សង្គមអន្តរជាតិ
អន្តរជាតិ
រដ្ឋមន្ត្រីការបរទេសរុស្ស៊ី ស្នើបញ្ជូនយោធារុស្ស៊ីទៅឃ្លាំមើលបទឈប់បាញ់អាមេនី-អាស៊ែបៃហ្សង់
× រដ្ឋមន្ត្រីការបរទេសរុស្ស៊ី នៅថ្ងៃទី១៤ តុលានេះបានលើកជាសំណើថា រុស្ស៊ីចង់បញ្ជូនកងរក្សាសន្តិភាពរបស់ខ្លួនទៅសង្កេតមើលបទឈប់បាញ់រវាងអាមេនី និងអាស៊ែបៃហ្សង់។ ការលើកឡើងរបស់ប្រមុខការបរទេសរុស្ស៊ីនេះ ធ្វើឡើងក្រោយមានការប៉ះទង្គិចគ្នាជាថ្មីរវាងប្រទេសទាំង២ ដែលជាការបំពានបទឈប់បាញ់ឯកភាពគ្នានៅរុស្ស៊ី ស្របពេលដែលជម្លោះបានអូសបន្លាយជិតបីសប្តាហ៍មកហើយ។
នាថ្ងៃទី១០ តុលា អាមេនី និងអាស៊ែបៃហ្សង់បានយល់ព្រមលើបទឈប់បាញ់ ដោយមានរុស្ស៊ីជាអ្នកសម្របសម្រួល។ ទោះជាមានបទឈប់បាញ់ក្តី ការប៉ះទង្គិចគ្នារវាងភាគីទាំងសងខាងនៅបន្តមាន និងចោទគ្នាទៅវិញទៅមកថាជាអ្នករំលោភបទឈប់បាញ់។ បទឈប់បាញ់ខាងលើ មានបំណងក្នុងការដោះដូរអ្នកទោសសង្គ្រាម ក៏ដូចជាយកសាកសពទាហានដែលបាត់បង់ជីវិត។
ក្នុងន័យធានាឲ្យភាគីទាំង២ គោរពបទឈប់បាញ់ លោក Sergei Lavrov រដ្ឋមន្ត្រីការបរទេសរុស្ស៊ី លើកជាគំនិតឲ្យបញ្ជូនយោធារុស្ស៊ីទៅឃ្លាំមើលសកម្មភាពយោធាអាមេនី និងអាស៊ែបៃហ្សង់នៅតំបន់ Nagorno-Karabakh ។ លោកលើកឡើងថា៖«មិនចាំបាច់កងរក្សាសន្តិភាពទេ ប៉ុន្តែ(វត្តមាន)ទាហានសង្កេតការណ៍គឺគ្រប់គ្រាន់ ហើយជារឿងត្រឹមត្រូវបើសិនជាទាហានសង្កេតការណ៍ ជាទាហានរុស្ស៊ី។ នេះបើតាមការផ្សាយរបស់សារព័ត៌មានរុស្ស៊ី Sputnik។
ទោះជាយ៉ាងណាក្តី ប្រមុខកាបរទេសរុស្ស៊ីអះអាងថា ការទទួលយកទាហានរុស្ស៊ីគឺអាស្រ័យទៅលើភាគីទាំងពីរ។ លោកLavrov ក៏បន្ថែមផងដែរថា អាមេនី និងអាស៊ែបៃហ្សង់ចាំបាច់ជជែកគ្នា ដើម្បីបង្កើតយន្តការឃ្លាំមើល និងអនុវត្តបទឈប់បាញ់ដែលព្រមព្រៀងនៅឯទីក្រុងមូស្គូ។ លោកLavrov ក៏បានសង្កត់ធ្ងន់ដែរថា បើសិនជាគ្មានដំណោះស្រាយនយោបាយទេ នោះដំណោះស្រាយយោធានៅតំបន់ Nagorno-Karabakh ក៏នឹងមិនដំណើរការដែរ។
ប្រធានាធិបតីអាស៊ែបៃហ្សង់ លោក Ilham Aliyev គាំទ្រគំនិតនេះ តែបញ្ជាក់ថា កងរក្សាសន្តិភាពអាចនឹងបញ្ជូនទៅដរាបណាប្រទេសទាំង២យល់ព្រម។ ប្រធានាធិបតីអាស៊ែបៃហ្សង់ ក៏ចង់បានវត្តមានតួកគីនៅក្នុងការចចារ ទោះជាតាមវិធីណាក៏ដោយ។
ថ្វីត្បិតតែមានបទឈប់បាញ់ក្តី អាមេនីបានចោទអាស៊ែបៃហ្សង់ថាបានវាយប្រហារសម្ភារៈយោធាដែលស្ថិតក្នុងទឹកដីរបស់ខ្លួន ដោយគំរាមថាអាមេនីក៏មានសិទ្ធិក្នុងការវាយប្រហារទាហានអាស៊ែបៃហ្សង់ ក្នុងទឹកដីអាស៊ែបៃហ្សង់ផងដែរ។ ចំណែកអាស៊ែបៃហ្សង់វិញអះអាងថា ខ្លួននឹងតបតទៅអាមេនីវិញ បើមានការវាយប្រហារលើមូលដ្ឋានយោធា និងស៊ីវិល។
ការប្រយុទ្ធគ្នារវាងអាមេនី និងអាស៊ែបៃហ្សង់ ផ្ទុះឡើងនៅថ្ងៃទី២៧ ខែកញ្ញា នៅក្នុងតំបន់Nagorno-Karabakh ក្នុងទឹកដីអាស៊ែបៃហ្សង់។ ទាក់ទងតួលេខចុងក្រោយ ការិយាល័យរដ្ឋអាជ្ញាអាស៊ែបៃហ្សង់អះអាងថា មានជនស៊ីវិលខ្លួនចំនួន៤៣នាក់ខ្លាប់ ខណៈ ២១៤នាក់រងរបួស។ ចំណែក តំបន់ផ្តាច់ខ្លួន Nagorno-Karabakh អះអាងថាមានទាហានស្លាប់ចំនួន៥៣២នាក់ និងស្លាប់ជនស៊ីវិលចំនួន៣២នាក់៕
Tag:
រុស្ស៊ី
អាមេនី
អាស៊ែបៃហ្សង់
© រក្សាសិទ្ធិដោយ thmeythmey.com