ជាតិ
សង្គមជាតិ
កុមារអាយុ៣ឆ្នាំ បន្តស្ថិតក្រោមការថែទាំរបស់ឪពុកម្តាយដែលមានកូវីដ-១៩ លោកស្រី ឱ វណ្ណឌីន អ្នកនាំពាក្យក្រសួងសុខាភិបាល
× ភ្នំពេញ៖ ប្តីប្រពន្ធជនជាតិខ្មែរមួយគូ បានក្លាយជាអ្នកឆ្លង COVID-19 ២ករណីចុងក្រោយនៅកម្ពុជា ខណៈកូនរបស់ពួកគាត់ដែលរួមដំណើរពីអឺរ៉ាក់ជាមួយគ្នានោះ មានលទ្ធផលតេស្តលើកដំបូងអវិជ្ជមាន។ បើតាមលោកស្រី ឱ វណ្ណឌីន អ្នកនាំពាក្យក្រសួងសុខាភិបាល កុមាររូបនោះ បន្តស្ថិតក្រោមការថែទាំយ៉ាងប្រុងប្រយ័ត្នពីសំណាក់ឪពុកម្តាយរបស់ខ្លួនដដែល ដោយសារមិនមានអ្នកផ្សេងជំនួស។
ឆ្លងកាត់ទីក្រុងដូហា បន្តហោះហើរពីប្រទេសកូរ៉េខាងត្បូង ហើយមកដល់កម្ពុជានាថ្ងៃទី១៨ ខែតុលានោះ បុរសអាយុ៣៣ឆ្នាំ និងភរិយាអាយុ៣២ឆ្នាំ ជាអ្នកដំណើរតែពីរនាក់គត់ដែលមានលទ្ធផលតេស្តវិជ្ជមាន ខណៈអ្នកដំណើរជាង១០០នាក់ទៀត រួមទាំងកូនរបស់គាត់ អវិជ្ជមាន។
អ្នកដំណើរផ្សេងទៀតត្រូវបន្តធ្វើចត្តាឡីស័កនៅតាមសណ្ឋាគារមួយចំនួន រួមទាំងមណ្ឌលកងទ័ពជើងអាកាស ស្របពេលដែលប្តីប្រពន្ធទាំងពីរនាក់នោះ សម្រាកព្យាបាលនៅមន្ទីរពេទ្យមិត្តភាពសូវៀត។
អ្នកនាំពាក្យក្រសួងសុខាភិបាលបានរៀបរាប់ដូច្នេះថា៖«យើងនៅតាមដានសុខភាពក្មេង ដោយយើងមិនដឹងថាគេអាចឆ្លងពីឪពុកម្តាយឬយ៉ាងណានោះឡើយ។ ប៉ុន្តែលទ្ធភាពឆ្លងគឺខ្ពស់ហើយ។ ដោយសារគាត់អត់មានអ្នកជួយមើលថែ។ អ៊ីចឹងបច្ចុប្បន្ន កូនហ្នឹងស្ថិតនៅក្រោមការតាមដានសុខភាពនៅមន្ទីរពេទ្យជាមួយនឹងឪពុកម្តាយគាត់ហ្នឹង»។
មកដល់ពេលនេះ កម្ពុជា មានកូវីដ-១៩ សរុប២៨៥ករណី ដោយសះស្បើយ២៨០នាក់។ អ្នកជំងឺឡើងដល់៥នាក់ កំពុងសម្រាកព្យាបាលនៅមន្ទីរពេទ្យមិត្តភាពខ្មែរសូវៀតក្នុងនោះមានប្តីប្រពន្ធខ្មែរដែលទើបមកពីអ៊ីរ៉ាក់ ហើយ៣នាក់ទៀតជាបុរសខ្មែរ បុរសឥណ្ឌូណេស៊ី និងស្ត្រីបារាំង៕
© រក្សាសិទ្ធិដោយ thmeythmey.com