ជប៉ុន នឹងឲ្យកម្ពុជាខ្ចី២៣៧លានដុល្លារ ដោះស្រាយបញ្ហាសេដ្ឋកិច្ចបង្កដោយកូវីដ-១៩

COVID-19

ជាតិ

អន្តរជាតិ

ជប៉ុន នឹងឲ្យកម្ពុជាខ្ចី២៣៧លានដុល្លារ ដោះស្រាយបញ្ហាសេដ្ឋកិច្ចបង្កដោយកូវីដ-១៩

21, Oct 2020 , 10:29 pm

រូបភាព

(ឆ្វេង) រដ្ឋមន្ត្រីការបរទេសជប៉ុន ម៉ូតេហ្គី តូស៊ីមីត្សឹ ជាមួយឧបនាយករដ្ឋមន្ត្រី ប្រាក់ សុខុន រដ្ឋមន្ត្រីកម្ពុជា អំឡុងទស្សនកិច្ចលោកមកកាន់ប្រទេសកម្ពុជា កាលពីថ្ងៃទី ២២ ខែសីហា ឆ្នាំ២០២០ ។ រូបពីក្រសួងការបរទេសកម្ពុជា

ដោយ:

រដ្ឋាភិបាលជប៉ុន នឹងផ្តល់កម្ចីទំហំប្រាក់២៥ពាន់លានយេន (ប្រមាណ២៣៧,៧លានដុល្លារ) ដើម្បីជួយកម្ពុជាដោះស្រាយបញ្ហាសេដ្ឋកិច្ច ដែលបង្កឡើងដោយជំងឺកូវីដ-១៩។ រដ្ឋមន្ត្រីការបរទេសជប៉ុន ម៉ូតេហ្គី តូស៊ីមីត្សឹ បានបញ្ជាក់ប្រាប់ទៅកាន់សមភាគីកម្ពុជា ឧបនាយករដ្ឋមន្ត្រី ប្រាក់ សុខុន បែបនេះ តាមរយៈទូរសព្ទ នៅរសៀលថ្ងៃទី ២១ ខែតុលា ។

អំឡុងកិច្ចសន្ទនារយៈពេល៣០នាទី រដ្ឋមន្ត្រីការបរទេសជប៉ុន ម៉ូតេហ្គី តូស៊ីមីត្សឹ បានប្រាប់ប្រមុខការទូតកម្ពុជា ប្រាក់ សុខុន ថា កម្ចី២៣៧,៧លានដុល្លារនេះ គឺជាជំនួយហិរញ្ញវត្ថុក្នុងគ្រាអាសន្ន ដើម្បីគាំទ្រប្រទេសកម្ពុជា ដែលរងគ្រោះដោយសារផលប៉ះពាល់សេដ្ឋកិច្ច បង្កឡើងដោយជំងឺកូវីដ-១៩។

គិតមកត្រឹមថ្ងៃទី២១ ខែតុលា កម្ពុជា មានករណីឆ្លងកូវីដ-១៩សរុប ២៨៦ ក្នុងនោះជាសះស្បើយ ២៨០នាក់ ខណៈគ្មានអ្នកស្លាប់ឡើយ។

ក្នុងសេចក្តីប្រកាសព័ត៌មានរបស់ក្រសួងការបរទេសជប៉ុន លោក ម៉ូតេហ្គី សង្កត់ធ្ងន់ទៀតថា លោកចង់បន្តពង្រឹងទំនាក់ទំនងជប៉ុន-កម្ពុជា ក្រោមរដ្ឋបាលនាយករដ្ឋមន្ត្រី ស៊ូហ្កា ដែលចូលកាន់តំណែងក្នុងខែកញ្ញាកន្លងទៅ

ជាមួយគ្នានេះ លោក ម៉ូតេហ្គី ក៏បានចូលរួមរំលែកទុក្ខចំពោះគ្រោះទឹកជំនន់ក្នុងប្រទេសកម្ពុជា ដែលសម្លាប់មនុស្ស៣៤នាក់ ហើយអះអាងទៀតថា ជប៉ុននឹងពិចារណាផ្ដល់ជំនួយតាមដែលអាចធ្វើទៅបាន។

ក្រៅពីផ្ដល់កម្ចីជាង២៣៧លានដុល្លារឲ្យកម្ពុជា លោក ម៉ូតេហ្គី ក៏បានបង្ហាញបំណងរបស់រដ្ឋាភិបាលជប៉ុនក្នុងការផ្ដល់ជំនួយសម្រាប់ពង្រឹងបរិស្ថានក្នុងតំបន់ប្រជុំជនរបស់កម្ពុជា ក៏ដូចជាវិធានការប្រឆាំងការចោលសំរាមប្លាស្ទិកចូលសមុទ្រផងដែរ។ ។

ជាការឆ្លើយតប លោក ប្រាក់ សុខុន រដ្ឋមន្ត្រីការបរទេសកម្ពុជា បានអបអរសាទរចំពោះការតែងតាំងឡើងវិញរបស់លោក ម៉ូតេហ្គី ហើយប្រាប់ថា លោកត្រៀមខ្លួនជានិច្ចដើម្បីធ្វើការជាមួយលោករដ្ឋមន្ត្រីក្នុងគោលដៅជំរុញទំនាក់ទំនងទ្វេភាគីជប៉ុន-កម្ពុជា។ នេះបើតាមសេចក្តីប្រកាសព័ត៌មានជប៉ុនដដែល។

បន្ថែមពីលើនេះ លោក ប្រាក់ សុខុន ក៏បានអរគុណសម្រាប់ការផ្ដល់ជំនួយរបស់រដ្ឋាភិបាលជប៉ុនក្នុងគ្រាលំបាកបែបនេះ ហើយក៏បង្ហាញបំណងរបស់លោកក្នុងការលើកកម្ពស់ការសម្របសម្រួលទ្វេភាគីដើម្បីប្រយុទ្ធប្រឆាំងជំងឺកូវីដ-១៩ ផងដែរ។

ក្នុងទិដ្ឋភាពអន្តរជាតិ រដ្ឋមន្ត្រីទាំងពីរ ក៏បានចែករំលែកទស្សនៈដើម្បីបន្តសម្របសម្រួលយ៉ាងជិតដិតក្នុងកិច្ចប្រឹងប្រែងសម្រាប់សមិទ្ធិផលនៃយុទ្ធសាស្ត្រ «ឥណ្ឌូ-ប៉ាស៊ីហ្វិកសេរីនិងបើកចំហ» និងការកែទម្រង់អង្គការសហប្រជាជាតិរួមមានក្រុមប្រឹក្សាសន្តិសុខជាដើម៕