្តីរំពឹងថា រដ្ឋាភិបាលចិន នឹងផ្លាស់ប្តូរគោលជំហរ និងឥរិយាបថតឹងរឹងជាមួយនឹងតៃវ៉ាន់ ដើម្បីរក្សាស្ថិរភាពនៅក្នុងតំបន់ ក៏ដូចជាដោះស្រាយបញ្ហាប្រឈមនៅក្នុងតំបន់ផង។ សម្រាប់តៃវ៉ាន់ ភាពតានតឹងរវាងច្រកភាគីទាំងពីរ ក៏ដូចជានៅក្នុងតំបន់ មិនអាចថមថយបានដោយមិនមានការចូលរួមពីបណ្តាភាគីពាក់ព័ន្ធបានឡើយ។
តាមរយៈសុន្ទរកថាប្រចាំឆ្នាំនាឱកាសបុណ្យជាតិ នៅថ្ងៃ១០ តុលា លោកស្រីប្រធានាធិបតី Tsai Ing-wen បានលើកឡើងថា ស្របពេលដែលប្រទេសនៅក្នុងតំបន់ និងជុំវិញពិភពលោក មានការព្រួយបារម្ភពីការពង្រីកអំណាចរបស់ចិន តៃវ៉ាន់ សង្ឃឹមថា ចិន នឹងផ្លាស់ប្តូរជំហររឹងត្អឹងមួយនេះ។ នេះបើយោងតាមការចុះផ្សាយរបស់សារព័ត៌មាន Japan Times។
ថ្លែងបែបនេះរួចហើយ លោកស្រីប្រធានាធិបតី បានធ្វើការកំណត់សម្គាល់ពីសុន្ទរកថារបស់លោកប្រធានាធិបតីចិន Xi Jinping ដែលបានថ្លែងក្នុងកិច្ចប្រជុំរបស់មហាសន្និបាតអង្គការសហប្រជាជាតិ ដែលទើបតែបញ្ចប់កាលពីពេលថ្មីៗនេះ ថា ចិន មិនដែលធ្វើអនុត្តរភាព ពង្រីកអំណាច និងបង្កើនឥទ្ធិពលរបស់ខ្លួនទៅកាន់ពិភពលោកនោះទេ។
តាមប្រភពព័ត៌មានដដែល លោកស្រីប្រធានាធិបតី គូសបញ្ជាក់ថា ប្រសិនបើក្រុងប៉េកាំង ស្តាប់ជំហរនិងចេតនារបស់តៃវ៉ាន់បន្តិច ប្តូរជំហរក្នុងការគ្រប់គ្រងទំនាក់ទំនងភាគីទាំងពីរ ហើយងាកមកការចរចាសន្តិភាពវិញនោះ លោកស្រី ជឿជាក់ថា ភាពតានតឹងនៅក្នុងតំបន់ នឹងត្រូវបានដោះស្រាយយ៉ាងពិតប្រាកដ។ លោកស្រី បន្ថែមថា បើចិន មានឆន្ទៈក្នុងការធ្វើឲ្យមានភាពល្អប្រសើររវាងគ្នាជាមួយនឹងការរក្សាភាពស្មើមុខស្មើមាត់គ្នាផងនោះ តៃវ៉ាន់ នឹងធ្វើកិច្ចសន្ទនាសន្តិវិធីជាមួយនឹងចិន។
យ៉ាងណាក៏ដោយទន្ទឹមនឹងការប្រកាសជំហរដាក់ខ្លួនបន្តិចនេះ ប្រមុខដឹកនាំកំពូលជានារីរបស់តៃវ៉ាន់រូបនេះ ក៏បានប្រកាសជំហរព្រមគ្នាផងដែរថា ភាពតានតឹង ដែលបង្កឡើងដោយភាគីម្ខាងទៀតនាពេលថ្មីៗនេះ មិនបានធ្វើឲ្យតៃវ៉ាន់ភ័យព្រួយនោះទេ។ លោកស្រី បានប្រកាសថា តៃវ៉ាន់ នឹងនៅតែបន្តជំរុញកំណើនសេដ្ឋកិច្ច និងពង្រឹងវិស័យការពារជាតិ ដើម្បីទប់ស្កាត់ការគំរាមកំហែងពីខាងក្រៅ៕
© រក្សាសិទ្ធិដោយ thmeythmey.com