ជាតិ
កម្រិតទឹកហក់កាន់តែខ្ពស់នៅទំនប់ទឹកត្រពាំងវែង ខេត្តឧត្តរមានជ័យ
× រដ្ឋបាលខេត្តឧត្តរមានជ័យ បានចេញសេចក្ដីជូនដំណឹងដល់ប្រជាពលរដ្ឋ ដែលស្ថិតនៅ ភូមិអូរឫស្សី សង្កាត់សំរោង ក្រុងសំរោង បង្កើនការប្រុងប្រយ័ត្ន ខណៈពេលទឹកកំពុងហក់ឡើងខ្លាំងជាគំហុក ជាពិសេសនៅអាងទំនប់ទឹកភូមិត្រពាំងវែង ក្នុងសង្កាត់កូនក្រៀល។ នេះបើតាមសេចក្ដីជូនដំណឹងរបស់រដ្ឋបាលខេត្តឧត្តរមានជ័យនៅព្រឹកថ្ងៃទី១៩ ខែតុលា។
ជំនន់ទឹកភ្លៀងនេះបានដល់កម្រិតប្រកាសអាសន្នកាលពីយប់ថ្ងៃទី១៨ ខែតុលា និងធ្វើឲ្យតំបន់មួយចំនួនបានជន់លិច។ ខណៈកងកម្លាំងអន្តរាគមន៍ អាជ្ញាធរ និងមន្ត្រីមូលដ្ឋាន ចាត់វិធានការជាបន្ទាន់ដើម្បីទប់ស្កាត់ និងបញ្ចៀសការបាក់ទំនប់ ដែលនឹងបង្កឱ្យមានផលប៉ះពាល់ធ្ងន់ធ្ងរ។
បើតាមលោក ញឺន កួន ប្រធានមន្ទីរធនធានទឹក និងឧតុនិយមខេត្តឧត្តរមានជ័យ ការហក់ឡើងគំហុកនេះ ធ្វើឱ្យទំនប់ទឹកត្រពាំងវែង ពុំអាចទប់ទល់បាននឹងធំហំធារទឹកយ៉ាងលើសលប់បែបនេះនោះទេ បើទោះបីជាគ្រប់ទ្វារទឹកបានបើកក្នុងកម្រិតអតិបរមាក៏ដោយ។ ដើម្បីដោះស្រាយជាមួយស្ថានការណ៍នេះ ជំនាញមានតែសម្រេចចិត្ត ជីកកាយកាត់ផ្តាច់ផ្នែកមួយនៃទំនប់ ដើម្បីរំដោះធាទឹកចេញ ហើយផលប៉ះពាល់នឹងធ្លាក់ទៅផ្នែកខាងក្រោមដែលមានភូមិអូរឬស្សី ភូមិអូរកន្សែង ភូមិគោកច្រេស នឹងទទួលរងការប៉ះពាល់ខ្លាំងជាងគេ ហើយបណ្តាភូមិមួយចំនួននៃសង្កាត់កូនគ្រៀល និងសំរោង រងផលប៉ះពាល់ដោយផ្នែក។
គិតត្រឹមថ្ងៃទី ១៩ខែតុលា រាជធានី-ខេត្ត ១៩ បានរងផលប៉ះពាល់ពីទឹកជំនន់ ក្នុងនោះមានពលរដ្ឋជាង៣១ម៉ឺននាក់រងគ្រោះ និងជាង ៣.៧ម៉ឺននាក់ ត្រូវបានជម្លៀសទៅកាន់ទីទួលសុវត្ថិភាព។ សាលារៀនចំនួន ៥៦៨កន្លែង ក៏ត្រូវបានជន់លិច ដោយទឹកជំនន់ផងដែរ។ ដោយឡែកខេត្តឧត្តរមានជ័យ មិនទាន់មានពលរដ្ឋណាម្នាក់ រងគ្រោះដល់អាយុជីវិតនោះទេ។ នេះបើយោងតាមរបាយការណ៍ របស់គណកម្មាធិការជាតិគ្រប់គ្រងគ្រោះមហន្តរាយ៕
© រក្សាសិទ្ធិដោយ thmeythmey.com