កីឡាអន្តរជាតិ
អន្តរជាតិ
Solskjaer ព្រមានក្រុមដទៃថា Man Utd ត្រឡប់មកវិញហើយ ក្រោយឈ្នះ PSG ២-១
× លោក Ole Gunnar Solskjaer បានផ្ញើការព្រមានទៅកាន់ក្រុមគូប្រជែងរបស់ Manchester United ដទៃទៀតថា ក្រុមរបស់លោកនៅពេលនេះបានត្រឡប់មករកភាពខ្លាំងវិញហើយ បន្ទាប់ពីយកឈ្នះ Paris Saint-Germain ២-១។
នាការប្រកួតពានរង្វាន់ UEFA Champions League វគ្គសន្សំពិន្ទុពូល H នៅរាត្រីថ្ងៃទី២០ តុលា នាកីឡដ្ឋាន Parc des Princes ខ្សែប្រយុទ្ធ Marcus Rashford ជាអ្នកស៊ុតគ្រាប់ជ័យជម្នះឲ្យក្រុមបិសាចក្រហម ដើម្បីជួយក្រុមលោក Solskjaer ទទួលបាន៣ពិន្ទុសម្រាប់ជំនួបបើកឆាក។
មុនគ្រាប់បាល់របស់ Rashford ដែលសម្រេចបាននៅនាទី៨៧ គ្រាប់ដំបូងរបស់ Man Utd ធ្វើបានដោយ Bruno Fernandes តាមរយៈការស៊ុតបាល់ពិន័យប៉េណាល់ទីនៅនាទី២៤ មុន Anthony Martial តែតបញ្ចូលទីក្រុមខ្លួនឯងនៅនាទី៥៥។ ចប់ការប្រកួត Man Utd ឈ្នះក្រុម PSG ដោយលទ្ធផល ២-១ ខណៈ PSG ក្រោមការដឹកនាំរបស់អ្នកចាត់ការទូទៅ Thomas Tuchel នៅតែមិនអាចសងសឹកបាន។
នាកីឡដ្ឋាន Parc des Princes កាលពី១៩ខែមុន ក្រុមយក្សបារាំងទទួលបានការខកចិត្តម្តងរួចមកហើយ ដោយក្រុមបិសាចក្រហមបានទម្លាក់ពួកគេត្រឹមវគ្គ១៦ក្រុមនៃក្របខណ្ឌកំពូលអឺរ៉ុបនេះ តាមរយៈការវាយបកយកឈ្នះនៅជើងទី២ក្នុងលទ្ធផល ៣-១ ខណៈជើងទី១នៅ Old Trafford ក្រុម PSG ឈ្នះ ២-០។
ទម្រង់លេងរបស់ក្រុម Man Utd យប់មិញនេះ ទទួលបានការសរសើរយ៉ាងខ្លាំងពីអ្នកចាត់ការលោក Solskjaer។ អ្នកចាត់ការសញ្ជាតិន័រវែស មានអារម្មណ៍ថា ក្រុមរបស់លោកនៅពេលនេះកំពុងបោះជំហានទៅមុខយ៉ាងខ្លាំងបន្ទាប់ពីរង្គោះរង្គើនៅប៉ុន្មានសប្តាហ៍ដំបូង។
«ខ្ញុំពិតជាសប្បាយចិត្តណាស់សម្រាប់ទម្រង់លេងរបស់ពួកគេ។ ខ្ញុំជឿថាយើងមានលទ្ធភាពដើម្បីប្រឆាំងនឹងក្រុមល្អៗដទៃបាន ព្រោះពេលនេះយើងលេងបានត្រឹមត្រូវដូចដែលយើងចង់បាន។ យើងបានមើលការប្រកួតនេះ ហើយប្រាកដណាស់ថា ទម្រង់លេងរបស់ Man Utd ពីមុនបានត្រឡប់មកវិញហើយ»។
តាមរយៈជ័យជម្នះនេះ បាននាំឲ្យ Man Utd ឈកំពូលតារាងពូល H មាន៣ពិន្ទុ ស្មើជាមួយ RasenBallsport Leipzig ដែលបានយកឈ្នះ Istanbul Basaksehir ក្នុងលទ្ធផល ២-០។
លទ្ធផលគូដទៃក្រោយការប្រកួតនៅយប់ថ្ងៃទី២០ ខែតុលា៖
Tag:
Ole Gunnar Solskjaer
Paris Saint-Germain
Champions League
© រក្សាសិទ្ធិដោយ thmeythmey.com