ជាតិ
សង្គមជាតិ
អាជ្ញាធរ កំពុងព្យាយាមជួយនារីខ្មែរម្នាក់ ដែលចាញ់បោកមេខ្យល់យកទៅធ្វើការនៅចិន
×![]()
ដោយ: សារព័ត៌មានថ្មីៗ
ក្រោយបានឃើញវីដេអូ ដែលនារីខ្មែរម្នាក់ និយាយថា នាងចាញ់បោកមេខ្យល់ យកទៅធ្វើការនៅចិន និងសូមឲ្យសម្តេចនាយករដ្ឋមន្ត្រី ហ៊ុន សែន រួមទាំងអាជ្ញាធរកម្ពុជា ជួយនាងឲ្យបានត្រឡប់មកកម្ពុជាវិញ នាយកដ្ឋានប្រឆាំងការជួញដូរមនុស្សនិងការពារអនីតិជននៃអគ្គស្នងការដ្ឋាននគរបាលជាតិ បានចាប់ផ្តើមស្រាវជ្រាវរកលំនៅឋានរបស់នាងនៅចិន ដើម្បីជួយធ្វើអន្តរាគមន៍។ 
លោកឧត្តមសេនីយ៍ឯក ជីវ ផល្លី ប្រធាននាយកដ្ឋានប្រឆាំងការជួញដូរមនុស្សនិងការពារអនីតិជន ប្រាប់សារព័ត៌មានថ្មីៗ នៅព្រឹកថ្ងៃទី១២ ខែតុលា ឆ្នាំ២០២០ ថា អង្គភាពរបស់លោក បានផ្ញើសារទៅកាន់បណ្តាគណនីនិងទំព័រហ្វេសប៊ុក ដែលបង្ហោះនិងចែករំលែកវីដេអូរបស់នារីខ្មែររូបនោះ ដើម្បីសួរព័ត៌មានអំពីនាង។ លោក បន្តថា អង្គភាពរបស់លោក ក៏កំពុងស្វែងរកគណនីឬទំព័រហ្វេសប៊ុក ដែលថតវីដេអូអំពីនារីខ្មែររូបនោះ ហើយបានបង្ហោះមុនគេបង្អស់។
យ៉ាងណាក៏ដោយ មកដល់ពេលនេះ កម្លាំងសមត្ថកិច្ច មិនទាន់ទទួលបានការឆ្លើយតបពីបណ្តាគណនីនិងទំព័រហ្វេសប៊ុក ដែលចែករំលែកវីដេអូអំពីនារីខ្មែររូបនោះទេ ហើយគណនីឬទំព័រហ្វេសប៊ុក ដែលបង្ហោះវីដេអូនោះមុនគេបង្អស់ ក៏សមត្ថកិច្ចរកមិនទាន់ឃើញដែរ។ លោក ជីវ ផល្លី អះអាងថា អង្គភាពរបស់លោក បានសុំឲ្យនាយកដ្ឋានប្រឆាំងបទល្មើសបច្ចេកវិទ្យានៃអគ្គស្នងការដ្ឋាននគរបាលជាតិ ជួយស្រាវជ្រាវបន្ថែមអំពីព័ត៌មានរបស់នារីខ្មែររូបនោះ។
លោក ជីវ ផល្លី បញ្ជាក់ថា អ្វីដែលសំខាន់ គឺសមត្ថកិច្ច ត្រូវស្រាវជ្រាវរកភូមិ-ឃុំ នៅចិន ដែលនារីខ្មែររូបនោះ កំពុងរស់នៅឲ្យឃើញ ហើយបន្ទាប់មកនឹងសហការជាមួយស្ថានអគ្គកុងស៊ុល និង ស្ថានទូតកម្ពុជា រួមទាំងសមត្ថកិច្ចចិន ដើម្បីជួយអន្តរាគមន៍ ឲ្យនាងបានមកកម្ពុជាវិញ។ លោក មានប្រសាសន៍ថា៖«យើង កំពុងខិតខំប្រឹងប្រែង»។
បី-បួនថ្ងៃមុន គេ បានឃើញវីដេអូអំពីនារីខ្មែររូបនោះ នៅលើបណ្តាញសង្គម។ នាង និយាយថា នាង ត្រូវបានមេខ្យល់បោកយកទៅធ្វើការនៅចិនអស់រយៈពេលប្រមាណពីរឆ្នាំហើយ ហើយនាង រងការធ្វើបាបនិងជួបការលំបាកជាច្រើន។ នាង រៀបរាប់ថា សូម្បីតែនាងឈឺ ក៏គេ មិនបញ្ជូននាងទៅមន្ទីរពេទ្យដែរ។ នាង បន្តថា នាង គ្មានទាំងទូរស័ព្ទ ដើម្បីទាក់ទងមកគ្រួសារនៅកម្ពុជា រហូតដល់បានពឹងគេ ឲ្យជួយថតវីដេអូ បង្ហោះលើបណ្តាញសង្គម ដើម្បីសុំឲ្យរដ្ឋាភិបាលជួយ។
ក្នុងវីដេអូ នាង និយាយបណ្តើរយំបណ្តើរ ដោយលើកដៃសំពះ ស្នើទៅសម្តេចនាយករដ្ឋមន្ត្រីថា៖«ខ្ញុំ ចង់ទៅស្រុកវិញ។ ខ្ញុំ សំណូមពរលោកអ៊ុំ ហ៊ុន សែន ជួយខ្ញុំផង លោកឯកឧត្តមណាក៏ដោយ ឲ្យតែលោក ជួយខ្ញុំបាន។...ខ្ញុំ សង្ឃឹមថា លោកអ៊ុំ ជួយខ្ញុំ ឲ្យខ្ញុំទៅស្រុកកំណើតជួបម៉ែឪខ្ញុំវិញ»។
ពេលឃើញវីដេអូអំពីនារីខ្មែររូបនោះ ក្រុមការងារប្រតិកម្មរហ័សនៃអគ្គស្នងការដ្ឋាននគរបាលជាតិ បានបញ្ជូនករណីរបស់នាង ទៅនាយកដ្ឋានប្រឆាំងការជួញដូរមនុស្ស និងការពារអនីតិជន ដើម្បីជួយធ្វើអន្តរាគមន៍។ អគ្គស្នងការដ្ឋាននគរបាលជាតិ ផ្សាយថា កម្លាំងសមត្ថកិច្ច ក៏កំពុងស្វែងរកសាច់ញាតិរបស់នារីខ្មែរូបនោះ នៅកម្ពុជាផងដែរ។
បន្ថែមពីនេះ កម្លាំងជំនាញនៃនាយកដ្ឋានប្រឆាំងការជួញដូរមនុស្ស និងការពារអនីតិជន កំពុងសហការជាមួយអង្គការដៃគូ និងស្ថាប័នពាក់ព័ន្ធដើម្បី ជួយរំដោះនារីខ្មែររូបនោះ តាមនីតិវិធី៕
Tag:
ពលករខ្មែរនៅចិន
© រក្សាសិទ្ធិដោយ thmeythmey.com
