ជាតិ
សង្គមជាតិ
រដ្ឋមន្ត្រីអប់រំ ណែនាំឲ្យត្រៀមទុកដាក់សៀវភៅ និងសម្ភារទៅទីទួលសុវត្ថិភាពសម្រាប់សាលាដែលរងគ្រោះទឹកជំនន់
×![]()
ភ្នំពេញ៖ សាលារៀនមួយចំនួនត្រូវបានផ្អាកឲ្យសិស្សចូលរៀនបណ្តោះអាសន្នសិន ដោយសារទឹកជំនន់។ លោក ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡាបានប្រាប់ទៅគណៈគ្រប់គ្រងគ្រឹះស្ថានសិក្សាដែលស្ថិតនៅតំបន់គ្រោះទឹកជំនន់ ត្រូវត្រៀមលក្ខណៈរៀបចំទុកដាក់ជាមុននូវឯកសារ សៀវភៅ សម្ភារ និងគ្រឿងបរិក្ខារអេឡិចត្រូនិកទៅទីទួលសុវត្ថិភាព។ 
«ត្រូវរកកន្លែងសុវត្ថិភាពដើម្បីរក្សាទុក ឲ្យជៀសផុតពីការលិចលង់ខូចខាត និងប៉ះពាល់អាយុជីវិតបុគ្គលិកសិក្សា និងសិស្សានុសិស្សជាយថាហេតុ»។ នេះជាសារណែនាំរបស់លោក ហង់ជួន ណារ៉ុន រដ្ឋមន្ត្រីក្រសួងអប់រំ ដែលប្រាប់ទៅគណៈគ្រប់គ្រងគ្រឹះស្ថានសិក្សាឲ្យត្រូវតាមដានព័ត៌មានពីស្ថានភាពអាកាសធាតុ និងទឹកជំនន់ជាប្រចាំ និងឲ្យគ្រូ និងសិស្សត្រូវប្រុងប្រយ័ត្ននឹងគ្រោះទឹកជំនន់។
រដ្ឋមន្ត្រីអប់រំបានណែនាំឲ្យគ្រឹះស្ថានសិក្សាដែលកំពុងជន់លិចនោះ ត្រូវឲ្យគ្រូបន្តបង្រៀនសិស្សតាមអនឡាញ ដើម្បីធានានិរន្តភាពនៃការសិក្សារបស់សិស្សគ្រប់កម្រិតថ្នាក់។
លោក ហង់ជួន ណារ៉ុន បានប្រាប់ឲ្យគ្រឹះស្ថានសិក្សាដែលកំពុងតែជន់លិច ត្រូវណែនាំដល់សិស្សានិសិស្សកុំចុះលេងទឹកនៅតំបន់ទឹកជំនន់ និងតំបន់ដែលទឹកហូរខ្លាំង ដើម្បីជៀសវាងគ្រោះថ្នាក់ដោយអាយុជីវិត។ ក្នុងករណីដែលសិស្ស និងគ្រូ ចង់ធ្វើដំណើរគឺត្រូវប្រើអាវពោង ឬប៊ីដុង។ ពេលកូនទៅរៀន គឺឪពុកម្តាយត្រូវជូនកូនទៅសាលា និងទៅទទួលកូនពីសាលាមកវិញផងដែរ។
ដើម្បីទប់ស្កាត់ និងការពារពីហេតុការណ៍គ្រោះថ្នាក់ដោយសារទឹកជំនន់ លោករដ្ឋមន្ត្រីអប់រំបានណែនាំ ឲ្យគណៈគ្រប់គ្រងសាលានីមួយៗត្រូវរាយការណ៍ និងផ្តល់ព័ត៌មានពីផលប៉ះពាល់របស់សាលារៀននីមួយៗតាមរយៈមន្ត្រីបង្គោល ការិយាល័យអប់រំនៃរដ្ឋបាលក្រុង ស្រុក ខណ្ឌ និងមន្ទីរអប់រំ រាជធានីខេត្ត។
ក្រោយពេលទឹកជំនន់មានការថមថយ និងស្រកអស់ លោករដ្ឋមន្ត្រីអប់រំបានណែនាំឲ្យគណៈគ្រប់គ្រងសាលារៀនដែលបានជន់លិចនោះ ត្រូវដឹកនាំកម្លាំងសម្អាតបរិស្ថានសាលារៀន និងបន្ទប់រៀនឡើងវិញ។ និងរៀបចំជួលជុលតុ កៅអី ក្តារខៀន ទូ សម្ភារបរិក្ខារប្រើប្រាស់ឡើងវិញផងដែរ។
យោងតាមរបាយការណ៍របស់គណៈកម្មាធិការគ្រប់គ្រងគ្រោះមហន្តរាយដែលគិតត្រឹមថ្ងៃទី១៥ ខែតុលា សាលារៀនចំនួន៤២៥កន្លែងត្រូវបានជន់លិច៕
Tag:
ទឹកជំនន់
សាលារៀន
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
5 ថ្ងៃ
