បណ្ដាញអ្នកវិនិយោគកម្ពុជា Cambodian Angel Investors Network (CAIN) បានបើកសម្ពោធជាផ្លូវការ កាលពីព្រឹកថ្ងៃសៅរ៍ ទី១០ ខែតុលា នៅសណ្ឋាគាភ្នំពេញ។ កម្មវិធីនេះ មានការចូលរួមពីអ្នកវិនិយោគ សមាជិកសមាគមអ្នកវិនិយោគកម្ពុជា(CiC) សមាជិកCAIN និងភ្ញៀវកិត្តិយសជាច្រើនរូបទៀត។
Angel Investor គឺជាបុគ្គលមានទ្រព្យសម្បត្តិ ដែលវិនិយោគដោយប្រើលុយផ្ទាល់ខ្លួន និងជាធម្មតាវិនិយោគទៅលើ ធុរកិច្ចបង្កើតថ្មី និងអាជីវកម្មដែលនៅដំណាក់កាលដំបូង ក្នុងទំហំវិនិយោគតូច បើប្រៀបធៀបជាមួយទំហំវិនិយោគ ដែលវិនិយោគិនជាស្ថាប័នភាគច្រើន វិនិយោគ។
សព្វថ្ងៃនេះ ធុរកិច្ចបង្កើតថ្មី និងសហគ្រាសធុនតូច និងមធ្យម ត្រូវការការច្នៃប្រឌិត ដើម្បីប្រកួតប្រជែងក្នុងទីផ្សារ។ ដូច្នេះ ពួកគេត្រូវការជំនាញមួយចំនួន ដើម្បីអាចពាំនាំគំនិតរបស់ពួកគេ ចូលទៅក្នុងទីផ្សារ។ ដំបូងបំផុត ពួកគេត្រូវការហិរញ្ញវត្ថុ ដើម្បីពង្រីកអាជីវកម្មឱ្យបានលឿន តាមដែលអាចធ្វើទៅបាន។
ប្រភពហិរញ្ញវត្ថុល្អបំផុត សម្រាប់ធុរកិច្ចបង្កើតថ្មី និងសហគ្រាសធុនតូច និងមធ្យម គឺបានមកពី Angel Investors ដោយសារតែពួកគេផ្តល់ហិរញ្ញវត្ថុបែបឆ្លាតវៃ ពោលគឺក្រៅពីហិរញ្ញវត្ថុ ពួកគេក៏ចែករំលែកចំណេះដឹងពីវិស័យ និងបណ្តាញរបស់ពួកគេ ហើយផ្តល់ការណែនាំដល់អាជីវកម្មដែលពួកគេវិនិយោគទៀតផង។
តាមការអង្កេត នៅក្នុងប្រព័ន្ធអេកូឡូស៊ី នៃសហគ្រិនភាពរបស់ប្រទេសកម្ពុជា យើងឃើញថាវា នៅមានចន្លោះខ្វះខាតច្រើន ដូចជាការខ្វះខាតនៃ Angel Investors, ក្រុម ឬបណ្តាញAngel Investors និងកម្មវីធីបណ្តុះបណ្តាលដល់អ្នកវិនិយោគ។ បន្ថែមពីនេះទៀត ធុរកិច្ចបង្កើតថ្មី និងសហគ្រាសធុនតូច និងមធ្យម តែងតែមានភាពលំបាក ក្នុងការស្វែងរក Angel Investors។ ចំណែក Angel Investors ក៏ពិបាករកសហគ្រាសធុនតូច និងមធ្យម ដែលមានសក្តានុពល សម្រាប់វិនិយោគដែរ។ ដូច្នេះហើយ CAIN បានបង្កើតឡើង ដើម្បីបំពេញបន្ថែមភាពខ្វះខាតទាំងអស់នេះ។
CAIN គឺជាបណ្តាញអ្នកវិនិយោគ Angel Investors ដែលបានបង្កើតឡើង ដោយសមាគមអ្នកវិនិយោគកម្ពុជា (CiC) ដើម្បីជំរុញការអភិវឌ្ឍនៃការវិនិយោគរបស់ Angel Investors។ ការក្លាយជាសមាជិករបស់ CAIN សមាជិកទាំងអស់ មានឱកាសវិនិយោគក្នុងច្រើនរូបភាពដូចជាការវិនិយោគដោយផ្ទាល់ (ជាបុគ្គលឬជាក្រុម) ទៅធុរកិច្ចបង្កើតថ្មី និងសហគ្រាសធុនតូច និងមធ្យម ដែលមានសក្តានុពល ការវិនិយោគរួមគ្នា ជាមួយសមាគមអ្នកវិនិយោគកម្ពុជា (CiC) និងការវិនិយោគទៅក្រៅប្រទេស។
កម្មវិធីបណ្តុះបណ្តាល CAIN Program មានរយៈពេល ៥ខែ ក្នុងនោះមានសកម្មភាពសំខាន់ៗដូចជា
១. សិក្ខាសាលាណែនាំពីទិដ្ឋិភាពទូទៅ ស្ដីពីការវិនិយោគ
២. ការស្ដាប់បទបង្ហាញគំនិតអាជីវកម្មពីធុរកិច្ចបង្កើតថ្មី និងសហគ្រាសធុនតូច និងមធ្យមដែលមានសក្តានុពល
៣. សិក្ខាសាលា (reflection workshops)
៤. សិក្ខាសាលាផ្សេងទៀត ដូចជាកិច្ចពិភាក្សាពីការវិនិយោគដែលមានវាគ្មិនមកពីក្រៅប្រទេស
៥. ការចូលរួមជាមួយសកម្មភាពសំខាន់ៗ របស់កម្មវិធីពន្លឿនការអភិវឌ្ឍអាជីវកម្ម BIO Accelerator Program និងការបោះជំរំ នៅតាមខេត្តជាដើម។
ការបណ្តុះបណ្តាល គឺមានការសហការ ជាមួយសមាគមអ្នកវិនិយោគកម្ពុជា(CiC) កម្មវិធីពន្លឿនការអភិវឌ្ឍអាជីវកម្ម BIO Accelerator Program, ដៃគូក្នុងស្រុក និងអន្តរជាតិ ដូចជាសម្ព័ន្ធ ASEAN Angel Alliance (AAA) និងបណ្តាញ Angel Investors ដទៃទៀតក្នុងអាស៊ាន។ ដូច្នេះហើយ CAIN ត្រូវបានគេរំពឹងថា នឹងរីកចម្រើនទៅជាបណ្តាញ Angel Investors ធំជាងគេមួយនៅកម្ពុជា និងមាននិរន្តរភាព។
តើ CAIN កំពុងតែស្វែងរកបុគ្គលប្រភេទណា ដើម្បីចូលរួមកម្មវិធី? CAIN កំពុងតែស្វែងរកបុគ្គល ដែលមានចំណេះដឹងមូលដ្ឋាន ពីការគ្រប់គ្រងអាជីវកម្ម និងការយល់ដឹងពីហានិភ័យរបស់ការវិនិយោគ និងមានឆន្ទៈ ក្នុងការវិនិយោគក្នុងអាជីវកម្ម។
នៅក្នុងឱកាសនៃការបើកសម្ពោធជាផ្លូវនេះដែរ ក៏មានការធ្វើបទបង្ហាញ គំនិតអាជីវកម្មពីសហគ្រាសធុនតូច និងមធ្យម ចំនួនបីរួមមាន MUCH Mobile Health Care, WORKINGNA និង SCW3PS ក្នុងបំណងដើម្បីស្វែងរកវិនិយោគិន សម្រាប់អាជីវកម្មរបស់ពួកគាត់៕
(អត្ថបទពាណិជ្ជកម្ម)