ជាតិ
សង្គមជាតិ
សេដ្ឋកិច្ច
កសិដ្ឋានវារីវប្បកម្មរាប់រយកន្លែង រងប៉ះពាល់ដោយសារជំនន់ទឹកភ្លៀង
× កសិដ្ឋានវារីវប្បកម្មជាង១៦០កន្លែង បានរងប៉ះពាល់ដោវយសារជំនន់ទឹកភ្លៀង ក្នុងនោះត្រីនៅកសិដ្ឋានវារីវប្បកម្មចំនួន២ ក្នុងខេត្តពោធិ៍សាត់ និងបាត់ដំបង បានហូរតាមទឹកទាំងស្រុង។ នេះបើតាមលោក សុខ រ៉ាដែន ប្រធានក្រុមប្រឹក្សាភិបាលនៃសមាគមវារីវប្បករនៅកម្ពុជា ប្រាប់សារព័ត៌មានថ្មីៗ២៥ នៅថ្ងៃទី១៣ ខែតុលា ឆ្នាំ២០២០។
តាមលោក សុខ រ៉ាដែន កសិដ្ឋានវារីវប្បកម្មទាំង ១៦៣ គឺជាសមាជិករបស់សមាគមវារីវប្បករកម្ពុជា ក្នុងនោះអ្នកដែលរងគ្រោះជាងគេគឺអ្នកចិញ្ចឹមត្រី និងភ្ញាស់កូនត្រីក្នុងខេត្តបាត់ដំបងម្នាក់ និងខេត្តពោធិ៍សាត់ម្នាក់។ យ៉ាងណាមិញលោកក៏មិនទាន់អាចកំណត់ពីទំហំនៃការខូចខាត របស់វារីវប្បករនោះដែរ រង់ចាំស្ថានភាពនៃទឹកជំនន់បន្តទៀត ខណៈកសិដ្ឋាននីយមួយ មានការខូចខាតផ្សេងៗគ្នា។ នេះបើតាមលោក សុខ រ៉ាដែន ប្រាប់Thmeythmey25។
បើតាមរបាយការណ៍របស់គណៈកម្មាធិការជាតិគ្រប់គ្រងគ្រោះមហន្តរាយ នៅថ្ងៃទី១៣ ខែតុលា គ្រោះទឹកជំនន់នេះ ធ្វើឱ្យលិចផលដំណាំរបស់ពលរដ្ឋជាង១២ម៉ឺនហិកតា។ ក្នុងនោះដំណាំស្រូវ ជិត ៨ម៉ឺនហិកតា និងដំណាំផ្សេងៗ ជាង៤ម៉ឺនហិកតា។ ក្រៅពីផលដំណាំ ក៏បានបំផ្លាញផ្លូវ និងស្ពានជាច្រើន និងបណ្ដាលឲ្យពលរដ្ឋ ១៣នាក់បាត់បង់ជីវិតផងដែរ។
រាជធានី-ខេត្ត ដែលរងគ្រោះដោយសារទឹកជំនន់មាន រាជធានីភ្នំពេញ ខេត្តតាកែវ កំពង់ស្ពឺ, ស្ទឹងត្រែង ,កំពង់ចាម ,ពោធិ៍សាត់,សៀមរាប, បាត់ដំបង, បន្ទាយមានជ័យ, ឧត្តរមានជ័យ, ព្រះវិហារ, ប៉ៃលិន, កោះកុង, ព្រះសីហនុ , ស្វាយរៀង និងខេត្តមណ្ឌលគិរី៕
Tag:
ជាតិ
ទឹកជំនន់
វារីវប្បកម្ម
បាត់ដំបង
ពោធិ៍សាត់
© រក្សាសិទ្ធិដោយ thmeythmey.com