សង្គមអន្តរជាតិ
អន្តរជាតិ
លោក ប្រាយុទ្ធ ស្នើបើកកិច្ចប្រជុំវិសាមញ្ញសភា ដើម្បីដោះស្រាយបញ្ហានយោបាយ
បាតុករប្រឆាំងរដ្ឋាភិបាលថៃ។ រូបភាព៖ AFP
×![]()
នាយករដ្ឋមន្ត្រី ប្រាយុទ្ធ ចន្ទអូចា បានស្នើកោះប្រជុំវិសាមញ្ញរដ្ឋសភាថៃពិភាក្សាពីស្ថានការណ៍នយោបាយ។ បច្ចុប្បន្ន លោក ប្រាយុទ្ធ កំពុងរួមរឹតដោយបាតុកម្មស្ទើរមិនលស់ថ្ងៃទាមទារឲ្យលោកចេញពីតំណែង កែរដ្ឋធម្មនុញ្ញ និងកាត់បន្ថយអំណាចស្ដេច។ 
«យើងគាំទ្រការបើកកិច្ចប្រជុំវិសាមញ្ញរដ្ឋសភាដើម្បីដោះស្រាយបាតុកម្ម។» នាយករដ្ឋមន្ត្រី ប្រាយុទ្ធ ចន្ទអូចា ប្រាប់អ្នកសារព័ត៌មានបែបនេះ បន្ទាប់ពីលោកស្នើកោះប្រជុំសភាបន្ទាន់។ សព្វថ្ងៃ រដ្ឋសភាថៃកំពុងស្ថិតក្នុងវិសម្សកាលនៅឡើយ។
ប្រឈមមុខបាតុកម្មរបស់យុវជនក្មេងៗ លោក ប្រាយុទ្ធ ក៏បានស្នើឲ្យពួកគេតវ៉ាដោយសន្តិភាព ព្រោះរដ្ឋាភិបាលរបស់លោកបានដកថយច្រើនជំហានហើយដែរ។
ទាក់ទងកិច្ចប្រជុំវិសាមញ្ញនេះដែរ លោក Chuan Leekpai ប្រធានរដ្ឋសភាថៃ បានអះអាងក្រោយកិច្ចប្រជុំជាមួយបក្សនយោបាយនៅថ្ងៃទី១៩ ខែតុលា ថា លោកចង់ឲ្យរដ្ឋាភិបាលលើកចោលក្រឹត្យអាសន្ន និងប្រើប្រាស់យន្តការសភា ដើម្បីដោះស្រាយស្ថានការណ៍នយោបាយ និងជាពិសេសគម្រោងធ្វើវិសោធនកម្មរដ្ឋធម្មនុញ្ញ។ នេះបើយោងតាមកាសែតថៃ Bangkok Post។
លោក Chuan អះអាងថា ចាប់តាំងពីមានតែពីមានបាតុកម្មមក តំណាងរាស្ត្រជាច្រើនរូបបានលើកឡើងពីគំនិតក្នុងការបើកកិច្ចប្រជុំវិសាមញ្ញរបស់រដ្ឋសភា ប៉ុន្តែពុំទាន់មានបក្សណាមួយដាក់សំណើមករដ្ឋសភាឡើយ។ ថ្វីត្បិតតែជាប្រធានរដ្ឋសភាមែន លោក Chuan អះអាងថា សំណើបើកកិច្ចប្រជុំវិសមញ្ញត្រូវធ្វើឡើងដោយរដ្ឋាភិបាល ឬតំណាងរាស្ត្រ។
កិច្ចប្រជុំវិសាមញ្ញនៃរដ្ឋសភាថៃ អាចប្រព្រឹត្តទៅបានដរាបណា មានសំណើពីតំណាងរាស្ត្រ ឬសមាជិកព្រឹទ្ធសភា និងដោយមានការយល់ស្របពីសមាជិកចំនួន១ភាគ៣ នៃសភាទាំង២ថ្នាក់។ លោកSomboon Uthaiwiankul លេខាប្រធានរដ្ឋសភាថៃ អះអាងថា សេចក្តីព្រាងវិសោធនកម្មរដ្ឋធម្មនុញ្ញ ដែលស្នើដោយក្រុមសង្គមស៊ីវិលអាចនឹងត្រូវលើកមកពិភាក្សានៅខែ បន្ទាប់ពីការផ្ទៀងផ្ទាត់ហត្ថលេខាអ្នកគាំទ្រសំណើនោះបាន។
អ្នកនយោបាយជើងចាស់រូបនេះបន្ថែមថា រដ្ឋសភាកំពុងឃ្លាំមើលស្ថានការណ៍ និងពិនិត្យទៅលើអ្វីដែលអាចធ្វើបាន។ « យើងកំពុងសម្របសម្រួលរវាងរដ្ឋាភិបាល និងតំណាងរាស្ត្របក្សប្រឆាំងដោយស្ងៀមស្ងាត់ដើម្បីជៀសវាងការដាក់សម្ពាធទាំងសងខាង»។ ចាប់តាំងពីថ្ងៃទី១៣ តុលាមក អាជ្ញាធរថៃបានចាប់ខ្លួនបាតុករចំនួន៨០នាក់។
វិសោធនកម្មរដ្ឋធម្មនុញ្ញថៃ ជាផ្នែកមួយនៃការទាមទាររបស់ក្រុមបាតុករ។ ជុំវិញរឿងនេះ បក្សនយោបាយ នៅក្នុងសភាថៃមានជំហរផ្សេងៗគ្នា ជាពិសេសលើជំពូកស្តីពីរបបរាជានិយមដែលបាតុករទាមទារឲ្យកាត់បន្ថយអំណាចព្រះមហាក្សត្រ។ បក្ស Palang Pracharath កំពុងកាន់អំណាចអះអាងថា នឹងគាំទ្រនីតិវិធីក្នុងការធ្វើវិសោធនកម្ម លើកលែងតែជំពូកទាក់ទងនឹងរបបរាជានិយម។
Tag:
ថៃ
ប្រាយុទ្ធ ចន្ទអូចា
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
4 ថ្ងៃ
