សម្ដេច ហ៊ុន សែន ពន្យាពេលអនុវត្តពន្ធលើចំណេញមូលធន ទៅឆ្នាំ២០២២វិញ

ជាតិ

សម្ដេច ហ៊ុន សែន ពន្យាពេលអនុវត្តពន្ធលើចំណេញមូលធន ទៅឆ្នាំ២០២២វិញ

22, Oct 2020 , 3:55 pm

រូបភាព

ដោយ: រំដួល ចិត្រា (Romdoul Chetra)

ភ្នំពេញ៖ រដ្ឋាភិបាល សម្រេចពន្យាពេលអនុវត្តពន្ធលើចំណេញមូលធនមួយឆ្នាំទៀត រហូតដល់ឆ្នាំដំណាច់ឆ្នាំ២០២១។ នេះបើតាមអគ្គនាយកដ្ឋានពន្ធដារ នៃក្រសួងសេដ្ឋកិច្ច និងហិរញ្ញវត្ថុ ថ្ងៃទី២២ តុលា ២០២០។

អគ្គនាយកដ្ឋានពន្ធដារ បានបញ្ជាក់ថា ការសម្រេចពន្យាពេលនេះ ដោយសារចង់ទុកពេលវេលាគ្រប់គ្រាន់ដល់អ្នកជាប់ពន្ធ និងសាធារណជនទាំងអស់ ស្វែងយល់ឱ្យកាន់តែច្បាស់នូវបទប្បញ្ញត្តិស្តីពីពន្ធលើចំណេញមូលធន ។ ជាពិសេសការត្រៀមខ្លួន អនុវត្តពន្ធលើចំណេញមូលធននេះ ឱ្យភាពរលូន និងមានប្រសិទ្ធភាពខ្ពស់ ចាប់ពីថ្ងៃទី១ មករា ២០២២តទៅ។

កន្លងមកប្រធានសមាគមអ្នកវាយតម្លៃនិងភ្នាក់ងារអចលនវត្ថុកម្ពុជា លោក ច្រឹក សុខនីម ធ្លាប់បាននិយាយថា បើរដ្ឋនឹងអនុវត្តយកពន្ធមូលធននេះមែន នោះអ្នករកស៊ីវិស័យអចលនទ្រព្យ នឹងរងផលប៉ះពាល់។ លោក អះអាងថា ការយកពន្ធនេះ វាគឺជាការបន្ថែមបន្ទុកដល់អ្នករកស៊ីវិស័យអចលនទ្រព្យទៅវិញទេ ខណៈដែលពួកគេកំពុងប្រឈមមុខធ្លាក់ចុះចំណូល ដោយសារបញ្ហាកូវីដ-១៩។

អត្ថបទទាក់ទង

លោក គង់ វិបុល ៖ ការបង្កើតពន្ធមូលធន មិនមែនសង្កត់ «ក» ពលរដ្ឋទេ តែសម្រាប់ជួយ«អ្នកក្រ»

អ្នកសេដ្ឋកិច្ច៖ ការប្រមូលពន្ធមូលធន ជាយុទ្ធសាស្ត្រស្តារសេដ្ឋកិច្ចឡើងវិញ និងទប់ស្កាត់ការផ្ទុះវិស័យអចលនទ្រព្យ

ប្រធានសមាគមអ្នកវាយតម្លៃនិងភ្នាក់ងារអចលនវត្ថុកម្ពុជារូបនេះ បានលើកឡើងដូច្នេះថា៖«ពាក់ព័ន្ធនឹងវិស័យអចលនទ្រព្យ រាល់ថ្ងៃដំណើរការដោយសារអ្នកទិញនៅក្នុងស្រុកទេ ពាក់ព័ន្ធនឹងបរទេសសឹងតែមិនសូវមាន(អ្នកទិញ)ហើយ។ អ៊ីចឹងបញ្ហាការអនុវត្តពន្ធសម្រាប់មូលធននេះ ខ្ញុំគិតថា វាជាពេលវេលាដែលលំបាកសម្រាប់អ្នកវិនិយោគិននៅក្នុងប្រទេសរបស់យើង ដើម្បីទ្រទ្រង់នូវវិស័យអចលនទ្រព្យនេះ។ ហើយប្រសិនជាពន្ធនេះ ត្រូវបានអនុវត្តពិតប្រាកដមែន ខ្ញុំមើលឃើញថាវា គឺជាអម្រែកយ៉ាងធ្ងន់សម្រាប់អ្នកវិនិយោគិនទៅលើវិស័យអចលនទ្រព្យ ហើយរដ្ឋាភិបាលក៏ជួបប្រឈមនូវបញ្ហាមួយចំនួនដែរ។ ប្រសិនជាពន្ធនេះចេញឡើង ដូច្នេះខ្ញុំគិតថា ការទិញដូរ(អចលនទ្រព្យ)មួយចំនួននឹងធ្លាក់ចុះ»។

តែយ៉ាងណាអ្នកជំនាញសេដ្ឋកិច្ច លោក គី សេរីវឌ្ឍន៍ អះអាងថា វិស័យអចលនទ្រព្យ គឺមិនងាយដួលឡើយ។ អ្នកជំនាញសេដ្ឋកិច្ចរូបនេះ យល់ឃើញបែបវិជ្ជមានវិញថា ការអនុវត្តពន្ធមូលធន គឺជាការទប់ស្កាត់មិនឱ្យវិស័យអចលនទ្រព្យប៉ោងផ្ទុះទៅវិញទេ។ ត្រង់ចំណុចនេះលោក សេរីវឌ្ឍន៍ ពន្យល់ថា នៅពេលការអនុវត្តពន្ធមូលធនចូលជាធរមាន វាធ្វើឱ្យពលរដ្ឋឈប់នាំគ្នាសម្រុកទិញ និងលក់ដីដូចមុន ព្រោះតម្លៃអចលនទ្រព្យឡើងខ្ពស់ដោយសារកម្រិតពន្ធ ហើយករណីចាក់ដីលុបបឹង ដើម្បីលក់ដីនោះ ក៏លែងសូវមានទៀតដែរ។ ជាពិសេសវានឹងជំរុញឱ្យការប្រើប្រាស់ដីធ្លី មានគោលដៅច្បាស់លាស់ និងបង្កើនកំណើនផលិតកម្មទៀតផង។

បើតាមអ្នកជំនាញសេដ្ឋកិច្ចរូបនេះ វិធានការប្រមូលពន្ធមូលធននេះ វាផ្ដល់ផលវិជ្ជមានសម្រាប់សេដ្ឋកិច្ចកម្ពុជា ក្រោយវិបត្តិកូវីដ-១៩។ សម្រាប់លោក គី សេរីវឌ្ឍន៍ ការយកពន្ធមូលធននេះ មិនមានអ្វីប្លែកទេ ខណៈបណ្ដាប្រទេសអាស៊ាន និងអឺរ៉ុបខ្លះ បានអនុវត្តទៅហើយ។

លោក គង់ វិបុល អគ្គនាយកដ្ឋានពន្ធដារ ធ្លាប់បានអះអាងថា ការអនុវត្តពន្ធនេះ មិនមែនជាការសង្កត់«ក» រាស្ត្រនោះទេ។ បើតាមលោក គង់ វិបុល ការបង្កើតពន្ធនេះ គឺដើម្បីយកប្រាក់ចំណេញពីអ្នកលក់អចលនទ្រព្យ មកជួយពលរដ្ឋក្រីក្រប៉ុណ្ណោះ ៕