COVID-19
អន្តរជាតិ
របាយការណ៍៖ កំពូលអ្នកមាននៅចិន កើនទ្រព្យ១,៥ទ្រីលានដុល្លារអំឡុងពេលវិបត្តិកូវីដ-១៩ លោក ជេក ម៉ា ស្ថាបនិកក្រុមហ៊ុន អាលីបាបា (Alibaba) ។ រូបភាព៖ AFP
× ទ្រព្យសម្បត្តិរបស់កំពូលមហាសេដ្ឋីរបស់ចិន បានកើន១,៥ទ្រីលានដុល្លារក្នុងឆ្នាំ២០២០ ដែលចំនួននេះលើសលុយដែលរកបាន៥ឆ្នាំចុងក្រោយបូកបញ្ចូលគ្នាទៅទៀត។ នេះបើតាមរបាយការណ៍អ្នកមានប្រចាំឆ្នាំ នៅថ្ងៃទី ២០ ខែតុលា ។ មូលហេតុចម្បងនៃការកើនឡើងនេះ គឺវិស័យពាណិជ្ជកម្មអេឡិចត្រូនិក និងហ្គេមអនឡាញមានសន្ទុះខ្លាំង អំឡុងពេលបិទប្រទេសដោយសារជំងឺរាតត្បាតសកលកូវីដ-១៩។
មនុស្ស២៥៧នាក់បន្ថែមទៀត ត្រូវបានដាក់បញ្ចូលក្នុងបញ្ជីឈ្មោះមហាសេដ្ឋីលុយពាន់លានដុល្លារ (the billionaires club) របស់ចិនដែលមានសេដ្ឋកិច្ចលំដាប់ទី២របស់ពិភពលោក គិតត្រឹមខែសីហា ក្រោយពីបាត់បង់សមាជិក២ឆ្នាំជាប់គ្នា។ របាយការណ៍ Hurun ដែលមានមូលដ្ឋាននៅទីក្រុង សៀងហៃ ប្រទេសចិន បញ្ជាក់បែបនេះ។
យោងតាមរបាយការណ៍ដដែល បច្ចុប្បន្ន ចិន មានមហាសេដ្ឋីប្រាក់ពាន់លានដុល្លារសរុប ៨៧៨នាក់ ចំណែកសហរដ្ឋអាមេរិកមាន ៦២៦នាក់ ។ ទន្ទឹមនេះ របាយការណ៍នេះ បានរកឃើញថាមានបុគ្គលប្រមាណ២០០០នាក់ កាន់កាប់ទ្រព្យសម្បតិ្តបូកបញ្ចូលគ្នារហូតដល់ ៤ ទ្រីលានដុល្លារ គិតត្រឹមខែសីហា។
លោក ជេក ម៉ា ស្ថាបនិកក្រុមហ៊ុន អាលីបាបា (Alibaba) ឈរនៅកំពូលតារាងនេះម្ដងទៀត ក្រោយទ្រព្យសម្បត្តិលោកហក់ឡើង៤៥ភាគរយទៅកាន់ ៥៨,៨ពាន់លានដុល្លារ។ តាមពីក្រោយលោក គឺ លោក Pony Ma ដែលមានទ្រព្យសម្បត្តិសរុប ៥៧,៤ពាន់លានដុល្លារ។ លោក ជាម្ចាស់ក្រុមហ៊ុនផលិតហ្គេម Tencent និងម្ចាស់កម្មវិធីទូរសព្ទ WeChat ។
ចំណែក លោក Zhong Shanshan ដែលទើបជាប់តារាងនេះលើកដំបូង ជាម្ចាស់ក្រុមហ៊ុនលក់ទឹកបរិសុទ្ធម៉ាក Nongfu ដោយលោតដល់ចំណាត់ថ្នាក់លេខ៣ ជាមួយទ្រព្យសម្បត្តិ ៥៣,៧ពាន់លានដុល្លារ ។
«ពិភពលោក ពុំធ្លាប់ឃើញទ្រព្យសម្បត្តិច្រើនសន្ធឹកបែបនេះ រកបានត្រឹមតែពេលមួយឆ្នាំ»។ ប្រធានអ្នកស្រាវជ្រាវរបាយការណ៍ Hurun លោក Rupert Hoogewerf បញ្ជាក់បែបនេះក្នុងសេចក្តីថ្លែងការណ៍ ដែលដកស្រង់ចុះផ្សាយដោយទីភ្នាក់ងារព័ត៌មាន AFP ។ លោកបន្ថែមថា បញ្ជីឈ្មោះឆ្នាំនេះ បង្ហាញថា ប្រទេសចិនបានងាកចេញពីវិស័យប្រពៃណីដូចជា ឧស្សាហកម្មផលិត និងអចលនទ្រព្យ ឆ្ពោះទៅរកសេដ្ឋកិច្ចថ្មី ដែលជាសេដ្ឋកិច្ចឌីចីថល ៕
© រក្សាសិទ្ធិដោយ thmeythmey.com