ភ្នំពេញ៖ ចិនសម្រេចផ្ដល់ជំនួយឥតសំណងប្រមាណ១៤០លានដុល្លារ ដល់កម្ពុជា។ ភាគីទាំងពីរ បានចុះហត្ថលេខាលើកិច្ចព្រមព្រៀងស្តីពីកិច្ចសហប្រតិបត្តិការសេដ្ឋកិច្ច និងបច្ចេកទេសសម្រាប់ការផ្តល់ហិរញ្ញប្បទានឥតសំណង កាលពីថ្ងៃទី១២ តុលា។
ជំនួយឥតសំណងនេះ គឺដើម្បីជួយស្ដារសេដ្ឋកិច្ចកម្ពុជាឡើងវិញ នៅក្រោយវិបត្តិកូវីដ-១៩។ ថ្លែងក្នុងជំនួបជាមួយសម្ដេច ហ៊ុន សែន ក្រោយពិធីចុះហត្ថលេខាលើកិច្ចព្រមព្រៀងចំនួន៤នោះ លោក វ៉ាង យី ទីប្រឹក្សារដ្ឋនិងជារដ្ឋមន្ត្រីការបរទេសនៃប្រទេសចិន បានអះអាងថា ចិននៅតែបន្តគាំទ្រកម្ពុជាយ៉ាងរឹងមាំ ដោយធ្វើយ៉ាងណាឲ្យកម្ពុជារក្សាបាននូវអធិបតេយ្យភាពថ្លៃថ្នូររបស់កម្ពុជា។
មិនត្រឹមតែសន្យាជួយកម្ពុជា នៅចំពោះមុខនាយករដ្ឋមន្ត្រី ហ៊ុន សែន ទេ លោក វ៉ាង យី ក៏បានប្រកាសជួយកម្ពុជា នៅចំពោះមុខថ្នាក់ដឹកនាំផ្សេងទៀតដែរ។ ក្នុងជំនួបជាមួយលោកឧបនាយករដ្ឋមន្ត្រី ហោ ណាំហុង អតីតរដ្ឋមន្ត្រីការបរទេសកម្ពុជានោះ លោក វ៉ាង យី ក៏បានសន្យាជាក់លាក់ជាថ្មីថា ចិនផ្ដល់វ៉ាក់សាំងការពារកូវីដ-១៩ ដល់កម្ពុជា ក្រោយពិសោធន៍ និងដាក់ឲ្យប្រើប្រាស់ជាផ្លូវការ។ មិនតែប៉ុណ្ណោះប្រមុខការទូតចិនរូបនេះ ក៏សន្យាបើកទីផ្សារនាំចូលកសិផលកម្ពុជា ដែលមានគុណភាពបន្ថែមទៀត រួមទាំងពង្រីកកិច្ចសហប្រតិបត្តិការលើវិស័យផ្សេងៗទៀតផង។
ក្នុងជំនួបនោះ លោក ហោ ណាំហុង ក៏បានលើកឡើងពីគម្រោងខ្សែកាប្លិ៍អុបទិកក្រោមបាតសមុទ្រ ទីក្រុងព្រះសីហនុ-ទីក្រុងហុងកុង, គម្រោងសាងសង់ផ្លូវជាតិលេខ71C , គម្រោងខ្សែបញ្ជូនអគ្គិសនីជនបទជំហានទី៧, គម្រោងជំរុញផលិកម្មស្រូវ និងនាំចេញអង្ករ, គម្រោងប្រព័ន្ធស្រោចស្រពនិងការពារទឹកជំនន់ស្ទឹងព្រែកត្នោត និងគម្រោងពង្រីក និងលើកកម្រិតផ្លូវជាតិលេខ៤១, ៣៣ និង៣១ ជាដើម។ ប៉ុន្តែលោក វ៉ាង យី មិនបានឆ្លើយតបនឹងសំណើទាំងនេះឡើយ។
ដំណើរទស្សនកិច្ចរយៈពេលពីរថ្ងៃ របស់លោក វ៉ាង យី បានសម្រេចសមិទ្ធផលដ៏ធំមួយទៀត គឺការចុះហត្ថលេខាលើកិច្ចព្រមព្រៀងពាណិជ្ជកម្មសេរីទ្វេភាគី (FTA) ជាផ្លូវការនាព្រឹកថ្ងៃទី១២ ខែតុលា ក្រោមវត្តមានរបស់លោកនិងសម្តេច ហ៊ុន សែន។
ក្នុងនោះរួមមាន ១ កិច្ចព្រមព្រៀងពាណិជ្ជកម្មសេរី រវាង សាធារណរដ្ឋប្រជាមានិតចិន និងព្រះរាជាណាចក្រកម្ពុជា។ ២ កិច្ចព្រមព្រៀងស្តីពីកិច្ចសហប្រតិបត្តិការសេដ្ឋកិច្ច និងបច្ចេកទេស សំរាប់ការផ្តល់ហិរញ្ញប្បទានឥតសំណង។ ៣ លិខិតប្ដូរសារ ស្តីពីការសិក្សាសមិទ្ធិលទ្ធភាពគម្រោងធ្វើឲ្យប្រសើរឡើងមន្ទីរពេទ្យបង្អែកខេត្តព្រះសីហនុ និង៤ លិខិតប្ដូរសារស្តីពីការសិក្សាសមិទ្ធិលទ្ធភាពគម្រោងអភិវឌ្ឍន៍ហេដ្ឋារចនាសម្ព័ន្ធ ប្រព័ន្ធលូ និងប្រព្រឹត្តកម្មទឹកកខ្វក់នៅខេត្តព្រះសីហនុ និង ពិធីប្រគល់ទទួលជំនួយឧបករណ៍វេជ្ជសាស្ត្រពីមិត្តចិន។
អ្វីដែលភាគីទាំងពីរ រំពឹងខ្ពស់ក្នុងជួយផលប្រយោជន៍គ្នាទៅវិញទៅមក គឺកិច្ចព្រមព្រៀងពាណិជ្ជកម្មសេរី។ កម្ពុជាជឿជាក់ថា កិច្ចព្រមព្រៀងពាណិជ្ជកម្មសេរី គឺជាការបើកទីផ្សារប្រទេសមហាអំណាចពិភពលោកមួយ សម្រាប់ការនាំចេញទំនិញរបស់កម្ពុជា ពិសេសគឺនាំចេញផលិតកសិកម្មដោយមិនជាប់របាំងពន្ធគយ។
សម្ដេចនាយករដ្ឋមន្ត្រី ហ៊ុន សែន អះអាងប្រាប់ប្រមុខទូតចិនថា «EBA(ប្រព័ន្ធអនុគ្រោះពន្ធគ្រប់យ៉ាង លើកលែងតែអាវុធ) គង់មានថ្ងៃណាមួយនឹងបាត់បង់ តែកិច្ចព្រមព្រៀងពាណិជ្ជកម្មសេរីរវាងកម្ពុជា និងចិនគឺនៅជារៀងរហូត»។
សូមបញ្ជាក់ថា ចិនជាប្រទេសវិនិយោគទីមួយនៅកម្ពុជា ដែលបានវិនិយោគប្រមាណ៣.៥ពាន់លានដុល្លារក្នុងឆ្នាំ២០១៩។ លើសពីនេះ ប្រទេសទាំងពីរគ្រោងបង្កើនទំហំពាណិជ្ជកម្មទ្វេភាគីដល់ ១០ ពាន់លានដុល្លារត្រឹមឆ្នាំ ២០២៣។