បាក់អាងស្ដុកទឹកនៅថៃ ពន្លិចភូមិ២នៅខេត្តភាគឦសាន

សង្គមអន្តរជាតិ

អន្តរជាតិ

បាក់អាងស្ដុកទឹកនៅថៃ ពន្លិចភូមិ២នៅខេត្តភាគឦសាន

19, Oct 2020 , 4:15 pm

រូបភាព

ជញ្ជាំងអាងស្ដុកទឹកនៅខេត្តនគររាជសីម៉ា ថៃ បាក់ ។ រូបភាព៖ កាសែត បាងកកប៉ុស្តី

ដោយ:

ទឹកជាង១លានគូប បានធ្លាយចេញពីអាងស្ដុកទឹកដែលបាក់មួយកន្លែង ក្នុងស្រុក Pak Thong Chai ខេត្តនគររាជសីមា ភាគឦសានថៃ ។ ហេតុការណ៍នេះ បានពន្លិចភូមិក្បែរនោះយ៉ាងតិច២ ហើយធ្វើឲ្យគ្រោះទឹកជំនន់កាន់តែធ្ងន់ធ្ងរផងដែរ។

អាងស្ដុកទឹក Hin Ta Ngo ដែលស្តុកទឹកសរុប ១,២លានគូប បានបែកធ្លាយនៅម៉ោង៥ល្ងាចថ្ងៃទី១៧ ខែតុលា ដោយសារភ្លៀងធ្លាក់ខ្លាំងច្រើនថ្ងៃជាប់គ្នា។ នេះបើតាមបញ្ជាក់របស់អគ្គលេខាធិការការិយាល័យធនធានទឹកថៃ Somkiat Prachamwongsa ។

តាមការចុះផ្សាយរបស់កាសែតថៃបាងកកប៉ុស្តិ៍ លោក Somkiat បន្តថា ទឹកនេះបានហូរតាមប្រឡាយយ៉ាងលឿន ហើយពន្លិចផ្ទះពលរដ្ឋថៃក្បែរនោះជាង៦០ខ្នង ខណៈអាជ្ញាធរតំបន់ក៏បានជួយសង្គ្រោះពលរដ្ឋទៅកាន់ទីទួលសុវត្ថិភាពផងដែរ។

លោក Wichian Chantharanothai អភិបាលខេត្តនគររាជសីមា បាននិយាយកាលពីថ្ងៃទី១៨ ខែតុលាថា លោកបានស្នើសុំឲ្យកងកម្លាំងជួយរៀបបាវខ្សាច់ទប់ទឹក នៅត្រង់ចំណុចបាក់អាងស្ដុកទឹកនោះ។ នេះបើតាមកាសែត បាងកកប៉ុស្តិ៍ ។

នាយកដ្ឋានបង្ការនិងទប់ស្កាត់គ្រោះមហន្តរាយថៃ កាលពីថ្ងៃទី១៨ ខែតុលា បានរាយការណ៍ថា មនុស្ស២៥ ២៧៣នាក់ ក្នុងភូមិចំនួន៨៤៩ ក្នុងខេត្តចំនួន២៥ ត្រូវបានរងផលប៉ះពាល់ដោយសារទឹកជំនន់ ហើយក្នុងនោះ មនុស្សម្នាក់ស្លាប់ ខណៈ៣នាក់ផ្សេងទៀតរងរបួស។ បច្ចុប្បន្ន ទឹកជំនន់បន្តកើតមានក្នុងខេត្តចំនួន១១ក្នុងចំណោមខេត្តទាំង២៥នោះ។

សូមបញ្ជាក់ថា ខេត្ត នគររាជសីម៉ា និងខេត្ត Ubon Ratchathani គឺជាខេត្តរងគ្រោះខ្លាំងបំផុតដោយសារជំនន់ទឹកភ្លៀងឆ្នាំនេះ ខណៈនាយកដ្ឋានឧតុនិយមថៃ បានព្យាករថា ភ្លៀងនឹងបន្តធ្លាក់ខ្លាំងក្នុងតំបន់ភាគខាងត្បូង ខាងកើត ទំនាបកណ្ដាល និងភាគឦសានថៃ៕