សង្គមអន្តរជាតិ
អន្តរជាតិ
ចិននិងតៃវ៉ាន់ ចោទគ្នាទៅវិញទៅមកពាក់ព័ន្ធករណីហិង្សាលើអ្នកការទូតនៅហ្វីជី
ទង់ជាតិតៃវ៉ាន់ និងផ្លាករដ្ឋាភិបាលចិន។ រូបភាព៖ SCMP
×![]()
ចិន និងតៃវ៉ាន់ នៅថ្ងៃទី១៩ ខែតុលានេះ ចេញមកអះអាងរៀងៗខ្លួនថា អ្នកការទូតប្រទេសទាំងពីរ សុទ្ធតែរងរបួសក្នុងហេតុការណ៍ប្រតាយប្រតប់គ្នាមួយនៅកន្លែងជួបជុំប្រារព្ធពិធីបុណ្យជាតិតៃវ៉ាន់ កាលពីថ្ងៃទី៨ ខែតុលា នៅឯកោះហ្វីជី។
បើតាមក្រសួងការបរទេសតៃវ៉ាន់ នៅថ្ងៃទី១៩ តុលា អ្នកការទូតរបស់ខ្លួនមួយរូបត្រូវបានបញ្ជូនទៅមន្ទីរពេទ្យក្នុងបន្ទាប់ពីព្យាយាមរារាំង មិនឲ្យអ្នកការទូតចិនពីររូបចូលទៅថតរូប និងប្រមូលព័ត៌មានអំពីអ្នកដែលចូលរួមក្នុងកម្មវិធីបុណ្យជាតិតៃវ៉ាន់ ដែលរៀបចំដោយការិយាល័យតំណាងតៃវ៉ាន់ ប្រចាំប្រទេសហ្វីជី។ នេះបើតាមការផ្សាយរបស់ទីភ្នាក់ព័ត៌មាន Reuters។
ថ្លែងនៅចំពោះមុខរដ្ឋសភានៅទីក្រុងតៃប៉ិ អនុរដ្ឋមន្ត្រីការបរទេសតៃវ៉ាន់ លោក Henry Tseng អះអាងថា លោកនៅបន្តពិនិត្យមើលហេតុការណ៍នេះថា ជាសកម្មភាពទូទៅរបស់ចិន ឬជាសកម្មភាពដោយឡែក។ ទោះជាយ៉ាងណាក្តី តៃវ៉ាន់ថ្កោលទោសសកម្មភាពរបស់អ្នកការទូតចិនទាំងពីររូបខាងលើ។ មន្ត្រីទូតតៃវ៉ាន់ អះអាងថា មន្ត្រីទូតចិន ព្យាយាមថតរូប និងប្រមូលព័ត៌មាន ដើម្បីចង់ដឹងថាមានអ្នកនយោបាយហ្វីជីណាខ្លះចូលរួមក្នុងពិធីនោះ។
ជាមួយគ្នានោះ តៃវ៉ាន់ក៏អះអាងថា ប៉ូលិសហ្វីជីបានចូលជួយអន្តរាគមន៍ និងបានបង្ខំឲ្យមន្ត្រីការទូតចិនចាកចេញពីកន្លែងជួបជុំនោះដែរ។
ពីខាងចិនវិញ ស្ថានទូតចិននៅហ្វីជី អះអាងថា ការប្រារព្ធបុណ្យជាតិតៃវ៉ាន់ ជាការបំពានគោលការណ៍ចិនតែមួយ ឬបង្កើតរូបភាពចិន និងតៃវ៉ាន់ជារដ្ឋដាច់ដោយឡែកពីគ្នានៅលើឆាកអន្តរជាតិ។ ស្ថានទូតចិន ក៏អះអាងផងដែរថា មន្ត្រីការទូតរបស់ខ្លួនម្នាក់រងរបួស និងចោទអ្នកការទូតតៃវ៉ាន់ថា ជាអ្នកបង្ករឿងទៅលើបុគ្គលិកស្ថានទូតរបស់ខ្លួនដែលកំពុងបំពេញមុខងារផ្លូវការនៅក្បែរកន្លែងរៀបចំនោះ។
«សាធារណរដ្ឋប្រជាមានិតចិន ជាតំណាងស្របច្បាប់តែមួយគត់របស់ចិន។ តៃវ៉ាន់ជាផ្នែកមួយមិនអាចផ្តាច់បានពីទឹកដីចិន»។ ស្ថានទូតចិនបញ្ជាក់បែបនេះ។
ប្រទេសកូនកោះនៅតំបន់ប៉ាស៊ីហ្វិក ជាទីប្រកួតប្រជែងស្វិតស្វាញមួយរវាងចិន និងតៃវ៉ាន់។ តៃវ៉ាន់ មានទំនាក់ទំនងការទូតជាមួយប្រទេស៤ ក្នុងតំបន់នោះរួមមានណូរូ កោះម៉ាសាល់ ប៉ាឡាវ និងទូវ៉ាលូ។ តៃវ៉ាន់ មិនមានទំនាក់ទំនងការទូតផ្លូវការជាមួយហ្វីជីទេ ប៉ុន្តែមានការិយាល័យតំណាងពាណិជ្ជកម្មនៅទីនោះ។ ចំណែកចិន មានទំនាក់ទំនងការទូតជាមួយតៃវ៉ាន់តាំងតែពីឆ្នាំ១៩៧៥៕
Tag:
ចិន
តៃវ៉ាន់
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
5 ថ្ងៃ
