COVID-19
អន្តរជាតិ
ថៃ អាចបានវ៉ាក់សាំង COVID-19 នៅខែមិថុនា ប្រសិនបើរដ្ឋាភិបាលយល់ព្រមលើវ៉ាក់សាំងអង់គ្លេស ទីស្នាក់ការក្រុមហ៊ុនឱសថ AstraZeneca ក្នុងទីក្រុងឡុងដ៍។ រូបភាព Xinhua
×
ដោយ៖កង ម៉េងហុង
ប្រធានវិទ្យាស្ថានវ៉ាក់សាំងជាតិរបស់ថៃ លោក Nakorn Premsri និយាយថា ថៃអាចទទួលបានវ៉ាក់សាំង COVID-19 ក្នុងខែមិថុនា ឆ្នាំក្រោយ ប្រសិនបើវ៉ាក់សាំងដែលត្រូវបានអភិវឌ្ឍឡើងដោយក្រុមហ៊ុន AstraZeneca ត្រូវបានអនុម័តដោយរដ្ឋាភិបាលថៃ។
នាយកវិទ្យាស្ថានវ៉ាក់សាំងជាតិ លោក Nakorn Premsri លើក្នុងសន្និសីទថ្ងៃទី២០ ខែតុលាថា ថៃនឹងទទួលបានវ៉ាក់សាំង COVID-19 ពី AstraZeneca ដោយសារតែក្រុមហ៊ុន Siam Bioscience Group ត្រូវបានជ្រើសរើសដោយក្រុមហ៊ុនឱសថដែលមានមូលដ្ឋាននៅចក្រភពអង់គ្លេសមួយនេះ ជាដៃគូក្នុងតំបន់របស់ខ្លួនដើម្បីផលិតវ៉ាក់សាំងសម្រាប់តំបន់អាស៊ីអាគ្នេយ៍។ ក្រុមហ៊ុន Siam Bioscience Group និងក្រុមហ៊ុន AstraZeneca ត្រូវរំពឹងថា នឹងចុះហត្ថលេខាលើកិច្ចព្រមព្រៀងផ្ទេរបច្ចេកវិទ្យានៅចុងខែក្រោយដែរ។
វ៉ាក់សាំងប្រឆាំង COVID-19 ដែលត្រូវពិសោធដោយ AstraZeneca ជាផលិតផលអភិវឌ្ឍរួមគ្នាជាមួយសាកលវិទ្យាល័យ Oxford ។ វ៉ាក់សាំងរបស់ពួកគេ ត្រូវបានរាយការណ៍ថា ឈានដល់ដែលមានប្រសិទ្ធភាពជាងគេក្នុងចំណោមបេក្ខភាពវ៉ាក់សាំងមួយចំនួនទៀត។
«យើងនឹងទទួលបានវ៉ាក់សាំងលើកដំបូងនៅត្រឹមខែមិថុនា ប្រសិនបើអ្វីៗដំណើរការទៅតាមកាលវិភាគ។» លោក Nakorn និយាយបែបនេះ ហើយក៏បានបន្តថា ចំពោះវ៉ាក់សាំងដែលនឹងទទួលបានលើកដំបូងនេះ នឹងមិនគ្រប់គ្រាន់តាមដែលតម្រូវការ។ យ៉ាងណា មន្ត្រីវ៉ាក់សាំងថៃរូបនេះ អះអាងថា ថៃក៏នឹងមានកិច្ចព្រមព្រៀងជាមួយក្រុមហ៊ុនឱសថដទៃទៀតដែលជាបេក្ខភាពខ្លាំងក្នុងការផលិតវ៉ាក់សាំង ដើម្បីទទួលបានវ៉ាក់សាំងសម្រាប់ចំនួនប្រជាជនពាក់កណ្ដាលដែរ។
ថៃត្រូវការវ៉ាក់សាំងចំនួន៦៦លានដូសសំរាប់ប្រជាជនចំនួន៣៣លាននាក់របស់ខ្លួន។ ក្រុមហ៊ុន Siam Bioscience Group បានបញ្ជាក់ថា ខ្លួនមានសមត្ថភាពអាចបំពេញបាន ២០ ភាគរយនៃតម្រូវការ។ ក្រៅពីផលិតវ៉ាក់សាំងសម្រាប់តម្រូវការក្នុងប្រទេស ក្រុមហ៊ុន Siam Bioscience Group ក៏នឹងបង្កើតវ៉ាក់សាំងសម្រាប់បណ្តាប្រទេសនៅក្នុងតំបន់អាស៊ានផងដែរ។
ក្រៅពីទិញពីខាងក្រៅ ថៃ ក៏ប្រឹងអភិវឌ្ឍវ៉ាក់សាំងខ្លួនឯងដែរ ប៉ុន្តែមិនទាន់លទ្ធផលសមប្រកបនៅឡើយ។ បច្ចុប្បន្ន ថៃ មានវ៉ាក់សាំងមួយដែលត្រូវបានអភិវឌ្ឍឡើងដោយសាកលវិទ្យាល័យជូឡាឡុងកន។ ត្រង់នេះ វេជ្ជបណ្ឌិត Nakorn បាននិយាយថា វាមិនទំនងអាចត្រូវបានសាកល្បងនៅដំណាក់មនុស្សនៅក្នុងថៃ ដោយសារតែចំនួនករណី COVID-19 នៅក្នុងប្រទេសនេះមានកម្រិតទាប៕
© រក្សាសិទ្ធិដោយ thmeythmey.com