អន្តរជាតិ
ឥណ្ឌា ឲ្យនាវាមុជទឹកមួយគ្រឿងដល់មីយ៉ាន់ម៉ា នាយករដ្ឋមន្រ្តីឥណ្ឌា លោក នារិន្ទ្រា ម៉ូឌី និងរដ្ឋមន្រ្តីក្រសួងការបរទេសមីយ៉ាន់ម៉ា លោកស្រី អ៊ុងសាន ស៊ូជី។ រូបភាព៖ India TV News
× ឥណ្ឌា បានផ្តល់នាវាមុជទឹកមួយគ្រឿងដល់មីយ៉ាន់ម៉ា ដើម្បីពង្រឹងកិច្ចសហប្រតិបត្តិការការពារជាតិទ្វេភាគី។ នេះបើតាមការចុះផ្សាយរបស់កាសែត Nikkei Asia នៅថ្ងៃទី២២ ខែតុលា។ អ្នកជំនាញមើលឃើញថា នេះគឺជាយុទ្ធសាស្ត្ររបស់ឥណ្ឌា ក្នុងការទប់ស្កាត់ឥទ្ធិពលរបស់ចិននៅក្នុងតំបន់។
មួយរយៈចុងក្រោយនេះ ទំនាក់ទំនងចិន និងមីយ៉ាន់ម៉ា កាន់តែខិតទៅជិតគ្នា ខណៈចិន និងឥណ្ឌា កំពុងមានភាពតានតឹង។ ដើម្បីទប់ស្កាត់ឥទ្ធិពលចិនមកលើមីយ៉ាន់ម៉ា ឥណ្ឌាបានឲ្យនាវាមុជទឹកមួយគ្រឿង។
តាមរយៈសេចក្តីថ្លែងការណ៍ក្នុងពេលថ្មីៗនេះ អ្នកនាំពាក្យក្រសួងការបរទេសឥណ្ឌា លោក Anurag Srivastava បានប្រកាសយ៉ាងដូច្នេះថា៖ «ក្នុងបរិបទនេះ ឥណ្ឌានឹងផ្តល់នាវាមុជទឹកប្រភេទKilo ទៅឲ្យកងទ័ពជើងទឹកមីយ៉ាន់ម៉ា»។ បើតាមការអះអាងរបស់លោកAnurag អំណោចនាវាមុជទឹកឈ្មោះ INS Sindhuvir នេះ គឺជាការពង្រឹងទំនាក់ទំនងជាមួយមីយ៉ាន់ម៉ា ជាពិសេសផ្អែកលើចក្ខុវិស័យរបស់ឥណ្ឌាលើបញ្ហាសន្តិសុខ និងកំណើននៅក្នុងតំបន់។
នាវាមុជទឹកខាងលើ បានដាក់ឲ្យដំណើរការនៅក្នុងឆ្នាំ១៩៨៨ នៅក្នុងកងទ័ពជើងទឹកឥណ្ឌា និងត្រូវបានកែលម្អឡើងវិញដោយកន្លែងសាងសង់នាវាHindustan មុននឹងផ្តល់ទៅមីយ៉ាន់ម៉ា។ នាវាដែលដើរដោយអគ្គិសនី និងប្រេងម៉ាសូតនេះ មានទម្ងន់៣ពាន់តោន អាចស្ថិតនៅក្នុងទឹកបានជម្រៅ ៣០០ម៉ែត្រ និងមានល្បឿនជាង៣៣គីឡូម៉ែត្រក្នុងមួយម៉ោង។
នាវាមុជទឹករបស់មីយ៉ាន់ម៉ាទី១ នេះ ត្រូវបានប្តូរឈ្មោះថ្មីពី INS Sindhuvir ទៅ UMS Minye Theinkhathu ដែលជាឈ្មោះរបស់វីរៈជនប្រវត្តិសាស្ត្ររបស់មីយ៉ាន់ម៉ា។ ទាក់ទិននឹងអំណោយខាងលើអគ្គមេបញ្ជាការកងទ័ពមីយ៉ាន់ម៉ា ឧត្តមសេនីយ៍ មីន អ៊ុងឡាំង បានបញ្ជាក់ថា នាវាមុជទឹកឥណ្ឌា នឹងបង្កើនសមត្ថភាពរបស់កងទ័ពជើងទឹកមីយ៉ាន់ម៉ាបន្ថែមទៀត។
យ៉ាងណាក៏ដោយ អ្នកជំនាញយល់ឃើញថា ការផ្តល់នាវាមុជទឹកឲ្យមីយ៉ាន់ម៉ា គឺជាយុទ្ធសាស្ត្ររបស់ឥណ្ឌា ដើម្បីឆ្លើយតបនឹងសកម្មភាពរបស់ចិន ក៏ដូចជា កាត់បន្ថយឥទ្ធិពលចិននៅក្នុងតំបន់។
តាមរយៈតួលេខលើការនាំអាវុធចូលពីបរទេសចាប់ពីឆ្នាំ២០០០ ដល់ឆ្នាំ២០១៩ មីយ៉ាន់ម៉ា បាននាំចូលអាវុធមកពីរុស្ស៊ីប្រមាណ៤៣ភាគរយ, ចិនមាន ៤១ភាគរយ, ឥណ្ឌាមាន៤ ភាគរយ និងប្រទេសផ្សេងទៀត។ ឥណ្ឌា និងមីយ៉ាន់ម៉ា មានព្រំដែនគោកជាប់គ្នាចំនួន ១៦០០គីឡូម៉ែត្រ និងព្រំដែនទឹក ៧២៥គីឡូម៉ែត្រ៕
© រក្សាសិទ្ធិដោយ thmeythmey.com