សង្គមអន្តរជាតិ
អន្តរជាតិ
យោធាតៃវ៉ាន់។ រូបភាព៖ AFP
×![]()
សំណើក្នុងការលក់អាវុធឲ្យតៃវ៉ាន់នេះ ទំនងនឹងមិនមានការជំទាស់ឡើយ ដ្បិតអីតំណាងរាស្ត្រ និងសមាជិកព្រឹទ្ធសភាអាមេរិក ជាទូទៅគាំទ្រតៃវ៉ាន់ និងមើលឃើញដូចគ្នាថា ចិនជាអ្នកគំរាមដល់សន្តិសុខតៃវ៉ាន់។
សេតវិមានអាមេរិក នៅថ្ងៃទី១២ តុលា បានផ្តល់ដំណឹងទៅសភាស្តីពីការលក់ប្រព័ន្ធអាវុធ៣ប្រភេទទៅតៃវ៉ាន់។ ការបញ្ជូនដំណឹងនេះ ដែលជានីតិវិធីក្នុងការលក់អាវុធឲ្យបរទេស នឹងបើកផ្លូវឲ្យសភាអាមេរិកទាំង២ ពិនិត្យ និងផ្តល់ការយល់ព្រមចំពោះការលក់អាវុធឲ្យតៃវ៉ាន់។
កាលពីខែកញ្ញាកន្លងទៅ ក្រសួងការបរទេសអាមេរិកបានអះអាងពីការបើកផ្លូវដល់ការលក់សព្វាវុធអាវុធចំនួន៧ ទៅតៃវ៉ាន់។ នៅថ្ងៃទី១២ ខែតុលា សេតវិមានអាមេរិក បានជូនដំណឹងទៅកាន់សភាអាមេរិកស្ដីពីការលក់អាវុធចំនួនបីមុខសិន។
ប្រព័ន្ធអាវុធទាំង៣ប្រភេទ ដែលអាមេរិក នឹងលក់ទៅឲ្យតៃវ៉ាន់ រួមមានរ៉ុក្កែតបាញ់ចេញពីយានយន្ត(HIMARS) មីស៊ីលរយៈចម្ងាយឆ្ងាយបាញ់ពីដីទៅអាកាស (SLAM-ER) និងប្រព័ន្ធសូណាដែលមានសមត្ថភាពបញ្ជូនភ្លាមៗព័ត៌មាន និងរូបភាពពីយន្តហោះចម្បាំងF-16 ទៅស្ថានីយផ្ទាល់ដី។ សភាទាំងពីររបស់អាមេរិក នឹងពិនិត្យមើលគម្រោងនេះ មុននឹងសម្រេចថា អនុញ្ញាតឲ្យលក់ឬអត់។
ចំពោះការលក់អាវុធទៅតៃវ៉ាន់នេះ ស្ថានទូតចិននៅអាមេរិក ក៏ចេញមុខជំទាស់ភ្លាមដែរ។ ក្នុងសេចក្តីថ្លែងការណ៍របស់ខ្លួន ស្ថានទូតចិន ទាមទារឲ្យអាមេរិកបញ្ឈប់ការលក់អាវុធ ក៏ដូចជាទំនាក់ទំនងយោធាជាមួយតៃវ៉ាន់។ ស្ថានទូតចិន បានអះអាងថា ការលក់អាវុធប៉ះពាល់យ៉ាងធ្ងន់ធ្ងរដល់ទំនាក់ទំនងទ្វេភាគីចិន-អាមេរិក ក៏ដូចជាសន្តិភាព និងស្ថិរភាពក្នុងជ្រោយតៃវ៉ាន់។
«ចិនតែងតែជំទាស់យ៉ាងដាច់ខាតក្នុងការលក់អាវុធរបស់អាមេរិក ទៅតៃវ៉ាន់ និងការពារអធិបតេយ្យភាព និងសន្តិសុខរបស់ខ្លួន»។ ស្ថានបេសកកម្មចិនបញ្ជាក់បែបនេះ ដោយសង្កត់ធ្ងន់ថា កោះតៃវ៉ាន់ជាដែនដីស្ថិតក្រោមអធិបតេយ្យភាពរបស់ចិន។
គណៈកម្មាធិការទំនាក់ទំនងបរទេសនៃព្រឹទ្ធសភា និងគណៈកម្មាធិការកិច្ចការបរទេសនៃរដ្ឋសភាបានទទួលរួចហើយពីដំណឹងនៃការលក់អាវុធទៅឲ្យតៃវ៉ាន់នេះ។ គណៈកម្មាធិការទាំងពីរ ជាស្ថាប័នពិនិត្យគម្រោងទិញលក់នេះ។ នេះបើតាមទីភ្នាក់ងារព័ត៌មាន Reuters ។
ក្រៅតែប្រព័ន្ធអាវុធទាំង៣ អាមេរិកក៏គ្រោងលក់ទៅតៃវ៉ាន់នូវប្រព័ន្ធអាវុធដទៃទៀតរួមមានដ្រូន មីស៊ីលប្រឆាំងនាវាបាញ់ចេញពីដី និងមីនបង្កប់ក្នុងទឹក។ អាវុធទាំងអស់នេះសុទ្ធសឹងតែប្រើប្រាស់សម្រាប់បង្ការការវាយប្រហារឡើងគោក។ វាយឡើងគោក ជាផ្លូវមួយដែលចិនត្រូវជ្រើសរើសបើចង់វាយតៃវ៉ាន់។
សំណើក្នុងការលក់អាវុធឲ្យតៃវ៉ាន់នេះ ទំនងនឹងមិនមានការជំទាស់ឡើយ ដ្បិតអីតំណាងរាស្ត្រ និងសមាជិកព្រឹទ្ធសភាអាមេរិក ជាទូទៅគាំទ្រតៃវ៉ាន់ និងមើលឃើញដូចគ្នាថា ចិនជាអ្នកគំរាមដល់សន្តិសុខតៃវ៉ាន់។ ដំណឹងស្តីពីការលក់អាវុធនេះលេចឡើង ស្របពេលដែលមន្ត្រីក្រសួងការពារជាតិអាមេរិកអះអាងថា ចំណាយក្នុងការការពារជាតិរបស់តៃវ៉ាន់នៅមិនទាន់គ្រប់គ្រាន់ និងទាមទារឲ្យតៃវ៉ាន់ធ្វើកំណែទម្រង់វិស័យការពារជាតិរបស់ខ្លួន។
គួរបញ្ជាក់ផងដែរថា កាលពីថ្ងៃទី៦ តុលាកន្លងទៅ ទីប្រឹក្សាសន្តិសុខជាតិអាមេរិក លោកRobert O’Brien ព្រមានចិនពីការក្តោបក្តាប់កោះតៃវ៉ាន់ដោយប្រើកម្លាំងយោធា ប៉ុន្តែលោកអះអាងថា ការវាយប្រហារឡើងគោក នឹងមានសភាពពិបាកខ្លាំង។ លោក O’Brien ប្រាប់ឲ្យតៃវ៉ាន់វិនិយោគបន្ថែមទៀតលើមីស៊ីលប្រដេញតាមបណ្តោយឆ្នេរ មីន នាវាវាយប្រហាររហ័ស កាំភ្លើងធំចល័ត និងប្រព័ន្ធស៊ើបការណ៍៕
Relate: https://thmeythmey.com/?page=detail&id=96380
Tag:
ចិន
អាមេរិក
តៃវ៉ាន់
© រក្សាសិទ្ធិដោយ thmeythmey.com
