សង្គមអន្តរជាតិ
អន្តរជាតិ
ទោះកូរ៉េខាងជើងបង្ហាញមីស៊ីលអន្តរទ្វីបថ្មី លោក ប៉ុមប៉េអូ ថា ការទូតជាមួយកូរ៉េខាងជើងជោគជ័យ លោក ម៉ៃ ប៉ុមប៉េអូ រដ្ឋមន្រ្តីការបរទេសអាមេរិក។ រូបភាព៖ Reuters
× ប្រមុខការទូតអាមេរិក លោក ម៉ៃ ប៉ុមប៉េអូ នៅថ្ងៃទី១៤ ខែតុលា បានលើកឡើងថា នយោបាយការទូតជាមួយកូរ៉េខាងជើង ទទួលបានជោគជ័យក្នុងការកាត់បន្ថយការគំរាមកំហែងនៅក្នុងអាណត្តិរបស់ប្រធានាធិបតី ដូណាល់ ត្រាំ ។ ការលើកឡើងរបស់រដ្ឋមន្ត្រីការទូតអាមេរិកបែបនេះ ធ្វើឡើងបន្ទាប់ពីកូរ៉េខាងជើងទើបតែដាក់បង្ហាញមីស៊ីលបាលីស្ទិកអន្តរទ្វីប(ICBM) នៅថ្ងៃខួបបក្សពលករកូរ៉េខាងជើងលើកទី៧៥ កាលពីចុងសប្ដាហ៍មុន។
តាមរយៈសន្និសីទសារព័ត៌មាននៅថ្ងៃទី១៤ ខែតុលា លោក ម៉ៃ ប៉ុមប៉េអូ រដ្ឋមន្ត្រីការបរទេសអាមេរិក ត្រូវបានគេចោទជាសំណួរជុំវិញគោលនយោបាយការទូតរបស់អាមេរិកជាមួយកូរ៉េខាងជើង។ ជាការឆ្លើយតប ប្រមុខការទូតអាមេរិករូបនេះ បានអះអាងថា លោកជឿជាក់យ៉ាងខ្លាំងថា ការទូតទីក្រុងវ៉ាស៊ីនតោន ជាមួយទីក្រុងព្យុងយ៉ាង ទទួលបានជោគជ័យយ៉ាងខ្លាំង។
បើតាមលោកប៉ុមប៉េអូ ការទទួលជោគជ័យនេះ គឺការទូតអាមេរិកក្រោមអាណត្តិប្រធានាធិបតី លោកដូណាល់ ត្រាំ អាចកាត់បន្ថយការគំរាមកំហែងពីសំណាក់កូរ៉េខាងជើង បើទោះបីជាទីក្រុងព្យុងយ៉ាង ទើបតែដាក់បង្ហាញមីស៊ីលបាលីស្ទិកអន្តរទ្វីបថ្មីៗនេះ។ មីស៊ីលអន្តរទ្វីបថ្មី ត្រូវបានដឹកដោយឡានកង់២២ ហើយដើរដោយឥន្ធនៈធំជាងគេបំផុតអំឡុងខួបបក្សពលករលើកទី៧៥។
ទាក់ទិននឹងការដាក់បង្ហាញមីស៊ីលកូរ៉េខាងជើង ប្រមុខការទូតអាមេរិក បានអះអាងថា វាមិនមែនជាបញ្ហាចោទសម្រាប់អាមេរិកទេ ព្រោះដើម្បីដឹងថា មីស៊ីលអន្តរទ្វីបនោះ អាចដំណើរការបានឬអត់ គឺទាល់តែធ្វើតេស្តសាកល្បង។
«អ្វីសំខាន់បំផុត ដែលគេត្រូវធ្វើ ដើម្បីប្រាកដថាមីស៊ីលអាចដំណើរការឬអត់ គឺត្រូវសាកល្បងមីស៊ីលទាំងនោះ»។ លោកប៉ុមប៉េអូ បានលើកឡើងបែបនេះ ដោយបន្ថែមថា ក្នុងរយៈពេល២ឆ្នាំចុងក្រោយនេះ កូរ៉េខាងជើង មិនធ្លាប់ធ្វើតេស្តលើមីស៊ីលបាលីស្ទិកអន្តរទ្វីបឡើយ ប៉ុន្តែចិនឯណោះទេ ដែលធ្វើតេស្តមីស៊ីលជាច្រើនគ្រាប់។ នេះបើតាមការចុះផ្សាយរបស់ទីភ្នាក់ងារព័ត៌មាន Kyodo។
កូរ៉េខាងជើងបានសាកល្បងមីស៊ីលបាលីស្ទិកអន្តរទ្វីបចុងក្រោយនៅក្នុងឆ្នាំ២០១៧ ដែលអាចនាំក្បាលគ្រាប់ដល់ទឹកដីអាមេរិក។ កូរ៉េខាងជើង បានផ្អាកការសាកល្បងមីស៊ីលមួយរយៈ បន្ទាប់ពី មេដឹកនាំ លោក គីម ជុងអ៊ុន បានយល់ព្រមចូលតុចរចារំសាយកម្មវិធីនុយក្លេអ៊ែរជាមួយ លោក ត្រាំ នៅសិង្ហបុរី និងវៀតណាម។ ប៉ុន្តែបន្ទាប់ពីកិច្ចចរចាទាំងនោះ កូរ៉េខាងជើង បានចាប់ផ្តើមសាកល្បងមីស៊ីលបាលីស្ទិកចម្ងាយខ្លី ជើងទម្របាញ់មីស៊ីល និងមីស៊ីលផ្សេងទៀតឡើងវិញ។
ក្នុងថ្ងៃទី១៤ ខែតុលាដដែលនេះ ទីប្រឹក្សាសន្តិសុខជាតិកូរ៉េខាងត្បូង លោក Suh Hoon បានធ្វើទស្សនកិច្ចទៅអាមេរិក និងជួបជាមួយសមភាគីអាមេរិក លោក Robert O'Brien ផងដែរ។ តាមការចុះផ្សាយរបស់ទីភ្នាក់ងារព័ត៌មាន Yonhap ទស្សនកិច្ចនេះ គឺមិនបានប្រកាសជាមុនឡើយ ហើយរបៀបវារៈ ក៏មិនមាននរណាដឹងផងដែរ។ យ៉ាងណាក៏ដោយ បញ្ហាកូរ៉េខាងជើង និងសេចក្តីប្រកាសបញ្ចប់សង្គ្រាមលើឧបទ្វីបកូរ៉េ អាចជាប្រធានបទនៃជំនួបមន្ត្រីជាន់ខ្ពស់ប្រទេសទាំងពីរ៕
Tag:
កូរ៉េខាងជើង
អាមេរិក
© រក្សាសិទ្ធិដោយ thmeythmey.com