ជាតិ
សង្គមជាតិ
ទឹកស្រកបណ្តើរៗ តែអាជ្ញាធរពោធិ៍សាត់បន្តហាមរថយន្តធុនធំឆ្លងកាត់ផ្លូវលេខ៥ត្រង់គីឡូម៉ែត្រ១៨៦ ដល់១៩៣
លោក ម៉ៅ ធន្ទិន អភិបាលខេត្តពោធិ៍សាត់ អមជាមួយនឹងមន្ត្រីពាក់ព័ន្ធកំពុងលុយទឹកទៅតំបន់ទឹកជំនន់ រូបភាពពីមន្ទីរព័ត៌មានខេត្តពោធិ៍សាត់
×![]()
ទឹកជំនន់បានធ្វើឲ្យជន់លិចក្រុង និងស្រុកចំនួន៤នៅក្នុងខេត្តពោធិ៍សាត់។ លោក ឃុត ឧសភា នាយករដ្ឋបាលខេត្តពោធិ៍សាត់ ប្រាប់អ្នកសារព័ត៌មានថ្មីៗ តាមទូរសព្ទថាគិតត្រឹមថ្ងៃទី១២ ខែតុលានេះថា តំបន់ដែលជន់លិចទាំងនោះកំពុងតែចាប់ផ្តើមស្រកជាបណ្តើរៗហើយ។ 
លោក ឃុត ឧសភា បញ្ជាក់ថា តំបន់ដែលប៉ះពាល់ធ្ងន់ធ្ងរដោយសារទឹកជំនន់មានក្រុងពោធិ៍សាត់ និងស្រុក៣ទៀត គឺស្រុកក្រវាញ ស្រុកកណ្តៀង និង ស្រុកបាកាន។ លោក មានប្រសាសន៍ថា៖«ទឹកជំនន់នៅតាមស្រុកនីមួយៗចាប់ផ្តើមនៅនឹង និងស្រកបន្តិចៗហើយ។ ប៉ុន្តែទីទំនាបមួយចំនួននៅក្របដណ្តប់ដោយទឹកនៅឡើយ»។
ទោះបីតំបន់ខ្លះក្នុងខេត្តពោធិ៍សាត់ចាប់ផ្តើមស្រក ប៉ុន្តែផ្លូវថ្នល់មួយចំនួនក៏នៅតែបន្តជន់លិច ដែលរដ្ឋបាលខេត្ត មិនអនុញ្ញាតឲ្យមានការឆ្លងកាត់ទៅលើផ្លូវលេខជាតិ៥ត្រង់គីឡូម៉ែត្រ១៨៦ ដល់១៩៣ឡើយ។ លោក ឃុត ឧសភា បាននិយាយថា៖«យើងផ្អាកឲ្យរថយន្តធុនធំធ្វើចរាចរសិន ដើម្បីជៀសវាងគ្រោះថ្នាក់កើតឡើងជាយថាហេតុណាមួយ»។
បើតាមលោក ឃុត ឧសភា មានពលរដ្ឋជាង៣០០គ្រួសារត្រូវបានជម្លៀសចេញពីតំបន់លិចទឹក ទៅទីទួលសុវត្ថិភាព។ ប៉ុន្តែ លោកមិនទាន់អាចបញ្ជាក់ពីទំហំផ្ទះសម្បែង ផ្លូវថ្នល់ ដំណាំស្រូវ និងដំណាំផ្សេងទៀត ថារងការខូចខាត និងលិចលង់ប៉ុន្មាននៅឡើយទេ។ លោក អះអាងថា អាជ្ញាធរកំពុងតែប្រមូលទិន្នន័យនៃការខូចខាតទាំងនេះ។
លោកអាចបញ្ជាក់ថា គិតត្រឹមថ្ងៃទី១២ ខែតុលានេះ មានមនុស្សចំនួន៣នាក់ស្លាប់ក្នុងហេតុការណ៍ទឹកជំនន់ ដោយក្នុងនោះមានក្មេងម្នាក់ យុវតីម្នាក់ និង យុវជនម្នាក់។ លោក បន្តថា ក្មេងស្លាប់ដោយសារលង់ទឹក រីឯយុវតីលង់ទឹក ដោយទឹកកួច នៅពេលធ្វើដំណើរទៅផ្ទះ និងម្នាក់ទៀតមាន ជំងឺឆ្កួតជ្រូក បានលង់ទឹកស្លាប់៕
Tag:
ទឹកជំនន់
© រក្សាសិទ្ធិដោយ thmeythmey.com
