អន្តរជាតិ
ជប៉ុន ដាក់បង្ហាញនាវាមុជទឹកឈ្លបការណ៍ដែលមានរហស្សនាមថា ត្រីបាឡែន នាវាមុជទឹកជប៉ុនទី២២ Taigei។ រូបភាព៖ Kyodo
× ជប៉ុន នៅថ្ងៃទី១៤ ខែតុលា បានដាក់បង្ហាញនាវាមុជថ្មីរបស់ខ្លួន នៅកន្លែងសាងសង់នាវានៅភាគខាងលិចនៃប្រទេស។ នេះគឺជានាវាមុជទី២២ របស់ជប៉ុន ដែលគ្រោងនឹងដាក់ឲ្យដំណើរការនៅក្នុងឆ្នាំ២០២២ ខាងមុខ។
នាវាមុជទឹក ដែលមានទម្ងន់៣០០០តោន ត្រូវបានសាងសង់ដោយក្រុមហ៊ុន Mitsubishi។ នាវាមុជទឹក ឈ្មោះ Taigei នេះ នឹងដាក់ឲ្យដំណើរការក្នុងកងកម្លាំងស្វ័យការពារជើងទឹកជប៉ុន នៅខែមីនា ឆ្នាំ២០២២ ខាងមុខ។ ឈ្មោះ Taigei មានន័យថា ត្រីបាឡែន ក្នុងភាសាជប៉ុន។
តាមការចុះផ្សាយរបស់ទីភ្នាក់ងារព័ត៌មានជប៉ុន Kyodo នាវាមុជទឹកមួយគ្រឿងនេះ មានប្រវែង ៨៤ម៉ែត្រ កម្ពស់ ៩,១ម៉ែត្រ និងចំណាយថវិកាប្រមាណ ៧២០លានដុល្លារ។ នាវាប្រភេទនេះ មានបំពាក់អាគុយប្រភេទ Lithium Ion ដែលអាចស្ថិតនៅក្នុងទឹកបានរយៈពេលយូរ ជាងនាវាមុជទឹករបស់ជប៉ុនមុនៗ និងអាចផ្ទុកកងនាវិក បានចំនួន ៧០នាក់។ នាវាមុជទឹកនេះ ត្រូវបានសាងសង់បែបជានាវាឈ្លបការណ៍។
ដោយផ្អែកទៅតាមការណែនាំកម្មវិធីការពារជាតិឆ្នាំ២០១០ ជប៉ុន បានដាក់គោលដៅបង្កើនចំនួននាវាមុជទឹកពី ១៦គ្រឿង មក២២គ្រឿង ដើម្បីការពារ និងប្រឆាំងសកម្មភាពរបស់ចិន នៅក្នុងសមុទ្រចិនខាងកើត ក៏ដូចជាប្រជុំកោះមានជម្លោះជាមួយចិន។
បច្ចុប្បន្ន ជប៉ុន បានដាក់ឲ្យដំណើរការនាវាមុជទឹកប្រភេទ Oyashio ចំនួន ៩គ្រឿង និងនាវាមុជទឹកប្រភេទ Soryu ចំនួន ១១គ្រឿង។ នៅឆ្នាំ២០២១ ជប៉ុនគ្រោងដាក់ឲ្យដំណើរការនាវាមុជទឹកប្រភេទ Soryu មួយគ្រឿងទៀត។
សូមបញ្ជាក់ថា ការដាក់បង្ហាញនាវាមុជទឹកជាសាធារណៈបែបនេះ ធ្វើឡើងបន្ទាប់ពីនាវាល្បាតចិន ទើបតែចាកចេញពីតំបន់ ដែលជប៉ុនអះអាងថាជាដែនទឹករបស់ខ្លួន នៅក្បែរប្រជុំកោះSekaku ស្ថិតនៅក្នុងសមុទ្រចិនខាងកើត៕
© រក្សាសិទ្ធិដោយ thmeythmey.com