COVID-19
អន្តរជាតិ
ប្រធានាធិបតី ដូណាល់ ត្រាំ ។ រូបភាព៖ AFP
×![]()
ប្រធានាធិបតីអាមេរិក ដូណាល់ ត្រាំ នៅថ្ងៃទី ១១ ខែតុលា បានប្រកាសថា លោកមានប្រព័ន្ធស៊ាំប្រឆាំងជំងឺកូវីដ-១៩ ហើយត្រៀមខ្លួនសម្រាប់ធ្វើឃោសនារកសំឡេងឆ្នោត ខណៈការបោះឆ្នោតចូលដល់សប្ដាហ៍សំខាន់។ 
ក្រុមគ្រូពេទ្យរបស់លោក ដូណាល់ ត្រាំ នៅថ្ងៃទី១០ ខែតុលា បានអះអាងថា លោកត្រាំ អាចវិលត្រលប់ទៅធ្វើយុទ្ធនាការបោះឆ្នោតវិញ បន្ទាប់ពីបញ្ជាក់ថាលោក ត្រាំ លែងមានហានិភ័យចម្លងកូវីដ-១៩ទៀតហើយ។ យ៉ាងណាមិញ លោកប្រធានាធិបតីពុំទាន់ត្រូវបានបង្ហាញលទ្ធផលតេស្តអវិជ្ជមានសម្រាប់ជំងឺកូវីដ-១៩នៅឡើយទេ ហើយការអះអាងថា លោកមានប្រព័ន្ធស៊ាំប្រឆាំងជំងឺនេះក៏មិនអាចការបញ្ជាក់ណាមួយផងដែរ។
ប្រាប់ទូរទស្សន៍អាមេរិក Fox News លោកប្រធានាធិបតី ដូណាល់ ត្រាំ បានអះអាងដូច្នេះថា៖«តាមមើលទៅដូចជា ខ្ញុំមានប្រព័ន្ធស៊ាំប្រឆាំង [កូវីដ-១៩]»។ លោកពន្យល់ថា លោកអាចមានប្រព័ន្ធស៊ាំរយៈពេលវែង ខ្លី ឬមួយជីវិត ប៉ុន្តែលោកក៏មិនដឹងច្បាស់ដែរ។
លោកបន្តនិយាយដៀមដាមគូប្រជែងបក្សប្រជាធិបតេយ្យរបស់លោក ចូ បៃឌិន ដែលអនុវត្តវិធានការបង្ការជំងឺកូវីដ-១៩ ម៉ឺងម៉ាត់អំឡុងធ្វើឃោសនារកសំឡេងឆ្នោតក្នុងបរិបទកូវីដ-១៩ ។ លោកដោយលើកឡើងថា ពលរដ្ឋអាមេរិកមានប្រធានាធិបតីម្នាក់ដែលមិនចេះពួនសម្ងំតែក្នុងបន្ទប់ក្រោមដី។
កាលពីថ្ងៃទី១១ ខែតុលា បណ្ដាញសង្គម Twitter បានបិទបាំងការបង្ហោះមួយរបស់លោក ត្រាំ ដែលលោកសរសេរថា លោកមានប្រព័ន្ធស៊ាំ។ ត្រង់នេះ Twitter អះអាងថា ការបង្ហោះនេះបំពានច្បាប់របស់ខ្លួនស្តីពីព័ត៌មានមិនពិត។
សូមបញ្ជាក់ថា លោក ត្រាំ ដែលមានអាយុ ៧៤ឆ្នាំ ត្រូវបានព្យាបាលដោយឱសថចម្រុះ Regeneron ដែលប្រហែលជាផ្ដល់ភាពស៊ាំប្រឆាំងកូវីដ-១៩ឲ្យលោកត្រឹម២ឬ៣ខែ តែវាពុំមែនជាវ៉ាក់សាំងឡើយ។ ប្រាប់ទូរទស្សន៍អាមេរិក CBS នៅថ្ងៃទី ១១ ខែតុលា នាយកប្រតិបត្តិក្រុមហ៊ុនឱសថ Regeneron លោក Leonard Schleifer និយាយថា ក្នុងករណីខ្លះ វ៉ាក់សាំងអាចមានរយៈពេលរាប់ទសវត្សរ៍ ក៏ប៉ុន្តែគេពុំទាន់ច្បាស់ថា ភាពស៊ាំដែលកើតាមធម្មជាតិ នឹងមានរយៈពេលប៉ុន្មានឡើយ។
ប្រធានាធិបតី ត្រាំ បានជួបជុំអ្នកគាំទ្ររាប់រយនាក់ក្នុងព្រឹត្តិការណ៍សាធារណៈមួយនៅសេតវិមានអាមេរិក កាលពីថ្ងៃទី ១០ ខែតុលា និងត្រៀមលក្ខណៈវិលត្រលប់ទៅធ្វើឃោសនាបោះឆ្នោតក្នុងសប្ដាហ៍ថ្មីនេះផងដែរ។ បើតាមលោកត្រាំ លោកនឹងទៅរដ្ឋ Florida នៅថ្ងៃទី១២ ខែតុលា បន្ទាប់ទៀត រដ្ឋ Pennsylvania និង Iowa ដើម្បីតាមឲ្យទាន់លោក បៃឌិន ។
ការបោះឆ្នោតអាមេរិកនាថ្ងៃទី ៣ ខែវិច្ឆិកា នៅសល់ពេលជាង២០ថ្ងៃទៀតប៉ុណ្ណោះ។ ខណៈលោកត្រាំ កំពុងសម្រាកព្យាបាលកូវីដ-១៩ លោក ចូ បៃឌិន បាននាំមុខក្នុងការធ្វើឃោសនារកសំឡេងបោះឆ្នោត។ យោងតាមទូរទស្សន៍អាមេរិក CNN លោក បៃឌិន បាននាំមុខលោកត្រាំជាង១០ពិន្ទុក្នុងការបោះឆ្នោតនេះ៕
Tag:
សហរដ្ឋអាមេរិក
ដូណាល់ ត្រាំ
កូវីដ-១៩
© រក្សាសិទ្ធិដោយ thmeythmey.com
