អន្តរជាតិ
ចិន ធ្វើវិសោធនកម្មច្បាប់ដើម្បីពង្រឹងការការពារអនីតិជនតាមប្រព័ន្ធអនឡាញ សិស្សជនជាតិចិននៅសាលាបឋមសិក្សាមួយក្នុងខេត្តអានហ៊ុយ។ រូបភាព Xinhua
×
ដោយ៖កង ម៉េងហុង
ចិន បានធ្វើវិសោធនកម្មច្បាប់របស់ខ្លួនដើម្បីការពារអនីតិជននៅលើប្រព័ន្ធអនឡាញ។ បើតាមទីភ្នាក់ងារព័ត៌មានរដ្ឋចិន Xinhua នៅថ្ងៃទី១៧ ខែតុលា វិសោធនកម្មច្បាប់ នឹងចាប់បង្ខំឱ្យអ្នកផ្ដល់សេវាកម្មអ៊ីនធឺណិត និងលក់ទំនិញតាមអនឡាញ ចាត់វិធានការនៅពេលចាំបាច់ ដែលស្នើដោយអាជ្ញាធរ។
-
វិសោធនកម្មច្បាប់ថ្មី ត្រូវបានអនុម័តដោយគណៈកម្មាធិការអចិន្ត្រៃយ៍សភាប្រជាជនចិននៅថ្ងៃទី១៧ និងចូលជាធរមានចាប់ពីថ្ងៃទី១ ខែមិថុនាឆ្នាំក្រោយតទៅ។ ច្បាប់ថ្មីចែងថា អ្នកផ្ដល់សេវាកម្ម និងទំនិញតាមអ៊ីនធឺណិត មិនត្រូវផ្តល់សេវាផលិតផលនិងសេវាកម្មដល់អនីតិជនដែលនាំឱ្យមានការញៀនឡើយ។
ទីភ្នាក់ងារព័ត៌មានរដ្ឋ Xinhua រាយការណ៍ថា អ្នកផ្តល់សេវាកម្មតាមអ៊ីនធឺណិតមាន ហ្គេម ការផ្សាយបន្តផ្ទាល់ សំឡេង និងវីដេអូ ព្រមទាំងបណ្តាញសង្គមផង ត្រូវតែមានវិធានការទប់ស្កាត់សកម្មភាពមិនគប្បីណាមួយ និងបង្កើតមុខងារឆ្លើយតបដូចជាការកំណត់ពេលវេលា និងដែនកំណត់នៃការប្រើប្រាស់សម្រាប់អនីតិជនផងដែរ។
បន្ថែមពីលើនោះ អ្នកផ្តល់សេវាកម្ម ត្រូវតែចាត់វិធានការចាំបាច់ដើម្បីបញ្ឈប់ការបន្ទាបបន្ថោកតាមអ៊ីនធឺណិត ហើយឪពុកម្តាយ ឬអាណាព្យាបាលនៃអនីតិជនដែលរងការធ្វើបានតាមអនឡាញ ក៏មានសិទ្ធិជូនដំណឹងដល់អ្នកផ្តល់សេវាកម្មឱ្យ លុប រារាំង ឬផ្តាច់បណ្តាញភ្ជាប់ដូចគ្នា។ ក្រោយទទួលបានការជូនដំណឹង ក្រុមហ៊ុនផ្ដល់សេវាកម្ម ត្រូវមានវិធានការភ្លាមៗដើម្បីដោះស្រាយបញ្ហាទាំងនោះ
ច្បាប់ដែលបានធ្វើវិសោធនកម្មនេះ ក៏មានបញ្ញត្តិដែលចាប់បង្ខំឲ្យសាលាមត្តេយ្យ និងសាលារៀននានា មិនត្រូវលាក់បាំងអំពើខុសឆ្គង ហើយត្រូវរាយការណ៍អំពីការយាយី និងការបំពានផ្លូវភេទទៅលើអនីតិជនដល់អាជ្ញាធរសន្តិសុខសាធារណៈ និងផ្នែកអប់រំ។ លើសពីនោះ សាលារៀនរបស់អនីតិជន ក៏ត្រូវបណ្ដុះបណ្ដាលគ្រូបង្រៀន និងបុគ្គលិកពីសកម្មភាពឧក្រិដ្ឋទាំងនេះដែរ៕
© រក្សាសិទ្ធិដោយ thmeythmey.com