សង្គមអន្តរជាតិ
អន្តរជាតិ
ជប៉ុនតវ៉ា ក្រោយកប៉ាល់ល្បាតសមុទ្ររបស់ចិនចូលក្នុងដែនទឹករបស់ខ្លួន រូបភាព៖ Kyodo
× ទីក្រុងតូក្យូ នៅថ្ងៃទី១៣ ខែតុលា បានដាក់ការតវ៉ាទៅទីក្រុងប៉េកាំង ដោយអះអាងថា កប៉ាល់ល្បាតចិន បានចូលមកក្នុងដែនទឹករបស់ខ្លួន ក្បែរប្រជុំកោះជម្លោះ Senkaku នៅក្នុងសមុទ្រចិនខាងកើត។ បើតាមមន្ត្រីជាន់ខ្ពស់ជប៉ុន កប៉ាល់យាមល្បាតចិន បានចូលមកក្នុងក្នុងដែនទឹកនេះ រយៈពេល៣ថ្ងៃហើយ។
កប៉ាល់យាមត្បាតចិន ចំនួនពីរគ្រឿង ត្រូវបានមន្ត្រីយាមល្បាតសមុទ្រជប៉ុនអះអាងថា បានចូលមកក្នុងដែនទឹកជប៉ុន នៅព្រឹកថ្ងៃទី១១ ខែតុលា ដោយបានបើកទៅក្បែរទូកនេសាទជប៉ុន ដែលមានមនុស្សចំនួន ៣នាក់។ មកទល់ពេលនេះ កប៉ាល់ត្បាតរបស់ចិន មិនទាន់ចាកចេញនៅឡើយទេ បើទោះបីជាមានការព្រមានឲ្យចាកចេញក៏ដោយ។ តំបន់ដែនទឹកនេះ គឺនៅក្បែរប្រជុំកោះគ្មានមនុស្សរស់នៅ Senkaku ដែលចិនហៅថា Diaoyu ។
ទាក់ទិននឹងបញ្ហានេះ លោក Katsunobu Kato ប្រធានលេខាធិការគណៈរដ្ឋមន្ត្រីជប៉ុន បានអះអាងថា នេះគឺជាសកម្មភាពគួរឲ្យស្តាយជាទីបំផុត ដែលកប៉ាល់យាមល្បាតចិន បានចូលមកក្នុងដែនទឹករបស់ជប៉ុន។ បញ្ហានេះ ប្រធានលេខាធិការគណៈរដ្ឋមន្ត្រី បានលើកឡើងថា ទីក្រុងតូក្យូតវ៉ាយ៉ាងដាច់ខាតទៅភាគីទីក្រុងប៉េកាំង និងទាមទារឲ្យកប៉ាល់ទាំងនោះ ដកចេញពីដែនទឹករបស់ខ្លួនជាបន្ទាន់។
តាមការចុះផ្សាយរបស់ទីភ្នាក់ងារព័ត៌មាន AP លោក Kato បានបន្ថែមថា ជប៉ុននឹងការពារដែនទឹក, ដែនដី និងដែនអាកាសរបស់ខ្លួនឲ្យបានម៉ឺងម៉ាត់បំផុត នៅក្នុងស្ថានភាពបន្ទាន់។ ចំណែកប្រជាជនជប៉ុន ដែលមានវត្តមាននៅលើទូកនេសាទ ក៏មានសុវត្ថិភាពផងដែរ។
កន្លងមកចិន ក៏ធ្លាប់ចូលមកក្នុងដែនទឹក ដែលជប៉ុនអះអាងថា ជាដែនទឹករបស់ខ្លួនដែរ ហើយជប៉ុនតែងតែព្រមានឲ្យកប៉ាល់ទាំងនោះ ចាកចេញពីដែនទឹកជាញឹកញាប់។ នៅដើមខែតុលានេះ ជប៉ុនក៏បានដាក់ការតវ៉ាទៅចិនផងដែរ ជុំវិញការដាក់ប្រជុំកោះ Senkaku នៅក្នុងសារមន្ទីរឌីជីថល (http://www.diaoyudao.org.cn/dydbwg.html) របស់ខ្លួន។ ជាការឆ្លើយតប ចិនថា ជប៉ុនគ្មានសិទ្ធិដាក់ការតវ៉ានេះទេ ព្រោះប្រជុំកោះ Senkaku នេះ គឺជាដែនទឹករបស់ចិន ដោយផ្អែកទៅតាមហេតុផលប្រវត្តិសាស្ត្រ និងច្បាប់។
ប្រជុំកោះគ្មានមនុស្សរស់នៅ Senkaku ត្រូវបានជប៉ុនអះអាងថា ខ្លួន បានគ្រប់គ្រងតាំងពីឆ្នាំ១៨៩០មកម្លេះ និងថា ចិនទើបតែបានចាប់ផ្តើមទាមទារប្រជុំកោះនេះ នៅក្នុងឆ្នាំ១៩៧០ ប៉ុណ្ណោះ ដោយសារតែធនធានធម្មជាតិត្រូវបានគេរុករកឃើញ៕
© រក្សាសិទ្ធិដោយ thmeythmey.com