អន្តរជាតិ
លោក ស៊ូហ្កា៖ ជប៉ុន និងប្រទេសសម្ព័ន្ធមិត្ត មិនមានបំណងបង្កើតណាតូថ្មីនៅអាស៊ីទេ
នាយករដ្ឋមន្រ្តីជប៉ុន លោក ស៊ូហ្កា យូស៊ីហ៊ីដេ។ រូបភាព៖ Reuters
×![]()
ដោយ: ធៀន ភារិន្ទ
នាយករដ្ឋមន្ត្រីជប៉ុន លោក ស៊ូហ្កា យូស៊ីហ៊ីដេ នៅថ្ងៃទី២១ បានលើកឡើងថា ជប៉ុន និងក្រុមប្រទេសកិច្ចសន្ទនាចតុភាគី (Quad) មិនមែនបំណង ចង់បង្កើតបក្សសម្ព័ន្ធយោធាណាតូ នៅក្នុងតំបន់ឥណ្ឌូ-បាស៊ីហ្វិកទេ ហើយជប៉ុនរីករាយក្នុងការសហការជាមួយគ្រប់ប្រទេសទាំងអស់។ 
ថ្លែងនៅក្នុងសន្និសីទសារព័ត៌មាននៅក្នុងទីក្រុងហ្សាការតានៅថ្ងៃបញ្ចប់ទស្សនកិច្ចនៅឥណ្ឌូណេស៊ី លោក ស៊ូហ្កា យូស៊ីហ៊ីដេ ប្រមុខរដ្ឋាភិបាលជប៉ុន បានលើកឡើងយ៉ាងដូច្នេះថា៖ «ជប៉ុន និងក្រុមប្រទេសកិច្ចសន្ទនាចតុភាគី មិនផ្តោតលើប្រទេសណាមួយឡើយ»។ បើតាមការអះអាងរបស់មេដឹកនាំរូបនេះ ជប៉ុនមានបំណងសហការជាមួយគ្រប់បណ្តាប្រទេសទាំងអស់ ដែលមានការគិតស្រដៀងគ្នា ហើយជប៉ុន ក៏មិនមានចេតនាចង់បង្កើតបក្សសម្ព័ន្ធយោធាណាតូថ្មី នៅក្នុងតំបន់ឥណ្ឌូ-បាស៊ីហ្វិកដែរ។
ការលើកឡើងបែបនេះ ធ្វើឡើងបន្ទាប់ពីប្រមុខការទូតចិន លោកវ៉ាង យី ចោទថា អាមេរិក ជប៉ុន ឥណ្ឌា និងអូស្ត្រាលី ចង់បង្កើតបក្សសម្ព័ន្ធណាតូនៅក្នុងតំបន់ឥណ្ឌូ-បាស៊ីហ្វិក ក្នុងអំឡុងទស្សនកិច្ចនៅម៉ាឡេស៊ី។
ទន្ទឹមនេះ លោកស៊ូហ្កា ក៏បានលើកឡើងពីបញ្ហាសមុទ្រចិនខាងត្បូងផងដែរ។ បើតាមលោកនាយករដ្ឋមន្ត្រី ទីក្រុងតូក្យូ ជំទាស់ដាច់ខាតទៅនឹងសកម្មភាពទាំងឡាយ ដែលបង្កឲ្យមានភាពតានតឹងនៅក្នុងតំបន់សមុទ្រចិនខាងត្បូង។
ដោយមិនបានសំដៅឲ្យចំពីប្រទេសណាមួយ ប្រមុខដឹកនាំជប៉ុនរូបនេះ បានបន្តទៀតថា បញ្ហាសំខាន់ក្នុងការដោះស្រាយសមុទ្រចិនខាងត្បូង មិនមែនជាការប្រើប្រាស់កម្លាំងយោធា ឬការគំរាមកំហែងឡើយ ប៉ុន្តែជាការដោះស្រាយបញ្ហាតាមរយៈការដោះស្រាយដោយសន្តិភាព ឬច្បាប់អន្តរជាតិជាដើម។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters។
ក្រៅពីQuad និងបញ្ហាសមុទ្រចិនខាងត្បូង លោកស៊ូហ្កា បានបន្ថែមពីទំនាក់ទំនងជាមួយអាស៊ាន។ បើតាមប្រមុខរដ្ឋាភិបាលទីក្រុងតូក្យូរូបនេះ ជប៉ុន និងអាស៊ាន គឺមិត្តចាស់ ដែលស្វែងរកនីតិរដ្ឋ និងការបើកចំហរនៅក្នុងតំបន់ឥណ្ឌូ-បាស៊ីហ្វិក។ លើសពីនេះ លោកស៊ូហ្កាបានបន្ថែមថា ទំនាក់ទំនងកាន់តែជិតស្និតរវាងជប៉ុន និងអាស៊ាន គឺជាមូលដ្ឋាននៃវិបុលភាពសេដ្ឋកិច្ចនៅក្នុងតំបន់។
សូមបញ្ជាក់ថា ក្នុងដំណើរទស្សនកិច្ចមកវៀតណាម និងឥណ្ឌូណេស៊ីនេះ លោកស៊ូហ្កា បានជជែកបញ្ហាជាច្រើនជាមួយនាយករដ្ឋមន្ត្រីវៀតណាម លោក ង្វៀន ស៊ួនហ្វុក និងប្រធានាធិបតីឥណ្ឌូណេស៊ី លោកចូកូ វីដូដូ។ ក្នុងនោះមានដូចជាបញ្ហាសិទ្ធិមនុស្ស កិច្ចព្រមព្រៀងលក់អាវុធ សេដ្ឋកិច្ច ការបើកជើងហោះហើរឡើងវិញ និងបញ្ហាជាច្រើនទៀត៕
Tag:
ជប៉ុន
ចិន
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
5 ថ្ងៃ
