អ្នកស្លាប់​កើនឡើង​ដល់​១៨​នាក់ ខណៈ​ពលរដ្ឋ​ជាង​២១​ម៉ឺន​នាក់ រងគ្រោះ​ដោយសារ​ទឹកជំនន់​
ជាតិ
សង្គមជាតិ
អ្នកស្លាប់​កើនឡើង​ដល់​១៨​នាក់ ខណៈ​ពលរដ្ឋ​ជាង​២១​ម៉ឺន​នាក់ រងគ្រោះ​ដោយសារ​ទឹកជំនន់​
16, Oct 2020 , 3:49 pm        
រូបភាព
រូបពីហ្វេសប៊ុកក្រសួងសាធារណការ និងដឹកជញ្ជូន
រូបពីហ្វេសប៊ុកក្រសួងសាធារណការ និងដឹកជញ្ជូន
​គិត​មកដល់​ថ្ងៃទី​១៦ ខែតុលា ឆ្នាំ​២០២០ មាន​ពលរដ្ឋ​១៨​នាក់ (​ក្មេង​៨​នាក់​) បាន​បាត់​បង់ជីវិត ក្នុង​ហេតុការណ៍​គ្រោះទឹកជំនន់ និង​ពលរដ្ឋ​ជាង​២៥​ម៉ឺន​នាក់​ទៀត រង​ការប៉ះពាល់​។ ក្នុងចំណោម​ពលរដ្ឋ​ជាង​២១​ម៉ឺន​នាក់ ក្នុងនោះ​មាន​២​ម៉ឺន​៥​ពាន់​នាក់ ត្រូវបាន​ជម្លៀស​ទៅ​កន្លែង​មាន​សុវត្ថិភាព​។​

 
​លោក ឃុន សុខា អ្នកនាំពាក្យ​គណៈ​គ​ម្មា​ធិ​ការ​ជាតិ​គ្រប់គ្រង​គ្រោះទឹកជំនន់ បាន​បញ្ជាក់ថា អ្នកស្លាប់​ទាំង​១៨​នាក់ គឺ ៧​នាក់ នៅ​ខេត្តបន្ទាយមានជ័យ ,២​នាក់ នៅ​ខេត្ត​ព្រះសីហនុ ,៣​នាក់​នៅ​ខេត្តពោធិ៍សាត់ ,១​នាក់ នៅ​ខេត្ត​ប៉ៃលិន ,១​នាក់​នៅ​ខេត្តកំពង់ធំ និង ៤​នាក់​នៅ​ខេត្តកណ្តាល​។ 
 
​បើតាម​លោក ឃុន សុខា ផ្ទះ​ជាង​៥​ម៉ឺន​ខ្នង រង​ការប៉ះពាល់ ហើយ​ក្នុងចំណោម​នោះ មាន​៥០​ខ្នង ត្រូវ​ខូចខាត ខណៈ​សាលារៀន មាន​៤៣៩​កន្លែង ដែល​លិច​ទឹក​។ ចំពោះ ស្រូវ​វិញ មាន​ជិត​១៤​ម៉ឺន​ហិកតា ត្រូវ​លិច​ទឹក រួមទាំង​ដំណាំ​ផ្សេងៗ​ទៀត មាន​ជាង​៦,៧​ម៉ឺន​ហិកតា ក៏ត្រូវ​លិច​ទឹក​ដែរ​។​
 
​ដោយឡែក ផ្លូវជាតិ ផ្លូវ​ខេត្ត ផ្លូវ​គ្រួស​ក្រហម បូក​បញ្ចូល​គ្នា​មាន​ប្រវែង​ជាង​២៨៤​គីឡូម៉ែត្រ និង​ផ្លូវលំ​នានា​តាម​ជនបទ មាន​ប្រវែង​ជាង​១,៤​ពាន់​គីឡូម៉ែត្រ រួមទាំង​ស្ពាន​ជិត​៣០​កន្លែង បាន​ប៉ះពាល់​និង​រង​ការ​ជន់​លិច​ដោយ​ជំនន់​ទឹកភ្លៀង​។ នេះ​បើតាម​ការបញ្ជាក់​ពី​លោក ឃុន សុខា​។ 
 
​រាជធានី​-​ខេត្ត ដែល​រង​ការប៉ះពាល​ដោយ​ទឹកជំនន់ មាន​១៩ គឺ​ភ្នំពេញ ពោធិ៍សាត់ ប៉ៃលិន បន្ទាយមានជ័យ បាត់ដំបង ស្វាយរៀង ឧ​ត្ត​រ​មានជ័យ សៀមរាប តាកែវ កំពង់ស្ពឺ មណ្ឌលគិរី ព្រះសីហនុ កោះកុង ព្រះវិហារ ស្ទឹងត្រែង កំពង់ចាម កណ្តាល កំពង់ឆ្នាំង និង កំពង់ធំ​៕ 
 
 

© រក្សាសិទ្ធិដោយ thmeythmey.com