អន្តរជាតិ
កាសែតNikkei៖ ជប៉ុន នឹងចុះកិច្ចព្រមព្រៀងលក់អាវុធជាមួយវៀតណាម នាយករដ្ឋមន្រ្តីជប៉ុន លោក ស៊ូហ្កា យូស៊ីហ៊ីដេ។ រូបភាព៖ AP
× ជប៉ុន គ្រោងចុះហត្ថលេខាលើកិច្ចព្រមព្រៀងមួយវៀតណាមដែលអនុញ្ញាតជប៉ុនឲ្យនាំចេញឧបករណ៍ការពារ និងបច្ចេកវិទ្យាយោធាទៅកាន់វៀតណាម។ នេះបើតាមការចុះផ្សាយរបស់សារព័ត៌មាន Nikkei Asia នៅថ្ងៃទី១៤ ខែតុលា។ កិច្ចព្រមព្រៀងនេះ ជាផ្នែកមួយនៃការពង្រឹងសមត្ថភាពការពារជាតិប្រទេសឥណ្ឌូ-បាស៊ីហ្វិក ដើម្បីប្រឆាំងនឹងសកម្មភាពរបស់ចិន នៅក្នុងសមុទ្រចិនខាងត្បូង។
ប្រមុខរដ្ឋាភិបាលជប៉ុនថ្មី លោក ស៊ូហ្កា យូស៊ីហ៊ីដេ នៅថ្ងៃទី១៣ ខែតុលា បានប្រកាសថា លោក នឹងធ្វើដំណើរទស្សនកិច្ចមកវៀតណាម និងឥណ្ឌូណេស៊ី នៅសប្តាហ៍ក្រោយ ដើម្បីពង្រឹងចំណងទំនាក់ទំនងទ្វេភាគី។ នេះជាទស្សនកិច្ចទៅក្រៅប្រទេសលើកដំបូងរបស់នាយករដ្ឋមន្ត្រីជប៉ុនថ្មី បន្ទាប់ពីឡើងកាន់តំណែង។ ក្នុងដំណើរទស្សនកិច្ចនៅវៀតណាម ជប៉ុន នឹងចុះហត្ថលេខាលើការនាំចេញអាវុធមកវៀតណាម។
ក្នុងដំណើរទស្សនកិច្ចនេះដែរ ប្រធានបទនៃកិច្ចសហប្រតិបត្តិការលើវិស័យសន្តិសុខ អាចនឹងលើកយកមកជជែក ក្នុងជំនួបប្រមុខដឹកនាំជប៉ុន និងវៀតណាម ស្របពេលទីក្រុងហាណូយ កំពុងមានជម្លោះលើបញ្ហាសមុទ្រចិនខាងត្បូងជាមួយទីក្រុងប៉េកាំង។ កន្លងមក ចិនបានធ្វើសមយុទ្ធយោធាយ៉ាងខ្លាំងនៅក្នុងសមុទ្រចិនខាងត្បូង ដែលបង្កឲ្យវៀតណាមមិនសប្បាយចិត្តឡើយ។
សូមបញ្ជាក់ថា កាលពីឆ្នាំ២០១៤កន្លងទៅ ជប៉ុន បានលើកចោលបម្រាមហាមឃាត់នាំចេញអាវុធទៅបរទេស ដោយផ្អែកលើគោលការណ៍ចំនួន៣ ក្នុងនោះមានការមិនលក់អាវុធឲ្យភាគីជម្លោះ, ការលក់អាវុធត្រូវតែមានពាក់ព័ន្ធនឹងសន្តិសុខរបស់ជប៉ុន និងការផ្ទេរអាវុធ ដែលទិញពីជប៉ុនពីភាគីទី២ ទៅភាគីទី៣ ត្រូវមានការឯកភាពពីជប៉ុន។
គិតត្រឹមឆ្នាំ ២០១៤មក ជប៉ុន បានសម្រេចកិច្ចព្រមព្រៀងនាំចេញអាវុធតែជាមួយហ្វីលីពីនមួយប៉ុណ្ណោះ។ កិច្ចព្រមព្រៀងជាមួយហ្វីលីពីននេះ មានការនាំចេញប្រព័ន្ធរ៉ាដាគ្រប់គ្រង់ និងប្រកាសអាសន្ន ដែលមានក្រុមហ៊ុន Mitsubishi Electric ជាភាគីផ្គត់ផ្គង់ឲ្យហ្វីលីពីន។ ក្រៅពីហ្វីលីពីន និងវៀតណាម ជប៉ុនក៏កំពុងចរចាកិច្ចព្រមព្រៀងនាំចេញអាវុធ ជាមួយថៃ និងឥណ្ឌូណេស៊ីផងដែរ។ កន្លងមកជប៉ុន បានផ្សព្វផ្សាយយ៉ាងខ្លាំងពីយន្តហោះល្បាត P-1 និងយន្តហោះដឹកជញ្ជូន C-2។
តាមទិន្នន័យរបស់វិទ្យាស្ថានស្រាវជ្រាវសន្តិភាពអន្តរជាតិទីក្រុងស្តុកខុល(SIPRI) វៀតណាម បានទិញអាវុធប្រមាណ ៨០ភាគរយពីរុស្ស៊ី ក្នុងរយៈពេលមួយទសវត្សរ៍ចុងក្រោយនេះ។
សូមបញ្ជាក់ថា បន្ទាប់ពីចូលកាន់តំណែងជានាយករដ្ឋមន្ត្រីជាលើកទី២ នៅក្នុងឆ្នាំ២០១២ លោក អាបេ ស៊ិនហ្សូ ក៏ធ្លាប់ទស្សនកិច្ចមកវៀតណាម និងឥណ្ឌូណេស៊ីមុនគេផងដែរ៕
© រក្សាសិទ្ធិដោយ thmeythmey.com