ជាតិ
ពលរដ្ឋ ចាប់បានក្រពើមួយក្បាល នៅខេត្តព្រះសីហនុ
×
ដោយ៖ ប៉ូ សុភា
ក្រពើមួយក្បាល ត្រូវបានប្រជាពលរដ្ឋចាប់បាន នៅក្នុងភូមិ២ សង្កាត់ទី២ ក្រុងព្រះសីហនុ ខេត្តព្រះសីហនុ កាលពីយប់ថ្ងៃទី២០ តុលា។ នេះបើតាមអ្នកស្រី សំរឹទ្ធ សុខេមរា ជាចៅសង្កាត់ស្តីទីនៅមូលដ្ឋានផ្ទាល់។
អ្នកស្រី សំរឹទ្ធ សុខេមរា បានបញ្ជាក់ថា ក្រុមការងារអ្នកស្រី មិនទាន់អាចកំណត់អត្តសញ្ញាណប្រភពនៃក្រពើនៅឡើយទេ ខណៈក្រុងព្រះសីហនុបច្ចុប្បន្ន ពុំមានកន្លែងចិញ្ចឹមក្រពើ។ បើតាមអ្នកស្រី សុខេមរា ក្រពើដែលពលរដ្ឋចាប់បាននេះ មានទម្ងន់៦គីឡូក្រាម។
ថ្លែងប្រាប់សារព័ត៌មានថ្មីៗ ចៅសង្កាត់ស្តីទីរូបនេះ បានបញ្ជាក់ថាដូច្នេះថា៖« នៅក្នុងក្រុងនេះ ធ្លាប់មានកន្លែងចិញ្ចឹមមួយកន្លែង តែគេឈប់ចិញ្ចឹមយូរហើយ។ រីឯកសិដ្ឋាន ចិញ្ចឹមក្រពើនៅឯសកលវិទ្យាល័យឡាយហ្វ៍ ដែលក្រុមការងារចុះទៅត្រួតពិនិត្យក៏ឈប់ចិញ្ចឹម ពីរ-បីខែមកហើយ ដូច្នេះយើងមិនទាន់អាចសន្និដ្ឋាន ពីប្រភពនៃក្រពើនេះនៅឡើយទេ»។
អ្នកស្រី សុខេមរា អំពាវនាវដល់ប្រជាពលរដ្ឋទាំងអស់ បង្កើនការប្រុងប្រយ័ត្នឱ្យបានខ្ពស់ ចំពោះសុវត្ថិភាពផ្ទាល់ខ្លួន ក្នុងរដូវកាលគ្រោះទឹកជំនន់នេះ ។
សូមបញ្ជាក់ថា ក្រពើដែលប្រជាពលរដ្ឋចាប់បាន កាលពីថ្ងៃ២០ កន្លងទៅ មិនត្រូវបានយកទៅប្រលែងឡើយ គឺត្រូវបានប្រជាពលរដ្ឋសម្លាប់បាត់ទៅហើយ។ នេះបើតាមអ្នកស្រីចៅសង្កាត់ស្តីទី៕
© រក្សាសិទ្ធិដោយ thmeythmey.com