COVID-19
អន្តរជាតិ
នាវាដឹកទំនិញ។ រូបតំំណាង។ រូបភាព៖ AFP
×![]()
អត្រាកំណើនពាណិជ្ជកម្មពិភពលោកសម្រាប់ឆ្នាំ២០២០ នេះ បានធ្លាក់ចុះពី៧ទៅ៩ភាគរយ ធៀបទៅនឹងឆ្នាំ២០១៩។ នេះបើតាមការព្យាករណ៍របស់ស្ថាប័នផ្នែកអភិវឌ្ឍអង្គការសហប្រជាជាតិ។ ប៉ុន្តែពាណិជ្ជកម្មក្នុងវិស័យខ្លះ នឹងនៅតែមានការកើនឡើងដែរ ដោយសារទំហំពាណិជ្ជកម្មរបស់ចិនមានការកើនឡើង១០ភាគរយ ក្នុងត្រីមាសទី៣ឆ្នាំ២០២០នេះ។
ចាប់តាំងការផ្ទុះជំងឺ COVID-19 មក ពាណិជ្ជកម្មនៅគ្រប់តំបន់ទាំងអស់ក្នុងពិភពលោកបានធ្លាក់ចុះជាមធ្យម១៩ភាគរយ ក្នុងត្រីមាសទី២ ឆ្នាំ២០២០ ធៀបទៅនឹងរយៈពេលដដែលក្នុងឆ្នាំ២០១៩។ នេះជាការប៉ាន់ស្មានរបស់សន្និសីទអង្គការសហប្រជាជាតិស្ដីពីពាណិជ្ជកម្ម និងការអភិវឌ្ឍន៍(UNCTAD) ដោយអះអាងថា ទំហំពាណិជ្ជកម្មធ្លាក់ចុះនេះ ធ្វើឲ្យប៉ះពាល់ដល់ដំណើរការសេដ្ឋកិច្ច។
UNCTAD អះអាងថា ទំហំពាណិជ្ជកម្មពិភពលោកមានការកើនឡើងបន្តិចក្នុងត្រីមាសទី៣ ឆ្នាំ២០២០ ដោយមានកំណើន៤, ៥ភាគរយ។ ប៉ុន្តែកំណើននេះ ក៏នៅមានកម្រិតតិចជាងកាលពីឆ្នាំ២០១៩ ផងដែរ។ របាយការណ៍នេះ បង្ហាញថា៖«ការដោះដូរទំនិញសម្រាប់ការធ្វើការងារពីផ្ទះ និងសម្ភារវេជ្ជសាស្ត្រមានការកើនឡើង ក្នុងត្រីមាសទី៣ ប៉ុន្តែទំនិញក្នុងវិស័យយានយន្ត និងថាមពលនៅបន្តធ្លាក់ចុះ»។
ក្រៅពីនេះ កំណើនក្នុងវិស័យវាយនភ័ណ្ឌ ក៏នឹងមានការកើនឡើងផងដែរ ដោយ UNCTAD អះអាងថា វិស័យនេះនឹងមានកំណើនយ៉ាងហោចណាស់៣ភាគរយនៅត្រីមាសទី៤ ឆ្នាំ២០២០នេះ។ ទោះជាយ៉ាងណាក្តី របាយការណ៍ខាងលើក៏បានរំលឹកផងដែរ កំណើនពាណិជ្ជកម្មនឹងបន្តស្ថិតក្នុងសភាពមិនច្បាស់លាស់ ដោយសារតែការវិវត្តនៃជំងឺ COVID-19 ។
របាយការណ៍របស់ UNCTAD បញ្ជាក់ថា បើសិនជាករណីឆ្លង COVID-19 បន្តកើនឡើងក្នុងរយៈពេលប៉ុន្មានខែខាងមុខ ស្ថានការណ៍បែបនេះ នឹងបង្កើតជាបរិយាកាសមិនអំណោយផលដល់ពាណិជ្ជកម្មពិភពលោកមិនខាន។ នេះក៏ព្រោះរដ្ឋាភិបាលប្រទេសនានា អាចនឹងដាក់ចេញនូវគោលនយោបាយភ្លាមៗក្នុងការរឹតត្បិតពាណិជ្ជកម្ម។
ខណៈការអត្រាកំណើនជារួមកើនយឺត ចិន ជាប្រទេសដែលមានកំណើនពាណិជ្ជកម្មច្រើនជាងគេ ក្នុងត្រីមាសទី៣ ឆ្នាំ២០២០នេះ ដោយហក់ឡើងរហូតដល់ទៅ១០ភាគរយ ធៀបទៅនឹងត្រីមាសទី៣ ឆ្នាំ២០១៩ បន្ទាប់ពីទំហំពាណិជ្ជកម្មរបស់ខ្លួនបានធ្លាក់ចុះយ៉ាងគំហុកនៅពេលផ្ទុះជំងឺឆ្លង ក្នុងរយៈពេល៦ខែដើមឆ្នាំរួចមក។ ជារួម ការនាំចេញរបស់ចិននៅ៩ខែដើមឆ្នាំ២០២០ មានទំហំប្រហាក់ប្រហែលទៅនឹងឆ្នាំ២០១៩ ស្របពេលការនាំចូល ក៏មានការកើនឡើងផងដែរក្នុងត្រីមាសទី២ ឆ្នាំ២០២០ ។
សូមបញ្ជាក់ផងដែរថា នៅដើមខែតុលា អង្គការពាណិជ្ជកម្មពិភពលោក(WTO)បានអះអាងថា ទំហំពាណិជ្ជកម្មសាកលនឹងធ្លាក់ចុះ៩,២ភាគរយ ប៉ុន្តែនឹងកើនឡើងវិញយ៉ាងសន្សឹមៗចំនួន៧,២ភាគរយក្នុងឆ្នាំ២០២១។ អឺរ៉ុប និងអាមេរិក គឺជាតំបន់ដែលរងគ្រោះខ្លាំងដោយសារការធ្លាក់ចុះទំហំពាណិជ្ជកម្មនេះ។ WTO ក៏បានអះអាងដែរថា បើសិនជាមានវ៉ាក់សាំងនៅដើមឆ្នាំ២០២១ នោះកំណើនពាណិជ្ជកម្មនឹងមានការកើនឡើង៣ភាគរយបន្ថែមទៀត៕
Tag:
UNCTAD
ពាណិជ្ជកម្ម
© រក្សាសិទ្ធិដោយ thmeythmey.com
