បេះដូងរបស់អ្នក គឺជាសរីរាង្គសកម្មបំផុតមួយក្នុងរាងកាយ។ វាធ្វើការពេញ ២៤ម៉ោងក្នុងមួយថ្ងៃ និង ៧ថ្ងៃក្នុងមួយសប្តាហ៍។ ដូច្នេះការរក្សាឱ្យបាននូវសុខភាពបេះដូងល្អប្រសើរ គឺចាំបាច់ណាស់។ ក្រៅពីមានរបបអាហារមិនល្អ ភាគច្រើននៃពួកយើងប្រហែលជាមិនធ្លាប់ដឹងទេទម្លាប់មួយចំនួនផ្សេងទៀតអាចបង្កគ្រោះថ្នាក់ដល់សុខភាពបេះដូងគួរឱ្យព្រួយបារម្ភ! ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីកត្តាហានិភ័យនៃជំងឺបេះដូង ៖
១. គេងមិនបានគ្រប់គ្រាន់
ការគេងមិនគ្រប់អាចរារាំងឈាមមិនឱ្យរត់បានត្រឹមត្រូវ ហើយវាជាអ្វីមួយដែលអាចធ្វើឱ្យឈាមកកកើតមានឡើង។ ឈាមកកនោះអាចចរាចរ ហើយរាំងស្ទះដល់លំហូរនៃឈាមដឹកនាំអុកស៊ីសែនទៅកាន់សាច់ដុំបេះដូងដែលជាអ្វីមួយអាចនាំឱ្យគាំងបេះដូង។ ប្រសិនបើអ្នកផ្ដាច់ការផ្គត់ផ្គង់ឈាមដឹកនាំអុកស៊ីសែនទៅកាន់ផ្នែកមួយនៃខួរក្បាល នោះហានិភ័យនៃជំងឺដាច់សសៃឈាមខួរក្បាលនឹងឡើងខ្ពស់គួរឱ្យព្រួយបារម្ភជាក់ជាមិនខាន។
២. សុខភាពមាត់ធ្មេញ
អ្នកចាំបាច់គួររក្សាសុខភាពមាត់ធ្មេញឱ្យបានល្អប្រសើរដើម្បីចៀសផុតពីហានិភ័យនៃជំងឺបេះដូង។ នេះក៏ព្រោះតែអ្នកដែលទទួលរងពីជំងឺអញ្ចាញធ្មេញងាយនឹងជួបប្រទះបញ្ហាបេះដូងផ្សេងៗណាស់។
៣. ស្ត្រេស
ភាពតានតឹងក្នុងអារម្មណ៍ ឬស្ត្រេសជាកត្តាចម្បងបំផុតមួយនៃបញ្ហាសុខភាពជាច្រើនរួមទាំងជំងឺបេះដូងនិងដាច់សសៃឈាមខួរក្បាល។ ស្ត្រេសបន្ថយភាពរឹងមាំនៃប្រព័ន្ធភាពស៊ាំរាងកាយ ហើយថែមទាំងបណ្ដាលឱ្យរាងកាយបង្កើនការផលិតអ័រម៉ូន cortisol និង epinephrine ដែលបង្កបញ្ហាកូឡេស្តេរ៉ូលមិនល្អឡើងខ្ពស់។ កូឡេស្តេរ៉ូលមិនល្អឡើងខ្ពស់នេះហើយជាមូលហេតុទូទៅបំផុតនៃជំងឺបេះដូង។
៤. មិនទៅជួបពិនិត្យជាមួយវេជ្ជបណ្ឌិត ឬគ្រូពេទ្យជំនាញ
វេជ្ជបណ្ឌិត ឬគ្រូពេទ្យជំនាញជាមនុស្សតែម្នាក់គត់ដែលអាចប្រាប់អ្នកបានពីរឿងគ្រប់យ៉ាងដែលពាក់ព័ន្ធនឹងសុខភាពរបស់អ្នក។ ចូរព្យាយាមទៅពិនិត្យសុខភាពជាប្រចាំឆ្នាំដើម្បីរក្សាបាននូវសុខភាពល្អប្រសើរ។
៥. ជាតិពុលក្នុងបរិយាកាស
បរិយាកាសដែលអ្នកកំពុងរស់នៅអាចជះឥទ្ធិពលគួរឱ្យកត់សម្គាល់លើសុខភាពបេះដូងរបស់អ្នក។ ការរស់នៅក្នុងទីក្រុងដែលពោរពេញទៅដោយជាតិពុលនិងការបំពុលបង្កើនហានិភ័យនៃជំងឺបេះដូងគួរឱ្យព្រួយបារម្ភ។
៦. ការប្រើប្រាស់ថ្នាំ Steroid
ថ្នាំប្រភេទនេះ គឺគ្រោះថ្នាក់ណាស់ចំពោះសុខភាពរាងកាយទាំងមូលតែម្ដង។ Steroid អាចធ្វើឱ្យសាច់ដុំកាន់តែរឹងមាំ ប៉ុន្តែបេះដូងប្រែជាចុះខ្សោយ ហើយងាយនឹងមានបញ្ហា។
៧. ការជក់បារីនិងការហិតផ្សែងបារី
ទាំងការជក់បារីនិងការហិតផ្សែងបារីសុទ្ធតែជាកត្តាគ្រោះថ្នាក់ដែលអាចបង្កបញ្ហាសុខភាពជាច្រើនចំពោះសួតនិងបេះដូង។ ដើម្បីជាការប្រសើរចូរបញ្ឈប់ការជក់បារីនិងការពារខ្លួនពីការហិតផ្សែងបារីអ្នកដទៃ។ ដូច្នេះនៅពេលឈប់ជក់បារីហានិភ័យនៃជំងឺបេះដូងនឹងត្រូវបានកាត់បន្ថយគួរឱ្យកត់សម្គាល់។
៨. ការមិនធ្វើលំហាត់ប្រាណ
ការមិនធ្វើលំហាត់ប្រាណសោះនឹងបង្កផលប៉ះពាល់ដល់មុខងាររបស់បេះដូងក្នុងការច្របាច់ឈាមទៅសព្វរាងកាយដែលនាំឱ្យកើតមានបញ្ហាសុខភាពផ្សេងៗ រួមទាំងជំងឺលើសឈាម។ ហើយនៅពេលសម្ពាធឈាមឡើងខ្ពស់នោះប្រព័ន្ធសសៃឈាមបេះដូងទាំងមូល ក៏ដូចជាបណ្ដាសរីរាង្គផ្សេងទៀតនឹងត្រូវប្រឈមមុខជាមួយគ្រោះថ្នាក់គួរឱ្យព្រួយបារម្ភយ៉ាងខ្លាំងជាមិនខាន។ យោងតាមវេជ្ជបណ្ឌិតជាច្រើនបានឱ្យដឹងថាផលប៉ះពាល់ផ្សេងទៀតនៃការមិនធ្វើលំហាត់ប្រាណទៀងទាត់ គឺការកើនឡើងខ្ពស់នៃកម្រិតកូឡេស្តេរ៉ូលមិនល្អក្នុងឈាម។ ដូច្នេះដើម្បីចៀសផុតពីបញ្ហាកូឡេស្តេរ៉ូលមិនល្អកើនឡើងខុសប្រក្រតី ចូរធ្វើលំហាត់ប្រាណជាប្រចាំ។ ការកើនឡើងនៃសម្ពាធឈាមនិងកូឡេស្តេរ៉ូលមិនល្អ គឺជាកត្តាចម្បងបំផុតនៃបញ្ហាជំងឺបេះដូង។ ហើយកត្តាទាំងពីរនេះជាញឹកញយកើតឡើងដោយសារកង្វះនៃលំហាត់ប្រាណ។ ដូច្នេះប្រសិនបើអ្នកចង់ចៀសផុតពីបញ្ហានៃជំងឺបេះដូង ចូរព្យាយាមធ្វើលំហាត់ប្រាណឱ្យបានទៀងទាត់៕