ជាតិ
សង្គមជាតិ
អនីតិជនជិត៤៧០នាក់នៅព្រៃស ត្រូវបញ្ជូនទៅ PJ ដោយសារជន់លិច លោក នុត សវនា អ្នកនាំពាក្យអគ្គនាយកដ្ឋានពន្ធនាគារ
× ជំនន់ទឹកភ្លៀង បានហូរទៅដល់មណ្ឌលអប់រំកែប្រែ២ (ម២) នៃពន្ធនាគារព្រៃស។ លោក នុត សវនា អ្នកនាំពាក្យអគ្គនាយកដ្ឋានពន្ធនាគារ ប្រាប់ថា អ្នកជាប់ជាអនីតិជន (ក្រោម១៨ឆ្នាំ) និង អ្នកជាប់ឃុំជាស្ត្រី១៤២៥នាក់ នៃមណ្ឌលអប់រំក្រែប្រែ២ ត្រូវបានបញ្ជូនទៅកាន់កន្លែងឃុំខ្លួន២ផ្សេងទៀតជាបណ្តោះអាសន្ន នៅពីថ្ងៃម្សិលមិញ (១៤តុលា)។
បើតាមលោក នុត សវនា ក្នុងចំណោមអ្នកជាប់ឃុំទាំង១៤២៥នាក់ មានស្ត្រី៩៥៦នាក់ ហើយក្រៅពីនេះ គឺសុទ្ធតែជាអនីតិជន (៤៦៩នាក់)។ លោក អះអាងថា ក្នុងចំណោមអ្នកជាប់ឃុំជាស្ត្រី៩៥៦នាក់នោះ អ្នកខ្លះ ត្រូវបានបញ្ជូនទៅឃុំនៅមណ្ឌលអប់រំកែប្រែ១ (ម១) នៃពន្ធនាគារព្រៃស ហើយអ្នកខ្លះទៀត ត្រូវបានបញ្ជូនទៅពន្ធនាគាររាជធានីភ្នំពេញ (PJ)។ លោក បន្តថា ចំណែកអ្នកជាប់ឃុំជាអនីតិជន៤៦៩នាក់ ត្រូវបានបញ្ជូនទៅពន្ធនាគាររាជធានីភ្នំពេញ។
យ៉ាងណា មណ្ឌលអប់រំក្រែប្រែ១ មណ្ឌលអប់រំកែប្រែ២ (ពន្ធនាគារព្រៃស) និង ពន្ធនាគាររាជធានីភ្នំពេញ ស្ថិតនៅមិនឆ្ងាយពីគ្នាឡើយ។
ក្នុងកិច្ចសម្ភាសជាមួយសារព័ត៌មានថ្មីៗ តាមទូរស័ព្ទ នារសៀលថ្ងៃទី១៥ ខែតុលា ឆ្នាំ២០២០ អ្នកនាំពាក្យអគ្គនាយកដ្ឋានពន្ធនាគារ មានប្រសាសន៍ថា៖«នៅជិតៗគ្នាហ្នឹង ម១ ម២ ដើរដល់តើ...PJ ដើរតិចដល់»។
នៅឯពន្ធនាគារខេត្តបន្ទាយមានជ័យឯណោះ ក៏មានការផ្ទេរអ្នកជាប់ឃុំដែរ ដោយសារការរាលដាលនៃទឹកជំនន់។ អ្នកជាប់ឃុំជាង១ពាន់ ត្រូវបញ្ជូនចេញពីពន្ធនាគារខេត្តបន្ទាយមានជ័យ យកទៅផ្ញើនៅពន្ធនាគារខេត្តសៀមរាប នៅថ្ងៃទី១៣ ខែតុលា និង ប្រមាណ២០០នាក់ទៀត យកទៅផ្ញើនៅពន្ធនាគារខេត្តកំពង់ធំ នៅថ្ងៃទី១៤ ខែតុលា។
គិតមកដល់ថ្ងៃទី១៥ ខែតុលានេះ មានប្រជាពលរដ្ឋជិត២០ម៉ឺននាក់ ដែលរងការប៉ះពាល់ដោយសារគ្រោះទឹកជំនន់ ហើយក្នុងនោះ មានជាង១,២ម៉ឺននាក់ ត្រូវបានជម្លៀសទៅកាន់កន្លែងមានសុវត្ថិភាព។ ពលរដ្ឋ ដែលបាត់បង់ជីវិត ដោយគ្រោះទឹកជំនន់នេះ មាន១៣នាក់៕
Tag:
គ្រោះទឹកជំនន់
ផ្ទេរអ្នកទោស
© រក្សាសិទ្ធិដោយ thmeythmey.com