ជប៉ុននិងឥណ្ឌូណេស៊ី ឯកភាពលើកកម្ពស់កិច្ចសហប្រតិបត្តិសន្តិសុខទ្វេភាគី

COVID-19

អន្តរជាតិ

ជប៉ុននិងឥណ្ឌូណេស៊ី ឯកភាពលើកកម្ពស់កិច្ចសហប្រតិបត្តិសន្តិសុខទ្វេភាគី

21, Oct 2020 , 11:26 am

រូបភាព

នាយករដ្ឋមន្រ្តីជប៉ុន ស៊ូហ្កា យូស៊ីហ៊ីដេ នាសន្និសីទសារព័ត៌មានជាមួយប្រធានាធិបតី ចូកូ វីដូដូ។ រូបភាពពីការិយាល័យនាយករដ្ឋមន្រ្តីជប៉ុន

ដោយ: ធៀន ភារិន្ទ

ជប៉ុន និងឥណ្ឌូណេស៊ី នៅថ្ងៃទី២០ ខែតុលា បានយល់ព្រមពន្លឿនកិច្ចចរចាលើកិច្ចព្រមព្រៀងលក់អាវុធ ស្របពេលចិនកំពុងអុងអាត់នៅក្នុងសមុទ្រចិនខាងត្បូង។ មិនត្រឹមតែប៉ុណ្ណោះ ទីក្រុងតូក្យូ ក៏បានសន្យាផ្តល់ប្រាក់កម្ចីជាង ៤០០លានដុល្លារផងដែរ ដើម្បីទប់ស្កាត់ និងដោះស្រាយបញ្ហាCOVID-19។

អត្ថបទទាក់ទង

ជប៉ុន និងវៀតណាមឯកភាពគ្នាជាគោលការណ៍លើកិច្ចព្រមព្រៀងលក់អាវុធ

បន្ទាប់ពីទស្សនកិច្ចនៅវៀតណាម នាយករដ្ឋមន្ត្រីជប៉ុន លោក ស៊ូហ្កា យូស៊ីហ៊ីដេ បន្តដំណើរទៅឥណ្ឌូណេស៊ី ដែលជាគោលដៅទស្សនកិច្ចចុងក្រោយនៅអាស៊ីអាគ្នេយ៍។ ក្នុងជំនួបជាមួយប្រធានាធិបតីឥណ្ឌូណេស៊ី លោក ចូកូ វីដូដូ លោកស៊ូហ្កា បានលើកយកប្រធានបទជាច្រើនមកជជែក ក្នុងនោះក៏មានកិច្ចព្រមព្រៀងលក់អាវុធរបស់ជប៉ុន។ អំឡុងទស្សនកិច្ចនៅវៀតណាម លោក ស៊ូហ្កា ក៏ឯកភាពជាមួយសមភាគីវៀតណាមក្នុងការទិញលក់អាវុធដែរ។

«យើងបានឯកភាពជំនួបរដ្ឋមន្ត្រីការបរទេស និងការពារជាតិឲ្យបានលឿន និងពន្លឿនកិច្ចចរចាលើកិច្ចព្រមព្រៀងលក់សម្ភារការពារ និងបច្ចេកវិទ្យា»។ លោកនាយករដ្ឋមន្ត្រី ស៊ុហ្កា បានលើកឡើងបែបនេះ ដោយបន្ថែមថាជំនួបខាងលើ គឺជាការលើកកម្ពស់កិច្ចសហប្រតិបត្តិទ្វេភាគីលើការការពារជាតិ និងសន្តិសុខ ក្នុងបរិបទនៃការផ្លាស់ប្តូរស្ថានភាពក្នុងតំបន់។

ចំណែកប្រធានាធិបតីឥណ្ឌូណេស៊ី វីដូដូ ដែលត្រូវបានស្គាល់ជាទូទៅថា លោក ចូកូវី បានបញ្ជាក់នៅក្នុងសន្និសីទកាសែតរួមគ្នាជាមួយប្រមុខរដ្ឋាភិបាលជប៉ុនថា ភាពជាដៃគូដ៏រឹងមាំរវាងទីក្រុងតូក្យូ និងទីក្រុងហ្សាការតា គឺសំខាន់ណាស់ ក្នុងស្ថានភាពអាមេរិក-ចិន កំពុងមានភាពតានតឹងជាមួយគ្នា។

ការឯកភាពពន្លឿនលើកិច្ចចរចាលក់អាវុធនេះ ធ្វើឡើងក្នុងពេលចិន កំពុងធ្វើសកម្មភាពយ៉ាងខ្លាំងនៅក្នុងសមុទ្រចិនខាងត្បូង និងសមុទ្រចិនខាងកើត។ គិតពីឆ្នាំ២០១៤មក ជប៉ុនបានចុះកិច្ចព្រមព្រៀងលក់សម្ភារការពារ និងបច្ចេកវិទ្យាជាមួយហ្វីលីពីន និងថ្មីៗនេះ ជាមួយវៀតណាម។

ក្រៅពីកិច្ចចរចាលក់អាវុធ ជប៉ុនក៏បានសន្យាផ្តល់ប្រាក់កម្ចីប្រមាណ ៤៧៣លានដុល្លារ ក្នុងអត្រាការប្រាក់ទាប ដល់ឥណ្ឌូណេស៊ីផងដែរ ដើម្បីដោះស្រាយបញ្ហាសេដ្ឋកិច្ច ដែលបង្កដោយCOVID-19 ។ កាលពីខែកុម្ភៈ ទីក្រុងតូក្យូ ក៏ឲ្យទីក្រុងហ្សារកាតាខ្ចីលុយប៉ុន្មានពាន់លានយ៉េនផងដែរ

សូមបញ្ជាក់ថា ក្នុងនាមជាបងធំនៅអាស៊ាន ឥណ្ឌូណេស៊ី មិនចង់ពាក់ព័ន្ធនឹងការប្រឈមមុខដាក់គ្នារវាងចិន និងអាមេរិកនៅក្នុងតំបន់ឡើយ។ កន្លងមកឥណ្ឌូណេស៊ី បានបណ្ដេញទូកល្បាតចិនចេញពីតំបន់សេដ្ឋកិច្ចផ្តាច់មុខរបស់ខ្លួន ហើយថែមទាំងបដិសេធ មិនឲ្យយន្តហោះស៊ើបការណ៍អាមេរិកចុះចត ដើម្បីចាក់សាំងថែមទៀត៕