ជប៉ុននិងវៀតណាម បានយល់ព្រមពង្រឹងចំណងសេដ្ឋកិច្ច និងសន្តិសុខ អំឡុងទស្សនកិច្ចរបស់នាយករដ្ឋមន្ត្រីជប៉ុន ស៊ូហ្កា យូស៊ីហ៊ីដេ ទៅកាន់ប្រទេសអាស៊ីអាគ្នេយ៍មួយនេះ។ ប្រទេសទាំងពីរ ក៏បានឈានដល់សម្រេចកិច្ចព្រមព្រៀងមួយដែលអនុញ្ញាតឲ្យជប៉ុននាំចេញសម្ភារនិងបច្ចេកវិទ្យាទៅកាន់វៀតណាមផងដែរ។
«វាជាជំហានដ៏ធំមួយក្នុងវិស័យការពារសម្រាប់ប្រទេសទាំងពីរ ដែលយើងបានឈានដល់សម្រេចកិច្ចព្រមព្រៀងលើការផ្ទេរសម្ភារនិងបច្ចេកវិទ្យាយោធា»។ នាយករដ្ឋមន្ត្រីជប៉ុន ស៊ូហ្កា យូស៊ីហ៊ីដេ ប្រាប់អ្នកសារព័ត៌មានបែបនេះក្រោយជំនួបជាមួយសមភាគីវៀតណាម ង្វៀន ស៊ួនហ្វុក ក្នុងទីក្រុង ហាណូយនៅថ្ងៃទី១៩ ខែតុលា។
លោក ស៊ូហ្កា បញ្ជាក់ទៀតថា វៀតណាម ដែលធ្វើជាម្ចាស់ផ្ទះអាស៊ានឆ្នាំនេះ គឺជាកូនសោរលើកកម្ពស់យុទ្ធសាស្ត្រ ឥណ្ឌូ-ប៉ាស៊ីហ្វិកសេរីនិងបើកចំហ ដែលដឹកនាំដោយក្រុងតូក្យូ ។
ជាមូយគ្នានេះ មេដឹកនាំទាំងពីរ ក៏បានព្រមព្រៀងលើសារសំខាន់នៃការរក្សាសន្តិភាព សន្តិសុខ និងសេរីភាពនៃការធ្វើនាវាចរណ៍ និងហោះហើរក្នុងសមុទ្រចិនខាងត្បូង ព្រមទាំងដោះស្រាយជម្លោះដោយសន្តិវិធី។ លោកនាយករដ្ឋមន្ត្រីវៀតណាម ង្វៀន ស៊ួនហ្វុក បញ្ជាក់បែបនេះក្នុងសន្និសីទព័ត៌មានជាមួយលោក ស៊ូហ្កា ។
ការចុះផ្សាយរបស់ទីភ្នាក់ងារព័ត៌មាន Reuters លោក ហ្វុក សង្កត់ធ្ងន់ថា វៀតណាមស្វាគមន៍ជប៉ុនធ្វើជាមហាអំណាចសកល ដើម្បីបន្តរួមចំណែកយ៉ាងសកម្មសម្រាប់សន្តិភាព ស្ថិរភាព និងវឌ្ឍភាពសកលនិងតំបន់ផងដែរ។
លោក ស៊ូហ្កា ដែលកាន់តំណែងកាលពីខែមុនបន្ដពីលោក អាបេ ស៊ិនហ្សូ កំពុងធ្វើទស្សនកិច្ចនៅបរទេសលើកទី១ក្នុងសប្ដាហ៍នេះចំនួន៤ថ្ងៃ ចាប់ពីថ្ងៃទី ១៨ ដល់ថ្ងៃទី ២១ ខែតុលា ក្នុងប្រទេសវៀតណាម និងឥណ្ឌូណេស៊ី។
ទស្សនកិច្ចរបស់លោកស៊ូហ្កា កើតឡើងស្របពេលដែលជប៉ុនកំពុងសម្លឹងធ្វើពិពិធកម្មច្រវាក់ផ្គត់ផ្គង់ខ្លួន និងកាត់បន្ថយការពឹងផ្អែកលើប្រទេសចិន ដោយនាំយកផលិតកម្មទាំងនោះមកដាក់ក្នុងស្រុកវិញ ឬងាកទៅរកបណ្ដាប្រទេសក្នុងតំបន់អាស៊ីអាគ្នេយ៍ ហើយវៀតណាម គឺជាជម្រើសដ៏ពេញនិយមសម្រាប់ក្រុមហ៊ុនជប៉ុន។
ក្នុងសន្និសីទព័ត៌មានដដែល លោក ស៊ូហ្កា អះអាងថា ប្រទេសទាំងពីរបានយល់ព្រមជំរុញកិច្ចសហប្រតិបត្តិការពួកគេ ក្នុងគោលដៅបន្ធូរបន្ថយផលប៉ះពាល់បង្កដោយជំងឺរាតត្បាតសកលកូវីដ-១៩។ លោកនិយាយដូច្នេះថា៖«យើងបានព្រមបើកឡើងវិញការធ្វើដំណើរធុរកិច្ច កដូចជាជើងហោះហើរសម្រាប់អ្នកដំណើររវាងប្រទេសទាំងពីរថ្ងៃនេះ»។
សូមបញ្ជាក់ថា ចេញពីវៀតណាម លោកនឹងបន្តទៅកាន់ប្រទេសឥណ្ឌូណេស៊ី នៅថ្ងៃទី២០ ខែតុលា ដើម្បីជួបពិភាក្សាជាមួយប្រធាធិបតី ចូកូ វីដូដូ ដើម្បីជជែកការបើកដំណើរការឡើងវិញនូវការធ្វើដំណើររវាងជប៉ុននិងឥណ្ឌូណេស៊ី ដែលផ្អាកដោយវិបត្តិកូវីឌ-១៩ ក៏ដូចជាកិច្ចសហប្រតិបត្តិការក្នុងការអភិវឌ្ឍហេដ្ឋារចនាសម្ព័ន្ធ រួមមាន ផ្លូវដែក និងកំពង់ផែជាដើម។ នេះបើតាមការប្រកាសព័ត៌មានក្រសួងការបរទេសជប៉ុន៕