ចិន គាំទ្រ​ឥណ្ឌូណេស៊ី​ក្លាយជា​មជ្ឈមណ្ឌល​ផលិត​វ៉ាក់សាំង​នៅ​អាស៊ីអាគ្នេយ៍​
COVID-19
អន្តរជាតិ
ចិន គាំទ្រ​ឥណ្ឌូណេស៊ី​ក្លាយជា​មជ្ឈមណ្ឌល​ផលិត​វ៉ាក់សាំង​នៅ​អាស៊ីអាគ្នេយ៍​
13, Oct 2020 , 8:29 am        
រូបភាព
លោក Luhut Pandjaitan ថតរូបជាមួយរដ្ឋមន្រ្តីការបរទេសចិន វ៉ាង យី ។ រូបភាព Xinhua
លោក Luhut Pandjaitan ថតរូបជាមួយរដ្ឋមន្រ្តីការបរទេសចិន វ៉ាង យី ។ រូបភាព Xinhua
ដោយ៖​កង ម៉េង​ហុង​
 
​លោក Luhut Pandjaitan រដ្ឋមន្ត្រី​សម្របសម្រួល​កិច្ចការ​សមុទ្រ និង​វិនិយោគ​របស់​ឥណ្ឌូណេស៊ី​បាន​និយាយថា ចិន​នឹង​គាំទ្រ​ដល់​កិច្ចខិតខំ​ប្រឹងប្រែង​រប​ស់​ទីក្រុង​ហ្សា​ការ​តា​ដើម្បី​ក្លាយជា​មជ្ឈមណ្ឌល​ផលិត​វ៉ាក់សាំង​នៅ​អាស៊ីអាគ្នេយ៍​។ លោក​បញ្ជាក់​បែបនេះ​ក្រោយ​ជំនួប​ជាមួយ​រដ្ឋមន្ត្រីការបរទេស​ចិន វ៉ាង យី ។

 
​លោក Luhut Pandjaitan បាន​ជួប​ជាមួយ​ទីប្រឹក្សា​រដ្ឋ និង​រដ្ឋមន្ត្រីការបរទេស​ចិន វ៉ាង យី កាល​ព​ចុង​សប្ដាហ៍​មុន​នៅ​ខេត្ត​យូ​ណាន​។ លោក Pandjaitan ធ្វើ​ទស្សនកិច្ច​នៅ​ចិន​ក្នុងនាម​ជា​បេសកជន​ពិសេស​ប្រធានាធិបតី ចូ​កូ វី​ដូ​ដូ​។ 
 
​ក្នុង​សេចក្តីថ្លែងការណ៍​មួយ​បន្ទាប់ពី​ជំនួប​ជាមួយ​រដ្ឋមន្ត្រីការបរទេស​ចិន លោក Pandjaitan បញ្ជាក់ថា ឥណ្ឌូណេស៊ី​មាន​សមត្ថ​ភាពខ្លាំង​បំផុត​សម្រាប់​ការផលិត​វ៉ាក់សាំង​នៅ​អាស៊ីអាគ្នេយ៍​។ នេះ​បើ​យោងតាម​ទូរទស្សន៍ Bloomberg ដែល​បន្ត​ផ្សាយ​សេចក្ដីថ្លែងការណ៍​ទៀតថា លោក វ៉ាង បានប្រកាស​ជំហរ​ចិន​ក្នុង​ការគាំទ្រ​ក្រុមហ៊ុន​របស់​ចិន​ដើម្បី​បង្កើន​កិច្ចសហប្រតិបត្តិការ​ជាមួយ​ឥណ្ឌូណេស៊ី​លើ​ផ្នែក​មួយ​នេះ​។​
 
​សូមបញ្ជាក់ថា ឥណ្ឌូណេស៊ី ជា​គោលដៅ​មួយ​ដែល​កំពុង​ទទួល​ការសាកល្បង​វ៉ាក់សាំង​ជំងឺ COVID-19 របស់​ក្រុមហ៊ុន Sinovac ។ ក្រុម​អ្នកស្ម័គ្រចិត្ត​នៅ​ទីក្រុង​បាង​ឌុ​ង​របស់​ឥណ្ឌូណេស៊ី បាន​ចូលរួម​ក្នុងការ​សាកល្បង​ដំណាក់កាល​ទី​បី ដែលជា​ដំណាក់កាល​ចុងក្រោយ មុន​ឈានដល់​ការផលិត​។ 
 
​យ៉ាងណាមិញ ឥណ្ឌូណេស៊ី​ដែលមាន​សេដ្ឋកិច្ច​ធំជាងគេ​នៅ​អាស៊ីអាគ្នេយ៍​មួយ​នេះ ក៏​កំពុងធ្វើការ​លើ​ការបង្កើត​វ៉ាក់សាំង​រប​ស់​ខ្លួន​ដែលមាន​ឈ្មោះថា Merah Putih ។ រដ្ឋាភិបាល​លោក វី​ដូ​ដូ ចង់បាន​វ៉ាក់សាំង​ឲ្យ​គ្រប់គ្រាន់​សម្រាប់​ប្រជាជន​ចំនួន​២៧០​លាន​នាក់​។​
 
​គិត​មកដល់ពេលនេះ ឥណ្ឌូណេស៊ី​មាន​ករណី​ឆ្លង Covid 19 សរុប​ចំនួន ៣៣៣,៤៤៩ ករណី ខណៈពេលដែល​ករណី​ដែល​បានជា​សះស្បើយ​មាន ២៥៥,០២៧ ហើយ​ស្លាប់់​ចំនួន ១១,៨៤៤ នាក់​៕
 
 

Tag:
 ចិន​
  ឥណ្ឌូណេស៊ី​
  COVID-19
© រក្សាសិទ្ធិដោយ thmeythmey.com