ជំនន់ទឹកភ្លៀងនៅក្នុងខេត្តបាត់ដំបង បានធ្វើឱ្យត្រីគ្រប់ប្រភេទដែលចិញ្ចឹមក្នុងស្រះទាំង៩កន្លែងរបស់កសិករ ផល វាសនា រួចចេញពីស្រះស្ទើរតែទាំងអស់។ ត្រីដែលរួចចេញពីស្រះនេះ មានប្រភេទត្រីចិញ្ចឹមយសាច់ និងប្រភេទត្រីពូជសម្រាប់លក់ជូនកសិករនៅតាមបណ្តាខេត្តនានា។ លោក វាសនា បានអះអាងដូច្នេះ ការរួចបាត់ត្រីទាំងនេះដោយសារតែជំនន់ទឹកភ្លៀងនោះ គឺធ្វើឱ្យលោកខាតបង់ប្រាក់អស់ ជាង៤០លានរៀល(ប្រមាណ១ម៉ឺនដុល្លារ)។
អ្នកចិញ្ចឹមត្រីលក់ ក្នុងឃុំអន្លង់រុន ស្រុកថ្មគោល ខេត្តបាត់ដំបងរូបនេះ បានរៀបរាប់យ៉ាងលំអិតប្រាប់សារព័ត៌មានថ្មីៗថា ត្រីដែលលោកចិញ្ចឹមនោះ មានត្រីឆ្ពិន ត្រីអណ្តែង ត្រីប្រា ត្រីទីឡាប់យ៉ាក្រហម និងខ្មៅជាដើម។ ក្នុងនោះ មានត្រីចិញ្ចឹមយកសាច់ចំនួន២តោន និងកូនត្រីមាន១០ម៉ឺនក្បាល, មេពូជត្រី៥០០គីឡូ និងត្រីបម្រុងសម្រាប់ធ្វើពូជ មាន២ម៉ឺនក្បាល។ បច្ចុប្បន្ន ត្រីទាំងអស់នេះបានរួចចេញពីស្រះអស់ជាង៧០ភាគរយ ដោយសារជំនន់ទឹកភ្លៀង បានកើតឡើងតាំងពីថ្ងៃទី១០តុលា ឆ្នាំ២០២០មក។
សម្រាប់ពពួកត្រីចិញ្ចឹមយកសាច់ មានតម្លៃ៨០០០រៀលក្នុងមួយគីឡូក្រាម, មេពូជត្រី មានតម្លៃ៥ដុល្លារក្នុងមួយគីឡូក្រាម ឬលើសពីនេះតាមប្រភេទពូជត្រី។ រីឯកូនត្រីជាង១០ម៉ឺនក្បាល ដែលហូរចេញពីស្រះទៅតាមទឹកជំនន់ទឹកនេះ មានតម្លៃ១០លានរៀល។ នេះជាការលើកឡើងរបស់លោក វាសនា បានបញ្ជាក់ថា៖« ត្រីដែលរួចចេញពីស្រះនេះ បើខ្ញុំគិតជាលុយទៅ គឺអស់ប្រហែល៤០លានរៀល»។
បើតាមលោក ផល វាសនា មុខរបរចិញ្ចឹមត្រីនេះ ថ្វីដ្បិតទទួលបានចំណូលច្រើនសមរម្យក្នុងមួយឆ្នាំៗក៏ពិតមែន ប៉ុន្តែក៏មានការចំណាយច្រើនផងដែរ ទាំងការទិញមេពូជត្រី ទាំងការទិញចំណីត្រី និងទាំងការជីកឬធ្វើស្រះចិញ្ចឹមត្រី ជាដើម។ ជាពិសេសការធ្វើវារីវប្បកម្មនេះ គឺប្រឈមនឹងហានិភ័យខ្ពស់ ក្នុងពេលថែទាំត្រី។ លោក ផល វាសនា បន្តនិយាយដូច្នេះ៖ «ជាក់ស្តែងដូចយើងកំពុងជួបបញ្ហាសព្វថ្ងៃនេះ។ គ្រាន់តែភ្លៀងខ្លាំងបង្កឱ្យមានទឹកជំនន់នេះ យើងខាតអស់រលីងភ្លាមៗតែម្តង។ រួចត្រីចិញ្ចឹមយកសាច់ មិនសូវជាបញ្ហាប៉ុន្មាន តែបាត់ត្រីពូជទើបជាបញ្ហារបស់ខ្ញុំ ព្រោះវាថ្លៃហើយ គឺត្រូវចំណាយពេលយូរក្នុងការថែទាំឱ្យល្អ សម្រាប់បង្កាត់ពូជថ្មី ឬសម្រាប់លក់បន្ត»។
លោក សុខ រ៉ាដែន ប្រធានសមាគមន៍វារីវប្បករកម្ពុជា បានប្រាក់សារព័ត៌មានថ្មីៗតាមទូរសព្ទ នាថ្ងៃទី១៣តុលា ឆ្នាំ២០២០ ថា ជំនន់ទឹកភ្លៀងដែលបានកើតឡើងនៅកម្ពុជា ក្នុងរយៈពេលថ្ងៃចុងក្រោយនេះ បានធ្វើឱ្យការចិញ្ចឹមត្រីរបស់វារីវប្បករចំនួន១៦៣នាក់ បានរងគ្រោះ។ ក្នុងចំណោមវារីវប្បករទាំងជាង១៦០ មានវារីវប្បករ២គ្រួសារដែលខាតបង់ធ្ងន់ធ្ងរដោយជំនន់ទឹកភ្លៀងនេះ។ បើតាម ការបញ្ជាក់របស់លោក សុខ រ៉ាដែន ក្រៅពីលោក ផល វាសនា អ្នកចិញ្ចឹមត្រីក្នុងខេត្តបាត់ដំបងហើយនោះ ក៏នៅមានវារីវប្បកររស់នៅខេត្តពោធិ៍សាត់មួយរូបទៀត បានខាតបង់ត្រីតម្លៃរាប់សិនលានរៀល ទៅតាមជំនន់ទឹកភ្លៀងនេះផងដែរ។
កម្ពុជាបានជួយប្រទះនឹងកូនព្យុះជាបន្តបន្ទាប់ ចាប់តាំងទីថ្ងៃទី៧តុលា ឆ្នាំ២០២០មក ដែលបណ្តាលឱ្យមានភ្លៀងធា្លក់ខ្លាំង បង្កទៅជាជំនន់ទឹកភ្លៀង ដោយមានរាជធានីភ្នំពេញ-ខេត្តចំនួនរងគ្រោះ។ ហើយខេត្តដែលរងគ្រោះធ្ងន់ធ្ងរជាងគេ ដោយសារឥទ្ធិពលកូនព្យុះទាំងនេះ ក្រៅពីខេត្តបាត់ដំបង និងពោធិ៍សាត់ហើយនោះ ក៏នៅមានខេត្តប៉ៃលិន ព្រះវិហារ កំពង់ស្ពឺ...ផងដែរ។
សូមជម្រាបថា សម្រាប់ខេត្តបាត់ដំបងមានបណ្តាស្រុកជាច្រើន បានរងគ្រោះដោយសារជំនន់ទឹកភ្លៀងនេះ។ ស្រុកទាំងនោះក្រៅពីស្រុកថ្មគោល មានស្រុកបាណន់ ស្រុករុក្ខគិរី ស្រុកសំពៅលូន ស្រុកភ្នំព្រឹក ស្រុកបវេល ស្រុកកំរៀង ស្រុកបាណន់ និងស្រុកសង្កែ ជាដើម។
បច្ចុប្បន្ន កម្ពុជាបានជួបប្រទះនូវវិសម្ពាធទាប (Tropical Depression) ឬបង្កើតជាព្យុះ(Tropical Storm)។ ព្យុះនេះ បានធ្វើឱ្យទូទាំងប្រទេសកម្ពុជាមានភ្លៀងធ្លាក់ និងខ្យល់បក់ ចាប់ពីថ្ងៃទី៧តុលាមក។
ដោយឡែក ចាប់ពីថ្ងៃទី១៨ ដល់ថ្ងៃទី២០ ខែតុលាខាងមុខនេះ កម្ពុជានឹងទទួលរងព្យុះទី១៧ថ្មីគឺសូដែល (Soudel) ដែលបណ្តាលឲ្យតំបន់ទំនាប ជួរភ្នំដងរែក ខ្ពង់រាបឦសាន និង តំបន់មាត់សមុទ្រ នឹងមានភ្លៀងធ្លាក់។ ព្យុះនេះកើតចេញពីសមុទ្រចិនខាងត្បូង ដោយបានចូលមកក្នុងឈូងសមុទ្រតុងកឹង ហើយឆ្លងកាត់កោះហៃណាំរួចចូលមកប្រទេសវៀតណាម នឹងបន្តចូលមកកម្ពុជា តាមខេត្តរតនៈគិរី៕