ក្រុមហ៊ុន រ៉ូយ៉ាល់គ្រុប ទទួលបានពានរង្វាន់និយោជិតល្អជាងគេបំផុតប្រចាំទ្វីបអាស៊ី

អត្ថបទពាណិជ្ជកម្ម

ក្រុមហ៊ុន រ៉ូយ៉ាល់គ្រុប ទទួលបានពានរង្វាន់និយោជិតល្អជាងគេបំផុតប្រចាំទ្វីបអាស៊ី

13, Oct 2020 , 11:12 am

រូបភាព

ដោយ: សារព័ត៌មានថ្មីៗ

ភ្នំពេញ ថ្ងៃទី១៣ ខែតុលា ឆ្នាំ២០២០ - ក្រុមហ៊ុន រ៉ូយ៉ាល់គ្រុប និងក្រុមហ៊ុនបុត្រសម្ព័ន្ធ ICT ដែលមាន Cellcard, Ezecom និង Wing មានកិត្តិយសទទួលបានពានរង្វាន់និយោជិតល្អជាងគេបំផុត ប្រចាំទ្វីបអាស៊ី ២០២០ (Asia’s Best Employer Brand awards 2020 ) នៅក្នុងព្រឹត្តិការណ៍ World HRD Congress នាថ្ងៃសៅរ៍ ទី១០ ខែតុលា ឆ្នាំ២០២០ កន្លងទៅថ្មីៗនេះ។

គួររំលឹកផងដែរថា ព្រឹត្តិការណ៍ប្រគល់ពានរង្វាន់និយោជិតប្រចាំទ្វីបអាស៊ីរបស់ World HRD Congress លើកទី១ ត្រូវបានប្រារព្ធធ្វើឡើងនៅក្នុងឆ្នាំ ២០១០។ ប៉ុន្តែដោយឡែក សម្រាប់កម្មវិធីប្រគល់ពានរង្វាន់នាឆ្នាំនេះវិញ គឺត្រូវបានធ្វើឡើងតាមប្រព័ន្ធអនឡាញ ដោយសារតែមានការរឹតត្បិតដែលបណ្តាលមកពីផលប៉ះពាល់ នៃជំងឺរាត្បាតកូវីដ-១៩។ World HRD Congress គឺជាអង្គការឯករាជ្យមិនសំដៅប្រាក់ចំណេញ ដែលមានគោលបំណងជួយធ្វើឲ្យ “ការងារ និងជីវិតការងារកាន់តែមានភាពប្រសើរឡើង” ។

ការទទួលបាននូវពានរង្វាន់ដ៏មានកិត្យានុភាពទាំងនេះ គឺជាសក្ខីភាព ដែលបញ្ជាក់ឱ្យឃើញច្បាស់នូវចក្ខុវិស័យ របស់លោក គិត ម៉េង អគ្គនាយកក្រុមហ៊ុន រ៉ូយ៉ាល់គ្រុប សម្រាប់ឌីជីថលនីយកម្មកម្ពុជា។

បន្ទាប់ពីការប្រកាសនូវការទទួលពានរង្វាន់ទាំងបួននេះ លោក គិត ម៉េង បានមានប្រសាសន៍ថា៖ «ខ្ញុំសូមចូលរួមអបអរសាទរ ដល់ថ្នាក់ដឹកនាំទាំងអស់ នៅក្នុងក្រុមហ៊ុនបុត្រសម្ព័ន្ធរបស់យើង ចំពោះការបំពេញជាគំរូដ៏ល្អ ប្រកបដោយភាពខ្លាំង រឹងមាំ និងមានគំនិតច្នៃប្រឌិតខ្ពស់ នៅក្នុងអំឡុងពេលនេះ»។ លោកបន្តថា៖«បើទោះបីជាមានការរីករាលដាល នៃជំងឺរាតត្បាតយ៉ាងណាក៏ដោយ យើងទាំងអស់គ្នា នៅតែរក្សាគោលជំហរយ៉ាងរឹងមាំ ក្នុងការសម្រេចឲ្យបាននូវចក្ខុវិស័យតែមួយរបស់យើង ដែលជាការរួបរួមគ្នាជាធ្លុងមួយ ពោលគឺមិនត្រឹមតែបង្រួបបង្រួមផ្នែកប្រតិបត្តិការ និងផែនការហេដ្ឋារចនាសម្ព័ន្ធរបស់យើងប៉ុណ្ណោះទេ តែថែមទាំងរួបរួមសមាជិកនៅក្នុងក្រុម ស្របពេលដែលយើងកំពុងគាំទ្រគ្នាទៅវិញទៅមក ក៏ដូចជាខិតខំពង្រឹងនូវការផ្តល់សេវាកម្មរបស់ក្រុមហ៊ុន រ៉ូយ៉ាល់គ្រុប ជូនដល់ប្រជាជនកម្ពុជាផងដែរ»។

សព្វថ្ងៃនេះ បងប្អូនពលរដ្ឋខ្មែរជាង ៧០% កំពុងចូលរួមប្រើប្រាស់ និងធ្វើប្រតិបត្តិការ ជាមួយផលិតផល ឬសេវាកម្ម របស់ក្រុមហ៊ុន រ៉ូយ៉ាល់គ្រុប។ ក្នុងនាមជាក្រុមហ៊ុនដែលមានកម្មសិទ្ធិទាំងស្រុងជាជនជាតិខ្មែរ ក្រុមហ៊ុន រ៉ូយ៉ាល់គ្រុប នឹងធានាឲ្យបានថា ខ្លួននឹងយកចិត្តទុកដាក់បម្រើអតិថិជនជាធំ ពោលគឺយកចិត្តទុកដាក់បម្រើអតិថិជន ទាំងនៅតាមទីក្រុង និងតំបន់ដាច់ស្រយាល ទាំងអ្នកធូរធារ និងអ្នកខ្សត់ខ្សោយ រួមទាំងមនុស្សគ្រប់វ័យផងដែរ។

លោក គិត ម៉េង បានបន្ថែមឲ្យដឹងទៀតថា៖«យើងអាចប្រមូលផ្តុំនូវកម្លាំងក្រុមការងាររបស់យើង ដើម្បីឈានទៅសម្រេចលទ្ធផលបាន ហួសពីការរំពឹងទុក តាមរយៈការផ្តល់ជូននូវសេវាកម្ម ប្រកបដោយភាពច្នៃប្រឌិតខ្ពស់ ការបង្កើតផលិតផលថ្មីៗ និងការស្វែងរកនូវមធ្យោបាយថ្មីៗ ដើម្បីគាំទ្រដល់អតិថិជន ក៏ដូចជាជួយដល់ជីវភាពរស់នៅប្រចាំថ្ងៃ របស់ពួកគាត់ ពីព្រោះពួកយើងយកចិត្តទុកដាក់ និងយល់នូវទុក្ខលំបាក ដែលមនុស្សជាច្រើនគ្ នាកំពុងប្រឈមជាមួយ ក្នុងពេលបច្ចុប្បន្ន»។

ក្រុមហ៊ុន រ៉ូយ៉ាល់គ្រុប រួមទាំងក្រុមហ៊ុនបុត្រសម្ព័ន្ធ Cellcard, Ezecom និង Wing ពិតជាមានមោទកភាពបំផុត ដែលបានបម្រើពលរដ្ឋខ្មែរ និងក្លាយជាផ្នែកមួយ នៃការជួយប្រទេសកម្ពុជាឲ្យងើបឡើងវិញផងដែរ៕