សង្គមអន្តរជាតិ
អន្តរជាតិ
រដ្ឋាភិបាលថៃចេញក្រឹត្យអាសន្នហាមការជួបជុំ ដើម្បីបិទផ្លូវការធ្វើបាតុកម្មរបស់យុវជន ប៉ូលីសថៃ និងបាតុករ។ រូបភាព៖ AFP
× ប៉ូលិសថៃ នៅព្រឹកថៃទី១៥ តុលានេះ បានបណ្តេញបាតុករចេញពីទីតាំងជុំវិញអាគាររដ្ឋាភិបាល ស្របពេលដែលរដ្ឋាភិបាលថៃបានចេញក្រឹត្យអាសន្នហាមការជួបជុំចាប់ពី៥នាក់ឡើងទៅ និងការផ្សព្វផ្សាយព័ត៌មានទាំងឡាយណាដែលបណ្តាលឲ្យប៉ះពាល់ដល់សណ្តាប់ធ្នាប់។ ក្រឹត្យអាសន្នរបស់រដ្ឋាភិបាលនេះ មានបំណងក្នុងការបញ្ចប់បាតុកម្មដែលរៀបចំដោយក្រុមយុវជន និងអ្នកប្រជាធិបតេយ្យអស់រយៈពេលជាង៣ខែមកហើយ។
នៅយប់ថ្ងៃទី១៤ ខែតុលា បាតុករបានជម្នះការហាមប្រាមរបស់ប៉ូលិស ដោយបានទៅជួបជុំព័ទ្ធអាគាររដ្ឋាភិបាលថៃ និងទាមទារឲ្យលោកប្រាយុទ្ធ ចន្ទអូចា នាយករដ្ឋមន្ត្រីថៃចុះចេញពីតំណែង។ ជាការឆ្លើយតប រដ្ឋាភិបាលថៃបានចេញក្រឹត្យអាសន្នហាមមិនឲ្យមានការជួបជុំលើសពី៥នាក់តែម្ដង។
ទូរទស្សន៍ជាតិថៃ បានប្រកាសថា៖«វាជារឿងចាំបាច់ណាស់ដែលគេត្រូវដាក់ចេញនូវវិធានការបន្ទាន់ ដើម្បីបញ្ចប់ស្ថានការណ៍នេះ និងដើម្បីធានាសន្តិភាព និងសណ្តាប់ធ្នាប់»។ ក្រឹត្យអាសន្ននេះ ក៏អមដោយបម្រាមមិនឲ្យមានការជួបជុំនៅទីកន្លែងដែលកំណត់ទុកដោយអាជ្ញាធរ។ ក្រឹត្យនេះក៏ហាមការផ្សព្វផ្សាយព័ត៌មាន និងព័ត៌មានបែបអេឡិចត្រូនិក ដែលខ្លឹមសារបង្កើតភាពភ័យខ្លាច ឬមានបំណងបំភ្លៃព័ត៌មាន បង្កើតការយល់ច្រឡំ ដែលប៉ះពាល់ដល់សន្តិសុខជាតិ ឬសន្តិភាព និងសណ្តាប់ធ្នាប់។
ក្រោយពេលដែលក្រឹត្យអាសន្ននេះ ចូលជាធរមានភ្លាម ប៉ូលិសបង្ក្រាបបាតុកម្មប្រកបដោយខែលចាប់ផ្តើមសំដៅទៅអាគាររដ្ឋាភិបាល ដែលបាតុករជួបជុំគ្នានៅទីនោះ។ ការប្រទាញប្រទង់រវាងបាតុករ និងប៉ូលិស បានកើតឡើងនៅទីតាំង ត្បិតអីបាតុករព្យាយាមចង់បន្តព័ទ្ធអាគាររដ្ឋាភិបាល ប៉ុន្តែត្រូវបានបំបែក និងបណ្តេញដោយប៉ូលិសពីទីនោះ។
ចាប់តាំងតែពីមានបាតុកម្មមក ប៉ូលីសបានចាប់ខ្លួនបាតុករចំនួន១៩នាក់ ចំណែកក្រោយពេលបំបែកហ្វូងបាតុករ ប៉ូលិសថៃបានចាប់ខ្លួនមេដឹកនាំបាតុកម្មចំនួន៣នាក់បន្ថែមទៀត។ ក្រុមបាតុករ និងអ្នកសារព័ត៌មានបានអះអាងថា មានមនុស្សយ៉ាងហោចណាស់២ម៉ឺននាក់ចូលរួមបាតុកម្មនៅថ្ងៃទី១៤ តុលា តែប៉ូលីសថៃបញ្ជាក់ថា មានត្រឹមតែ៨ពាន់នាក់ប៉ុណ្ណោះ។
ទោះជាបាតុកម្មត្រូវបានបំបែកក្តី កញ្ញា Panusaya Sithijirawattanakul មេដឹកនាំបាតុកម្មមួយរូបទៀតបានទទូចឲ្យបាតុករដទៃទៀតជួបជុំគ្នាសារជាថ្មីនៅថ្ងៃទី១៥ ខែតុលានេះ នៅវេលាម៉ោង៤រសៀល។ លោក Krissana Pattanacharoen អ្នកនាំពាក្យប៉ូលិសថៃ អះអាងថាអំពើខុសច្បាប់ក៏ដោយ។
សម្រាប់ការតវ៉ាថ្ងៃទី១៤ ខែតុលា បាតុករមានការទាមទារធំៗចំនួន២ គឺឲ្យនាយករដ្ឋមន្ត្រីចុះចេញពីតំណែង និងវិសោធនកម្មរដ្ឋធម្មនុញ្ញដើម្បីកាត់បន្ថយអំណាចព្រះមហាក្សត្រថៃ៕
© រក្សាសិទ្ធិដោយ thmeythmey.com