ជាតិ
សង្គមជាតិ
ខាងមុខតុលាការរាជធានីភ្នំពេញ ថតនៅថ្ងៃទី១៥ ខែមករា ឆ្នាំ២០២០ ដោយភ្នាក់ងារ AFP
×![]()
ដោយ: សារព័ត៌មានថ្មីៗ
ចៅក្រមស៊ើបសួរនៃតុលាការរាជធានីភ្នំពេញ បង្គាប់ឲ្យយកមន្ត្រី២នាក់នៃអតីតគណបក្សសង្គ្រោះជាតិ ទៅឃុំជាបណ្តោះសន្ន នៅពន្ធនាគារព្រៃស ក្នុងថ្ងៃទី២០ ខែតុលា ឆ្នាំ២០២០ ដើម្បីរង់ចាំចំណាត់ការតាមនីតិវិធីបន្ត ក្រោមបទចោទប្រមាថព្រះមហាក្សត្រ។ នេះបើតាមព្រះរាជអាជ្ញារង គុជ គឹមឡុង អ្នកនាំពាក្យអយ្យការអមសាលាដំបូងរាជធានីភ្នំពេញ ក្នុងកិច្ចសម្ភាសជាមួយសារព័ត៌មានថ្មីៗ តាមទូរស័ព្ទ។ 
មន្ត្រីអតីតគណបក្សប្រឆាំងទាំង២នាក់នោះ គឺលោក គង់ ប៊ុនហ៊ាង វ័យ៦៦ឆ្នាំ និង លោក ហង្ស សេង វ័យ៦៩ឆ្នាំ។ អ្នកទាំង២ សុទ្ធតែជាអតីតសមាជិកគណៈកម្មការប្រតិបត្តិបក្សប្រឆាំងប្រចាំខេត្តបាត់ដំបង។
លោក សំ សុគង់ ជាមេធាវីការពារក្តី ប្រាប់សារព័ត៌មានថ្មីៗថា អ្នកទាំង២ ដែលជាកូនក្តីរបស់លោក ត្រូវបានកម្លាំងសមត្ថកិច្ច ឃាត់ខ្លួន នៅខេត្តបាត់ដំបង ហើយបន្ទាប់មក ត្រូវបានបញ្ជូនទៅឲ្យតុលាការរាជធានីភ្នំពេញ ចាត់ការតាមនីតិវិធី។ លោក ពន្យល់ថា មូលហេតុ គឺដោយសារក្រសួងមហាផ្ទៃ ជាអ្នកបើកការស៊ើបអង្កេតលើករណីនេះ ដូច្នេះហើយ ទើបកូនក្តីរបស់លោកទាំង២ ត្រូវបានបញ្ជូនទៅឲ្យតុលាការរាជធានីភ្នំពេញ។
យ៉ាងណា លោកមេធាវី ពុំទាន់ដឹងពីអង្គហេតុច្បាស់ឡើយថា កូនក្តីរបស់លោក បានប្រព្រឹត្តអំពើអ្វី ទើបត្រូវចោទប្រកាន់ពីបទប្រមាថព្រះមហាក្សត្រ។ លោក មានប្រសាសន៍ថា៖«អត់ទាន់ដឹងទេ ព្រោះអត់ទាន់បានជួបពួកគាត់ ចាំស្អែក (២១តុលា) បានដឹង ស្អែក ខ្ញុំ ទៅជួបពួកគាត់»។
ឧត្តមសេនីយ៍ឯក ឆាយ គឹមខឿន អ្នកនាំពាក្យអគ្គស្នងការដ្ឋាននគរបាលជាតិ សុំមិនបង្ហាញអង្គហេតុ ដែលនាំទៅដល់ការចាប់ខ្លួននិងការចោទប្រកាន់លើមន្ត្រីអតីតគណបក្សទាំង២នាក់នោះ ដោយលោក លើកហេតុផលថា វា ពាក់ព័ន្ធនឹងក្រមសីលធម៌និងវិជ្ជាជីវៈ ហើយម្យ៉ាងទៀត សំណុំរឿងនេះ មិនទាន់ត្រូវបានបញ្ចប់ឡើយ។ លោក ថ្លែងថា នៅពេល តុលាការកាត់ក្តី គេ នឹងបានដឹងច្បាស់ពីសំណុំរឿងរបស់អ្នកទាំង២។
ក្នុងកិច្ចសន្ទនាជាមួយសារព័ត៌មានថ្មីៗ មន្ត្រីនគរបាលជាន់ខ្ពស់រូបនេះ និយាយយ៉ាងខ្លីថា៖«សមត្ថកិច្ច មានភស្តុតាគ្រប់គ្រាន់ ដើម្បីចាប់ពួកគាត់ ដាក់ពន្ធនាគារ...បើអត់មានភស្តុតាង សមត្ថកិច្ច ទៅចាប់ម៉េចកើត...»។
មាត្រា៤៣៧ (ស្ទួន) នៃក្រមព្រហ្មទណ្ឌ ចែងថា អ្នក ដែលប្រមាថព្រះមហាក្សត្រ នឹងត្រូវផ្តន្ទាទោសឲ្យជាប់ពន្ធនាគារពី ១ឆ្នាំ ទៅ ៥ឆ្នាំ និងរងការពិន័យជាប្រាក់ពី ២លានរៀល ទៅ១០លានរៀល៕
Tag:
មន្ត្រីបក្សប្រឆាំង
បទប្រមាថព្រះមហាក្សត្រ
© រក្សាសិទ្ធិដោយ thmeythmey.com
