ជាតិ
រូបភាព៖ មន្ទីរកសិកម្មត្បូងឃ្មុំ
×![]()
សត្វកណ្ដុរ កាត់បំផ្លាញស្រូវផ្ការំដួល ប្រមាណ៨០ហិកតា របស់ពលរដ្ឋក្នុងឃុំអញ្ចើម ស្រុកត្បូងឃ្មុំ ខេត្តត្បូងឃ្មុំ។ នេះបើតាមលោក ហេង ពិសិដ្ឋ ប្រធានមន្ទីរកសិកម្មខេត្តត្បូងឃ្មុំ ប្រាប់សារព័ត៌មាន Thmeythmey25។ 
ខណៈដែលដំណាំស្រូវនៅក្នុងបណ្តាជាច្រើននៅកម្ពុជា រងការជន់លិច និងខូចខាតដោយទឹកជំនន់ នៅឯខេត្តត្បូងឃ្មុំឯណោះវិញ អាជ្ញាធរអះអាងថា សត្វកណ្តុរ បានកាត់បំផ្លាញដំណាំស្រូវ ប្រមាណ ៨០ហិកតា របស់ពលរដ្ឋនៅឃុំអញ្ចើម ស្រុកត្បូងឃ្មុំ ។
លោក ហេង ពិសិដ្ឋ ប្រធានមន្ទីរកសិកម្មខេត្តត្បូងឃ្មុំ បានប្រាប់សារព័ត៌មាន Thmeythmey25 ថា៖«ការបំផ្លាញដំណាំស្រូវរបស់ប្រជាពលរដ្ឋ ដោយសារប៉ុន្មានសប្តាហ៍មកនេះ ទឹកភ្លៀងធ្លាក់ជាបន្តបន្ទាប់ លិចវាលស្រែនៅតំបន់ទំនាប ដែលខ្វះទឹកកន្លងមក ដែលជាហេតុធ្វើឲ្យសត្វកណ្តុរបានបម្លាស់ទីទៅប្រមូលផ្តុំតំបន់ទួល។ វាទៅកាត់ស៊ីស្រូវនៅតំបន់នោះ ខូចអស់ប្រហែល៨០ហិកតាហ្នឹង»។
ស្រូវដែលសត្វកណ្ដុរបានកាត់បំផ្លាញនេះ ជាប្រភេទស្រូវផ្ការំដួល ដែលនៅចំណុចខ្លះជាស្រូវផើម និងនៅតំបន់ខ្លះស្រូវបានចេញផ្កា និងកួរ។ នេះបើតាមប្រធានមន្ទីរកសិកម្មខេត្តត្បូងឃ្មុំ ដែលបានបន្តប្រាប់ThmeyThmey25 ទៀតថាមានតែត្រឹមមួយឃុំអញ្ចើមនេះប៉ុណ្ណោះដែលស្រូវពលរដ្ឋខូចដោយសារសត្វកណ្តុរ ខណៈតំបន់ផ្សេងមិនមានរងគ្រោះនោះទេ។ ទឹកជំនន់ ក៏មិនបង្កផលប៉ះពាល់ដល់ខេត្តត្បូងឃ្មុំនោះទេ។
ដើម្បីទប់ស្កាត់ និងកម្ចាត់បញ្ហាសត្វកណ្តុរបំផ្លាញស្រូវនេះ មន្ទីរកសិកម្មខេត្តត្បូងឃ្មុំ បានណែនាំឲ្យកសិករដាក់បំពង់ឫស្សី ឬទុយោនៅក្បែរភ្លឺស្រែ ដាក់សម្រាស់ជាគំនរៗដើម្បីចាប់កណ្តុ ឬក៏ ប្រើអង្គប់ចាប់កណ្តុរ ឬដាក់នុយបំពុលជាដើម។
សូមជម្រាបថាគិតត្រឹមថ្ងៃទី១៩តុលានេះ មានរាជធានី-ខេត្តចំនួន១៩ហើយ បានរងគ្រោះដោយសារទឹកជំនន់។ តាមរបាយការណ៍គណកម្មាធិការជាតិគ្រប់គ្រងគ្រោះមហន្តរាយ មានដំណាំស្រូវ និងដំណាំរួមផ្សំជិត៣០ម៉ឺនហិកតា បានរងការជន់លិច។ គ្រោះធម្មជាតិនេះបានប៉ះពាល់ពលរដ្ឋជាង៣០ម៉ឺននាក់ និងជាង៧ម៉ឺនត្រូវជម្លៀសទៅទីសុវត្ថិភាព។ តាមរបាយការណ៍ដដែល តួលេខអ្នកស្លាប់ដោយសារទឹកជំនន់នេះ បានកើនដល់២៥នាក់ហើយ គិតត្រឹមថ្ងៃទី១៩ តុលានេះ៕
Tag:
កសិកម្ម
ស្រូវ
ត្បូងឃ្មុំ
© រក្សាសិទ្ធិដោយ thmeythmey.com
