សង្គមអន្តរជាតិ
អន្តរជាតិ
កូរ៉េខាងត្បូងថា ខ្លួនមានសមត្ថភាពស្ទាក់គ្រាប់រ៉ុក្កែតចម្រុះរបស់កូរ៉េខាងជើង រថយន្តផ្ទុករ៉ុក្កែតចម្រុះរបស់កូរ៉េខាងជើងនាព្យុហយាត្រាចុងសប្ដាហ៍មុន។ រូបភាព KCNA
× ដោយ៖ កង ម៉េងហុង
ក្រសួងការពារជាតិកូរ៉េខាងត្បូងបាន អះអាងនៅថ្ងៃទី ១៣ ខែតុលាន ថា យោធាកូរ៉េខាងត្បូងអាចឆ្លើយតបនិងប្រតិកម្មភ្លាមៗទៅនឹងកាំភ្លើងធំនិងមីស៊ីលរបស់កូរ៉េខាងជើងប្រសិនបើពួកគេត្រូវបានប្រើដើម្បីវាយប្រហារប្រទេសកូរ៉េខាងត្បូង។ ការអះអាងដូចនេះ ធ្វើឡើងបន្ទាប់ពីកូរ៉េខាងជើងបានបង្ហាញអាវុធថ្មីក្នុងអំឡុងពេលព្យុហយាត្រាកាលពីសប្តាហ៍ចុងមុន។
នៅថ្ងៃទី ១០ ខែតុលាប្រទេសកូរ៉េខាងជើងបានធ្វើព្យុហយាត្រាយោធាដ៏ធំមួយនៅក្នុងទីក្រុងព្យុងយ៉ាងដើម្បីប្រារព្ធខួបលើកទី៧៥ នៃការបង្កើតគណបក្សពលករកំពុងកាន់អំណាចរបស់ខ្លួន។ ក្រៅពីបង្ហាញមីស៊ីលអន្តរទ្វីបថ្មី (ICBM) និងមីស៊ីលផ្លោងឆ្លងទ្វីបដែលអាចបាញ់ចេញពីនាវាមុជទឹក (SLBM) កូរ៉រខាងជើងក៏បានបង្ហាញគ្រឿងការបាញ់រ៉ុកកែតដែលទើបនឹងបង្កើតថ្មីជាច្រើនគ្រាប់។
ពាក់ព័ន្ធបញ្ហានេះ ក្រសួងការពារជាតិកូរ៉េខាងត្បូងប្រកាសថា កូរ៉េខាងត្បូងមានសមត្ថភាពគ្រប់គ្រាន់ដើម្បីទប់ទល់។ ក្នុងសន្និសីទសារព័ត៌មានថ្ងៃទី១៣ ខែតុលា អ្នកនាំពាក្យក្រសួងការពារជាតិលោក Moon Hong-sik បាននិយាយថា យោធាអាចមានសមត្ថភាពស្ទាក់ចាប់មីស៊ីលទាំងនោះតាមរយៈ ប្រព័ន្ធស្ទាក់មីស៊ីល Patriot ហើយឆាប់ៗនេះប្រព័ន្ធមីស៊ីលបាញ់ពីដីទៅអាកាស M-SAM II នឹងដាក់ពង្រាយផងដែរ។
«ក្នុងករណីដែលមានការវាយប្រហារដំណាលគ្នា (ដោយមានមីស៊ីលប្រភេទផ្សេងៗគ្នា) យើងអាចឆ្លើយតប និងធ្វើឲ្យគ្រាប់មីស៊ីលទាំងនោះអសកម្មភ្លាមៗ ដោយមិនត្រឹមតែប្រើប្រាស់ប្រព័ន្ធការពារមីស៊ីលរបស់កូរ៉េផ្ទាល់ តែក៏មានបញ្ចូលប្រព័ន្ធវាយប្រហារយុទ្ធសាស្ត្រផ្សេងទៀតផងដែរ»។ នេះជាការបញ្ជាក់របស់លោក Moon ដែលផ្សាយដោយទីភ្នាក់ងារព័ត៌មាន Yonhap ។
សូមបញ្ជាក់ថា ក្នុងអំឡុងពេលធ្វើព្យុហយាត្រាចុងក្រោយនេះ កូរ៉េខាងជើងបានបង្ហាញនូវមីស៊ីលផ្លោងរយៈចម្ងាយខ្លី Iskander របស់រុស្ស៊ី និងប្រព័ន្ធបាញ់គ្រាប់រ៉ុក្កែតធំៗចម្រុះដែលត្រូបានបានបាញ់សាកល្បងជាច្រើនដងចាប់តាំងពីឆ្នាំ ២០១៩៕
Tag:
កូរ៉េខាងត្បូង
កូរ៉េខាងជើង
© រក្សាសិទ្ធិដោយ thmeythmey.com